ສະມາຄົມຜູ້ປະກອບການລ້ຽງງົວນະຄອນຫຼວງວຽງຈັນ ໄດ້ຮ່ວມກັບພະແນກກະສິກຳ ແລະ ປ່າໄມ້ນະຄອນຫຼວງວຽງຈັນ ຈະຈັດງານການແຂ່ງຂັນງົວງາມໃນນະຄອນຫລວງວຽງຈັນກໍ່ຄື ສປປ ລາວຂຶ້ນ ໃນລະຫວ່າງວັນທີ 10 ຫາ 12 ມິຖຸນາ 2016 ທີ່ດ່ານກັກກັນພືດ ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ເຊິ່ງຈະມີງົວເຂົ້າຮ່ວມປະກວດທັງໝົດ 29 ໂຕ ມີງົວແມ່ 11 ໂຕ ແລະ ງົວເຖິກ 18 ຕົວ.
ທ່ານ ຈັນເພັງ ອິນສະຫວັນ ປະທານສະມາຄົມຜູ້ປະກອບການລ້ຽງງົວ ນະຄອນຫຼວງວຽງຈັນ ກ່າວວ່າ: ເປົ້າໝາຍຫຼັກຂອງການຈັດງານໃນຄັ້ງນີ້ ແມ່ນແນ່ໃສ່ສົ່ງເສີມ ແລະ ເປີດກ້ວາງໂຄສະນາ ທຸລະກິດການລ້ຽງງົວໃຫ້ແກ່ພໍ່ແມ່ປະຊາຊົນ ຜູ້ທີ່ມີຄວາມສົນໃຈຢາກຮູ້ຢາກລ້ຽງ ທັງນີ້ ຍັງເປັນການແລກປ່ຽນບົດຮຽນສ້າງຄວາມສາມັກຄີລະຫວ່າງສະມາຊິກພາຍໃນສະມາຄົມຜູ້ປະກອບການລ້ຽງງົວເອງ ຊຶ່ງໃນເມື່ອກອ່ນແມ່ນມີລ້ຽງແບບກະແຈກກະຈ່າຍ ໃຫ້ຫັນມາຈັບມືກັນເປັນກຸ່ມ ເພື່ອສ້າງຄວາມເຂັ້ມແຂງໃນຂະແໜງທຸລະກິດລ້ຽງງົວ ທັງເປັນການຄົ້ນຫາແມ່ພັນ, ພໍ່ພັນທີ່ສົມບູນແບບເພື່ອມາຂະຫຍາຍພັນຕໍ່ໄປ.
ພາຍໃນງານ ຍັງຈະມີການວາງສະແດງສິນຄ້າພູມປັນຍາຊາວບ້ານ ຫຼື ໂອດ໋ອບ, ການສາທິດການປູກຫຍ້າລ້ຽງງົວ, ສາທິດການປະສົມນ້ຳເຊື້ອງົວ, ວາງສະແດງ – ຂາຍຜະລິດຕະພັນຈາກກະສິກຳ ແລະ ປ່າໄມ້.
ຂ່າວຈາກ: ສຳນັກຂ່າວສານປະເທດລາວ