ປະຈຸບັນສະພາບເສດຖະກິດມີການຂະຫຍາຍຕົວຕໍ່ເນື່ອງເຮັດໃຫ້ຜູ້ຜະລິດລວມທັງການສະໜອງສິນຄ້າ ແລະບໍລິການມີຄວາມຫຼາກຫຼາຍໄດ້ເຮັດໃຫ້ຜູ້ຊົມໃຊ້ພົບບັນຫາຈາກສິນຄ້າ ແລະການບໍລິການທີ່ບໍ່ມີຄຸນນະພາບຫຼາຍຂຶ້ນ. ສະນັ້ນກົມການຄ້າພາຍໃນກະຊວງອຸດສາຫະກຳ ແລະການຄ້າໄດ້ຈັດພິທີເປີດໂທລະສັບສາຍດ່ວນໂທບໍ່ເສຍຄ່າໝາຍເລກ 1510 ເພື່ອເປັນການປົກປ້ອງຜູ້ຊົມໃຊ້ກໍຄືຊຸກຍູ້ຜູ້ຜະລິດໃຫ້ມີຄວາມປອດໄພໃນ ສປປ ລາວ.
ພິທີເປີດດັ່ງກ່າວມີຂຶ້ນວັນທີ 7 ມິຖຸນາຜ່ານມາທີ່ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳແລະການຄ້າ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ການປະກາດໃຊ້ໂທລະສັບສາຍດ່ວນ ນີ້ແມ່ນເປັນຂີດໝາຍທີ່ສຳຄັນ ແລະມີຄວາມຈຳເປັນສຳລັບ ສປປ ລາວ ເຮົາ ໂດຍສະເພາະແມ່ນຜູ້ຊົມໃຊ້ໃນ ສປປ ລາວເພື່ອໃຫ້ເຂົາເຈົ້າໄດ້ມີເຄື່ອງມືໃນການປະສານ ຫຼື ແຈ້ງຕໍ່ໜ່ວຍງານລັດທີ່ຮັບຜິດຊອບວຽກງານປົກປ້ອງຜູ້ຊົມໃຊ້ໂດຍກົງ.
ຊຶ່່ງກົດໝາຍວ່າດ້ວຍການປົກປ້ອງຜູ້ຊົມໃຊ້ຂອງ ສປປ ລາວ ໄດ້ໃຫ້ສິດແກ່ຜູ້ ຊົມໃຊ້ໃນການຮ້ອງຂໍ ຫຼື ຮ້ອງຟ້ອງເອົາການແກ້ໄຂ ແລະການທົດແທນຄ່າເສຍຫາຍຈາກຜູ້ສະໜອງສິນຄ້າ ແລະການບໍລິການທີ່ມີຄຸນນະພາບ ຫຼື ບໍ່ໄດ້ມາດຕະຖານ ແລະມີຜົນກະທົບຕໍ່ຊີວິດ, ສຸຂະພາບ ແລະຊັບສິນຂອງຕົນ. ຊຶ່ງປະຈຸບັນເສດຖະກິດມີການຂະຫຍາຍຕົວ ແລະມີການເພີ່ມຂຶ້ນຂອງຜູ້ຜະລິດ ແລະການສະໜອງສິນຄ້າ ແລະບໍລິການທີ່ຫຼາກຫຼາຍໄດ້ເຮັດໃຫ້ຜູ້ຊົມໃຊ້ພົບບັນຫາຈາກສິນຄ້າ ແລະການບໍລິການທີ່ບໍ່ມີຄຸນນະພາບຫຼາຍຂຶ້ນ.
ສຳລັບການເປີດການນຳໃຊ້ໂທລະສັບສາຍດ່ວນ 1510 ຖືວ່າເປັນທາງເລືອກໜຶ່ງຂອງຜູ້ຊົມໃຊ້ໃນການຮ້ອງທຸກ ຫຼື ແຈ້ງຂໍ້ມູນພ້ອມນີ້ຍັງເປັນການກະຕຸກຊຸກຍູ້ໃຫ້ຜູ້ທຳການຜະລິດ ແລະດຳເນີນທຸລະກິດຕ່າງໆຕ້ອງໄດ້ເອົາໃຈໃສ່ຜະລິດ ຫຼື ຈຳໜ່າຍສິນຄ້າ ຫຼື ໃຫ້ການບໍລິການທີ່ມີຄຸນນະພາບ, ມາດຕະຖານ, ມີຄວາມປອດໄພ ແລະລາຄາທີ່ີເໝາະສົມ ພ້ອມນີ້ຍັງເປັນພັນທະຂອງ ສປປ ລາວ ກ່ຽວກັບວຽກງານດ້ານການປົກປ້ອງຜູ້ຊົມໃຊ້ໃນອາຊຽນອີກດ້ວຍ.
ທີ່ມາ: 