ຕາມຂ່າວຕ່າງປະເທດລາຍງານວ່າ ພິທີເປີດຢ່າງເປັນທາງການສຳລັບອຸໂມງທາງລົດໄຟຍາວທີ່ສຸດໃນໂລກ 57,1 ກິໂລແມັດ ໃນວັນທີ 1 ມິຖຸນາທີ່ຜ່ານມາ ລອດກ້ອງພູແອລມີຊື່ວ່າອຸໂມງກອດຣາດເບສຈາກເມືອງເອີສເຟດໃນລັດອູຣີໄປຍັງເມືອງໂບດິໂອລັດທີຊີໂນ ຊຶ່ງວິສະວະກອນຊາວສະວິດຊື່ ທ່ານ ຄາລ ເອດູອາດ ກຣູເນີ ອອກແບບໃນປີ 1947
ແຕ່ດ້ວຍຄວາມຊັກຊ້າຂອງລະບົບ, ປະກອບກັບຄວາມວິຕົກດ້ານງົບປະມານການກໍ່ສ້າງ ແລະ ອື່ນໆ ເຮັດໃຫ້ການກໍ່ສ້າງຫຼ້າຊ້າ ແລະ ໄດ້ເລີ່ມກໍ່ສ້າງຢ່າງຈິງຈັງໃນປີ 1999 ໃຊ້ເວລາສ້າງເຖິງ 17 ປີຈຶ່ງແລ້ວສຳເລັດດ້ວຍງົບປະມານຫຼາຍກວ່າ 12,000 ລ້ານໂດລ້າ ແລະ ມີຄົນງານເສຍຊີວິດ 9 ຄົນໃນເວລາກໍ່ສ້າງ
ນາຍົກລັດຖະມົນຕີຂອງເຢຍລະມັນ ທ່ານ ນາງ ອັງເກລາ ແມເຄິ, ປະທານາ ທິບໍດີຂອງຝຣັ່ງ ທ່ານ ຝຣັງຊົວ ໂຮນລັງ ແລະ ນາຍົກລັດຖະມົນຕີຂອງອິຕາລີ ທ່ານ ມັດເຕໂອ ເຣນຊີ ລວມເຖິງເຈົ້າໜ້າທີ່ລະດັບສູງຂອງສະວິດຢູ່ໃນຂະບວນຮອບເປີດພິທີນີ້ດ້ວຍ ເຊິ່ງທາງການຂອງສະວິດໄດ້ຈັດພິທີເປີດຢ່າງຍິ່ງໃຫຍ່
“ອຸໂມງຈະເປີດໃຫ້ບໍລິການເຕັມຮູບແບບໃນເດືອນ ທັນວາ ອຸໂມງນີ້ນອກຈາກຈະໃຊ້ສຳລັບຂົນຄົນແລ້ວ ຍັງຈະໃຊ້ຂົນສິນຄ້າອີກດ້ວຍເພື່ອຄວາມປອດໄພຂອງສິນຄ້າ ແລະ ເວລາທີ່ວ່ອງໄວໃນການຂົນສົ່ງແຖມຍັງຄິດຄ່າບໍລິການຖືກອີກດ້ວຍ ອຸໂມງລົດໄຟນີ້ຈະແລ່ນຈາກເມືອງຊູຣິດຂອງສະວິດໄປທີ່ເມືອງມິລານຂອງອີຕາລີໃຊ້ເວລາພຽງ 2 ຊົ່ວໂມງ 40 ນາທີ ຖືວ່າໄວຂຶ້ນເກືອບໜຶ່ງຊົວໂມງ
ອຸໂມງດັ່ງກ່າວນີ້ໄດ້ກາຍເປັນອຸໂມງຍາວທີ່ສຸດໃນໂລກທຳລາຍເຈົ້າຂອງສະຖິຕິເດີມຄືອຸໂມງເຊກັງຢູ່ຍີ່ປຸ່ນທີ່ມີຄວາມຍາວ 53,9 ກິໂລແມັດ.
ທີ່ມາ: ຂ່າວເດລີນິວ ແລະ http://www.nationtv.tv/