ສຳນັກງານຄວາມປອດໄພທາງການຂົນສົ່ງຂອງອົດສະຕຣາລີ ຫຼື ເອທີເອສບີ ເປີດເຜີຍວ່າ ກຳລັງດຳເນີນການກວດສອບພາບຖ່າຍຊິ້ນສ່ວນໃໝ່ 3 ອັນທີ່ອາດຈະເປັນສ່ວນໜຶ່ງຂອງເຮືອບິນສາຍການບິນເມເລເຊຍຖ້ຽວບິນທີ່ເອັມເອຊ-370 ທີ່ສູນຫາຍໄປແບບເປັນປິດສະໜາ.
ໂຄສະນາຂອງເອທີເອສບີ ຊຶ່ງເປັນໝ່ວຍງານປະສານງານການຄົ້ນຫາຊາກເຮືອບິນເອັມເອຊ-370 ກ່າວວ່າ ທາງເອທີເອສບີໄດ້ຮັບແຈ້ງເລື່ອງການພົບຊິ້ນສ່ວນໃໝ່ ອັນໜຶ່ງຖືກຄື້ນຊັດມາເທິງຊາຍຫາດທີ່ເກາະແກງກາຣູ ນອກຝັ່ງທາງໃຕ້ຂອງອົດສະຕຣາລີ ແລະ ອີກ 2 ອັນພົບທີ່ມາດາກັສກາ ແລະ ໄດ້ຮັບພາບຖ່າຍຂອງຊິ້ນສ່ວນທີ່ພົບທັງ 3 ອັນແລ້ວ ຂະນະນີ້ກຳລັງກວດສອບພາບຖ່າຍກ່ອນທີ່ຈະສະຫຼຸບວ່າເປັນຊິ້ນສ່ວນຂອງເອັມເອຊ-370 ທີ່ຫາຍໄປ ຫຼື ບໍ່ ການຫາຍໄປຂອງເຮືອບິນໂດຍສານຍັງຄົງເປັນປິດສະໜາແຕ່ຄາດວ່າເຮືອບິນອາດຈະຕົກລົງໃນທະເລຫຼັງຈາກອອກເດີນທາງຈາກນະຄອນກົວລາລຳເປີຂອງມາເລເຊຍໄປຍັງນະຄອນຫຼວງປັກກິ່ງຂອງຈີນ ພ້ອມດ້ວຍຜູ້ໂດຍສານ ແລະ ລູກເຮືອ 239 ຄົນເມື່ອເດືອນມີນາ 2014 ແລະ ຈົນເຖິງຂະນະນີ້ພົບຊິ້ນສ່ວນເຮືອບິນ 8 ອັນ ໂດຍ 5 ອັນຖືກລະບຸວ່າມາຈາກເຮືອບິນໂບອິ້ງ 777 ສ່ວນອີກ 3 ອັນກຳລັງຢູ່ໃນລະຫວ່າງການກວດສອບ.