ເມືອງຫ້ວຍຊາຍ ມີຫຼາຍສະຖານທີ່ທ່ອງທ່ຽວທີ່ໜ້າສົນໃຈ ເຊິ່ງໜຶ່ງໃນນັ້ນກໍ່ແມ່ນ ຄ້າຍເກົ່າທະຫານຝຣັ່ງ ທີ່ຢູ່ໃນຄວາມຮັບຜິດຊອບ ຂອງພະແນກ ຖວທ ແຂວງບໍ່ແກ້ວ. ພາຍໃນຄ້າຍດ້ານໃນປະກອບມີອາຄານຕ່າງໆ ສ່ວນໃຫຍ່ເປັນຊາກປະລັກຫັກພັງ ຈຸດເດັ່ນຂອງຄ້າຍແຫ່ງນີ້ຄືຫໍຄອຍດ້ານທິດຕາເວັນຕົກ ນັກທ່ອງທ່ຽວສາມາດຂຶ້ນໄປທາງດ້ານເທິງ ເພື່ອຊົມທິວທັດຂອງເມືອງຫ້ວຍຊາຍ ລວມໄປເຖິງຝັ່ງຊຽງຂອງ (ໄທ) ໄດ້ຢ່າງຊັດເຈນ, ນັກທ່ອງທ່ຽວບາງຄົນຈະໃຊ້ເວລາຄ້ອນຂ້າງດົນພໍສົມຄວນ ເພາະວິວເມືອງຫ້ວຍຊາຍມີຄວາມສວຍງາມ ແລະ ມີມົນຂັງ, ບ້ານເຮືອນຂອງປະຊາຊົນລຽງກັນໄປຕາມແນວແມ່ນ້ຳຂອງ ສາຍນ້ຳໄຫຼເອື່ອຍ ຊົມວິຖີຊີວິດຂອງຜູ້ຄົນສອງຝາກຝັ່ງ ທີ່ຍັງຄົງດຳລົງຊີວິດແບບດັ່ງເດີມໃຫ້ໄດ້ຊົມ.

ຄ້າຍດັ່ງກ່າວ ປະກອບມີກຳແພງຮົ້ວອ້ອມສີ່ດ້ານ, ຫ້ອງການເຮັດວຽກ, ຄຸກຄຸມຂັງນັກໂທດ, ເຮືອນພັກຂອງທະຫານ ແລະ ເຮືອນຄົວ, ມີປ້ອມຍາມສັງເກດການສອງດ້ານຄື: ດ້ານໜ້າ ແລະ ດ້ານຫຼັງ. ພາຍຫຼັງທີ່ປະເທດລາວ ໄດ້ຖືກຈັດເຂົ້າເປັນແຄ້ວນໜຶ່ງ ຂອງອານາເຂດ ຝຣັ່ງປົກຄອງອິນດູຈີນໃນປີ 1893. ຫຼັງຈາກປະເທດລາວປະກາດເອກະລາດຈາກຝຣັ່ງ ໃນປີ 1954, ກອງທັບລາດສະອານາຈັກລາວ ໄດ້ນຳໃຊ້ຄ້າຍ ແຫ່ງນີ້ຈົນຮອດປີ 1975.
ຫຼັງຈາກນັ້ນເປັນຕົ້ນມາ ຄ້າຍທະຫານດັ່ງກ່າວ ແມ່ນຢູ່ໃນຄວາມຮັບຜິດຊອບ ຂອງກອງທັບ ປະຊາຊົນປະຕິວັດລາວ. ຫວ່າງບໍ່ດົນມານີ້ ຄ້າຍເກົ່າທະຫານຝຣັ່ງ ໄດ້ຖືກໂອນມາຢູ່ໃນຄວາມຮັບຜິດຊອບ ຂອງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງບໍ່ແກ້ວ.