ປະຈຸບັນ ໂຄງການກໍ່ສ້າງລະບົບຊົນລະປະທານຫ້ວຍອາໄກ້ ເມືອງພີນ ແຂວງສະຫວັນນະເຂດແມ່ນມີຄວາມຄືບໜ້າກວ່າ ເຄິ່ງແຜນການພາຍຫຼັງໄດ້ເລີ່ມລົງມືກໍ່ສ້າງມາແຕ່ຕົ້ນປີ 2013 ໂດຍແມ່ນບໍລິສັດພົງຊັບທະວີກໍ່ສ້າງຂົວ-ທາງ ແລະຊົນລະປະທານຈຳກັດເປັນຜູ້ຮັບເໝົາກໍ່ສ້າງ ຊຶ່ງລວມເປັນມູນຄ່າທັງໝົດເກືອບ 200 ຕື້ກີບ.
ໂຄງການກໍ່ສ້າງຊົນລະປະທານຫ້ວຍອາໄກ້ປະກອບມີ: ເຂື່ອນດິນຖົມທີ່ມີຄວາມຍາວ 1.256 ແມັດ, ສູງ 21 ແມັດ, ຫຼັງເຂື່ອນກວ້າງ 6,50 ແມັດ, ປະກອບມີປາກລະບາຍນ້ຳສຸກເສີນທີ່ເຮັດດ້ວຍເບຕົງກວ້າງ 20 ແມັດ, ຍາວ 295 ແມັດ ແລະສູງ 1,5-3 ແມັດ. ຈາກນີ້ກໍມີຄອງເໝືອງແມ່ (MC) ທີ່ເຮັດດ້ວຍເບຕົງເສີມເຫຼັກຍາວ 1 ພັນ ແມັດ, ຄອງເໝືອງແມ່ທີ່ເຮັດດ້ວຍເບຕົງເບື້ອງຊ້າຍຍາວ 11.250 ແມັດ, ຄອງເໝືອງແມ່ທີ່ເຮັດດ້ວຍເບຕົງເບື້ອງຂວາຍາວ 3.950 ແມັດ, ຄອງເໝືອງຂັ້ນສອງຈຳນວນ 13 ເສັ້ນ, ຍາວ 13.864 ແມັດ, ທີ່ເປັນຄອງເບຕົງ ແລະຄອງເໝືອງຂັ້ນສາມຈຳນວນ 29 ເສັ້ນ, ເປັນຄອງກໍ່ ດິນຈີ່ຍາວ 21.115 ແມັດ ຊຶ່ງຄາດວ່າ ຈະໃຫ້ສຳເລັດໃນທ້າຍ ປີ 2017 ຈະມາເຖິງນີ້.
ຊຶ່ງພາຍຫຼັງທີ່ການກໍ່ສ້າງຊົນລະປະ ທານດັ່ງກ່າວຫາກສຳເລັດແລ້ວ, ຈະເຮັດໃຫ້ປະຊາຊົນພາຍໃນ 9 ບ້ານໄດ້ແກ່: ບ້ານນາກະຫານ, ນາທະລັງ, ໂນນຍາງ, ພີນ, ສະຄວງ, ຫິນສະໂງມ, ອາປອກ, ມະລົວ ແລະ ບ້ານຂະນິນ ໄດ້ຮັບຜົນປະໂຫຍດໃນການຜະລິດກະສິກຳເປັນສິນຄ້າເທື່ອລະກ້າວເປັນຕົ້ນກໍແມ່ນການປູກຝັງ ແລະລ້ຽງສັດໃຫ້ນັບມື້ນັບຫຼາຍ ໂດຍໂຄງການຊົນລະປະທານຫ້ວຍອາໄກ້ ສາມາດເກັບກັກນ້ຳໄດ້ທັງໝົດ 26 ລ້ານແມັດ ກ້ອນ ແລະຈະສະໜອງນ້ຳໃຫ້ເນື້ອທີ່ການຜະລິດນາປີໄດ້ 1.200 ເຮັກຕາ ແລະ ນາແຊງ 600 ເຮັກຕາ.
ທີ່ມາ: 