ຂປລ. ໂລມາຄຳ ແມ່ນໂຮງງານຜະລິດນ້ຳດື່ມ ແລະ ນ້ຳກ້ອນຂອງ ທ່ານ ເກຍ ອູ໊ສິດທິເດດ ຕັ້ງຢູ່ບ້ານ ລັດຕະນະລັງສີໃຕ້ ເມືອງໄກສອນ ພົມວິຫານ ແຂວງສະຫວັນນະເຂດ ໂຮງງານດັ່ງກ່າວ, ໄດ້ຮັບການຢັ້ງຢືນ ຈາກມາດຕະຖານສາກົນໃນປີ 2014 (IOS) ແລະ ໄດ້ປະກອບສ່ວນຊ່ວຍເຫລືອສັງຄົມ ແມ່ນແນ່ໃສ່ລຶບລ້າງຄວາມທຸກຍາກຂອງປະຊາຊົນ 27 ຄອບຄົວເປົ້າໝາຍ ເຮັດໃຫ້ເຂົາເຈົ້າມີການດຳລົງຊີວິດດີຂຶ້ນ, ຫຍັບຫ່າງອອກຈາກການໄປຂໍທານ, ຮູ້ອອກແຮງງານເພີ່ມພູນຜະລິດຜົນ ສ້າງເສດຖະກິດຄອບຄົວແບບກຸ້ມຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງໃຫ້ຕົນເອງ.
ເຊິ່ງໂຄງການດັ່ງກ່າວ, ໄດ້ສະໜອງເຂົ້າກິນຈຳນວນ 9.200 ກິໂລ, ເຈາະນ້ຳບາດານ ຈຳນວນ 49 ໜ່ວຍ, ແອ່ງໃສ່ນ້ຳ 120 ໜ່ວຍ, ບຸກເບີກເນື້ອທີ່ນາ 63,5234 ເຮັກຕາ, ຈັດສັນເນື້ອທີ່ສວນປູກພືດຕ່າງໆ 90 ຕອນ 42.870 ເຮັກຕາ, ສ້ອມແປງໂຮງຮຽນບ້ານຄຳປ່າແໜ, ແລະ ຊ່ວຍເຄື່ອງນຸ່ງຫົ່ມ, ອຸປະກອນການຮຽນ, ໜໍ່ກ້ວຍ 2,556 ໜໍ່, ລຳມັນຕົ້ນ, ໜໍ່ພ້າວ ແລະ ອື່ນໆ ລວມມູນຄ່າທັງໝົດ ປະມານ 750 ລ້ານກ່ວາກີບ. ພ້ອມດຽວກັນ ກໍໄດ້ເຊີນວິຊາການດ້ານປູກເຂົ້າ ລົງວິໄຈດິນນາ ແລະ ແນວພັນເຂົ້າທີ່ຈະປູກ ພ້ອມທັງແນະນຳວິທີການປູກ, ການບົວລະບັດຮັກສາ ແລະ ເກັບກ່ຽວຜົນລະປູກ, ນອກຈາກນັ້ນ, ໄດ້ຮ່ວມມືກັບ ສູນຈັດສັນອາຊີບຄົງທີ່ ຂອງເມືອງຈຳພອນ ເກັບຊື້ຜົນຜະລິດຈາກຊາວບ້ານ ເພື່ອສ້າງລາຍຮັບໃຫ້ເຂົາເຈົ້າ.
ທ່ານ ເກຍ ອູ໊ສິດທິເດດ ໄດ້ໃຫ້ສຳພາດຕໍ່ນັກຂ່າວວ່າ: ການຈັດຕັ້ງປະຕິບັດໂຄງການດັ່ງກ່າວ ມາຮອດປັດຈຸບັນຍັງສືບຕໍ່ສ້າງສ້ວມຖ່າຍ ໃຫ້ຄອບຄົວເປົ້າໝາຍ ແລະ ນອກເປົ້າໝາຍ ທີ່ໄດ້ອະນຸມັດຈຳນວນ 30 ຄອບຄົວ, ອີກຈຳນວນໜຶ່ງ ແມ່ນກຳລັງຂຸດປະມານ 40 ກ່ວາຄອບຄົວ, ຂະຫຍາຍໂຮງຮຽນບ້ານປ່າກ້ວຍ ອອກຕື່ມອີກ 1 ຫ້ອງຮຽນ ແລະ ຂະຫຍາຍສຸກສາລາ ຢູ່ບ້ານປ່າກ້ວຍອອກຕື່ມ 1 ຫ້ອງ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!