ຫຼັງຈາກທີ່ອາທິດກ່ອນນີ້ມີຂ່າວລືຕ່າງໆນາໆກ່ຽວກັບສະມາດໂຟນໃໝ່ຈາກບໍລິສັດ ZTE, ໃນມື້ນີ້ເອງສະມາດໂຟນດັ່ງກ່າວກໍເຜີຍໂສມອອກມາແລ້ວ ໃນນາມວ່າ Nubia Z11 Max. ສຳລັບໂຕເຄື່ອງນັ້ນມີໜ້າຈໍຂະໜາດ 6 ນິ້ວ ດ້ວຍຄວາມບາງ 1.32 ມມ ແລະສິ່ງທີ່ເດັ່ນຄືສັດສ່ວນຂອງໜ້າຈໍທີ່ກວມເອົາໂຕເຄື່ອງສະເລ່ຍເປັນ 83.27%. ຈໍສະແດງຜົນແມ່ນໃຊ້ຈໍ Super AMOLED, ຄວາມລະອຽດ FullHD (1920 x 1080 ພິກເຊວ) ແລະປົກປ້ອງດ້ວຍ Gorilla Glass 3.
ໃນດ້ານຂອງຮາດແວຣ໌ພາຍໃນກໍມີໃຊ້ງານຊິບປະມວນຜົນ Snapdragon 652 ຄວາມແຮງທີ່ 1.8GHz ພ້ອມກັບ GPU Adreno 510. ພື້ນທີ່ຈັດເກັບໃຫ້ມາ 64GB (eMMC 5.0), RAM 4GB, ຮອງຮັບ MicroSD ສູງສຸດ 200 GB. ນອກນີ້ຍັງຮອງຮັບການໃຊ້ງານ 4G ທັງ 2 ຊິມພ້ອມກັບ VoLTE. ອີກທັງຍັງມາພ້ອມກັບຊິບສຽງຄຸນນະພາບດີອັນດັບຕົ້ນໆໃນຕະຫຼາດແບບຊິບສຽງ Hi-Fi ແລະ ມາພ້ອມລະບົບສະແກນລາຍນິ້ວມືທີ່ດ້ານຫຼັງໂຕເຄື່ອງ. ແບັດເຕີຣີໃຫ້ມາ 4000 mAh ພ້ອມເທັກໂນໂລຢີ Nubia NeoPower 2.0.
ສຳລັບກ້ອງຫຼັງແມ່ນຕິດຕັ້ງມາ 16 ລ້ານພິກເຊວ ໂດຍໃຊ້ເຊັນເຊີ້ Sony IMX298 ມາພ້ອມກັບ ລະບົບກວດຈັບໂຟກັດອັດຕະໂນມັດ, ຄ່າຮູຮັບແສງ f/2.0 ແລະເລນ 6P. ກ້ອງໜ້າໃຫ້ມາ 8 ລ້ານພິກເຊວ 1.4um ພ້ອມກັບຮອງຮັບລູກຫຼິ້ນການຊົດເຊີຍແສງ. ນອກຈາກນີ້ທາງບໍລິສັດຍັງໄດ້ໃຊ້ຊ໋ອບແວຣ໌ NeoVision 5.9 ກັບກ້ອງຂອງໂຕເອງ ໂດຍສາມາດປ້ອງກັນພາບສັ່ນໄຫວໄດ້ດີ, ຫຼຸດຜ່ອນ 3D Noise (ຈະມີປະໂຫຍດໃນບ່ອນທີ່ມີແສງໜ້ອຍ), ນອກນີ້ຍັງມີເທັກໂນໂລຢີີການແຍກພິກເຊວ DTI ແລະ ເທັກໂນໂລຢີ LTM ສຳລັບການຄວບຄຸມພື້ນທີ່ທີ່ມີສີ. ອີກໜຶ່ງຄຸນສົມບັດກໍຄືເວລາທີ່ກຳລັງວີດີໂອຄໍຍັງສາມາດປັບປ່ຽນຟິວເຕີໄດ້ອີກ.
ສຳລັບ Nubia Z11 Max ແມ່ນໃຊ້ງານລະບົບ Android 5.1 Lollipop ທັບດ້ວຍ Nubia 3.9.9 UI. ລາຄາຂອງໂຕເຄື່ອງແມ່ນ 1999 ຢວນ (2.465.000 ກີບ) ແລະຈະເລີ່ມຂາຍໃນວັນທີ 16 ມິຖຸນານີ້ ທີ່ປະເທດຈີນ. ໂດຍມີທັງໝົດ 3 ສີໄດ້ແກ່: ສີດຳ, ສີເທົາ ແລະສີຂາວ. ນອກນີ້ກໍຍັງມີສີເງິນ ແຕ່ຈະມີສະເພາະປະເທດຈີນເທົ່ານັ້ນ.
ສຳລັບສິ່ງທີ່ພິເສດກວ່າໝູ່ກໍຄື Nubia Z11 Max ແມ່ນມີພຣີເຊັນເຕີເປັນນັກເຕະບານຊື່ດັງແບບ Cristiano Ronaldo ມາປະຈຳຢູ່ແບຣ໌ນອີກນຳ ແລະຍັງມີເຄື່ອງລຸ້ນພິເສດສຳລັບ Nubia Z11 Max ທີ່ມີລາຍເຊັນຂອງ C. Ronaldo ທີ່ດ້ານຫຼັງໂຕເຄື່ອງ. ນອກນີ້ກໍຍັງມີຮູບພາບຂອງ C. Ronaldo ລວມໄປເຖິງຂອງຂວັນພິເສດອື່ນໆອີກນຳ. ທັງໝົດນີ້ລາຄາ 2299 ຢວນ (2.835.000 ກີບ) ແລະຈະເລີ່ມຂາຍໃນວັນທີ 18 ມິຖຸນານີ້.
ທີ່ມາ: gizmochina