ຄະນະນັກວິທະຍາສາດມີລາຍງານວິໄຈເຕືອນວ່າ ພືດອາຫານຕ່າງໆທີ່ຜະເຊີນສະພາບອາກາດປ່ຽນແປງ ສ່ຽງກາຍເປັນພິດຫຼາຍຂຶນ ແລະ ອາດກໍ່ໃຫ້ເກີດບັນຫາສຸຂະພາບທັງຕໍ່ຄົນ ແລະການລ້ຽງສັດທົ່ວໂລກ.
ລາຍງານສະບັບໃໝ່ຂອງໂຄງການສິ່ງແວດລ້ອມແຫ່ງສະຫະປະຊາຊາດລະບຸວ່າ ພືດອາຫານເຊັ່ນ ເຂົ້າບາເລ ແລະ ສາລີມີຄວາມສ່ຽງກາຍເປັນພິດສູງເນື່ອງຈາກມັນຈະທຳປະຕິກິລິຍາປົກປ້ອງຕົວເອງຈາກສະພາວະອາກາດທີ່ປ່ຽນແປງຮຸນແຮງ ການທຳປະຕິກິລິຍາໃນກະບວນການເຄມີຂອງພືດເປັນອັນຕະລາຍຫາກມະນຸດ ຫຼື ສັດທີ່ກິນເຂົ້າໄປເປັນໄລຍະເວລາໜຶ່ງ ລາຍງານສະບັບຫຼ້າສຸດນຳມາເປີດເຜີຍລະຫວ່າງການປະຊຸມສະມັດຊາສິ່ງແວດລ້ອມສະຫະປະຊາຊາດທີ່ນະຄອນຫຼວງໄນໂຮບີ, ແຈັກລີນ, ແມັກເກລດ ຫົວໜ້າທີມນັກວິທະຍາສາດ ແລະ ຜູ້ອຳນວຍການຝ່າຍເຕືອນໄພ ແລະ ປະມວນເມີນຜົນກ່າວວ່າ ພືດຕ່າງໆມີປະຕິກິລິຍາຕອບສະໜອງຕໍ່ໄພແລ້ງ ແລະ ອຸນຫະພູມທີ່ເພີ່ມຂຶ້ນ ປຽບທຽບກັບຄົນເຮົາທີ່ຜະເຊີນສະຖານະການເຄັງຕຶງທີ່ສຸດ ການທີ່ພືດຕ້ອງຢູ່ໃນສະພາວະໄພແລ້ງຍາວນານຍິ່ງເຮັດໃຫ້ຂະບວນການຂອງພືດປ່ຽນແປງ ແລະກົດດິນໂພແທສຊຽມໄນເຕຣດ (Potassium Nitrate)ສະສົມ ສຳລັບພືດອາຫານທີ່ຄາດວ່າຈະມີກົດນີ້ສະສົມຫຼາຍໃນສະພາບອາກາດປ່ຽນແປງສຸດໆ ທັງຮ້ອນສຸດ ຝົນຕົກໜັກຕາມມາ ໄດ້ແກ່ ສາລີ, ເຂົ້າບາເລ, ຖົ່ວເຫຼືອງ ແລະ ເມັດທັນຍະພືດເປັນຕົ້ນ.