ເອເອຟພີລາຍງານວ່າ ເກີດເຫດໄຟໄໝ້ອາຄານບໍລິເວນແຊງ-ເດີນີ ທາງພາກເໝືອນະຄອນຫຼວງປາຣີ ປະເທດຝຣັ່ງ ເຮັດໃຫ້ມີຜູ້ເສຍຊີວິດ 5 ຄົນ ບາດເຈັບ 11 ຄົນ ໃນຈຳນວນນີ້ອາການສາຫັດ 2 ຄົນ ໂດຍນັກດັບເພີງຍັງບໍ່ສາມາດລະບຸຕົວຜູ້ຖືກໄຟໄໝ້ໄດ້ ເພາະຄວາມຮຸນແຮງຂອງແປວໄຟ, ພະແນກດັບເພີງຂອງນະຄອນຫຼວງປາລີເປີດເຜີຍວ່າ ມີຜູ້ຕິດຢູ່ເທິງອາຄານ 2 ຄົນ ໂດດໜີໄຟໄໝ້ລົງມາຈາກຊັ້ນ 4 ແຕ່ອາການບໍ່ສາຫັດ.
ລາຍງານລະບຸວ່າ ໄຟໄໝ້ເກີດຂຶ້ນເມື່ອເວລາ 19:30 ໂມງ ຂອງວັນຈັນທີ 6 ມິຖຸນາ ຕາມເວລາທ້ອງຖິ່ນ ໂດຍນັກດັບເພີງສາມາດຄວບຄຸມເພີງໄວ້ໄດ້ເມື່ອເວລາ 22:30 ໂມງ ຂະນະທີ່ຍັງບໍ່ຮູ້ວ່າຕົ້ນເພີງມາຈາກບ່ອນໃດ.