ວັນທີ 27 ພຶດສະພາຜ່ານມາພະແນກອຸດສາຫະກຳ ແລະການຄ້ານະຄອນຫຼວງວຽງຈັນຮ່ວມກັບສະພາອຸດສາຫະກຳ ແລະ ການຄ້າໄດ້ຈັດງານວາງສະແດງສິນຄ້າໂອດັອບ ແລະ ສິນຄ້າຄອບຄົວຕົວແບບຂອງນະຄອນຫຼວງວຽງຈັນຄັ້ງທີ III ປະຈຳປີ 2016, ທີ່ສູນການຄ້າລາວ-ໄອເຕັກໂດຍພາຍໃຕ້ການເຂົ້າຮ່ວມຂອງທ່ານ ນາງ ເຂັມມະນີ ພົນເສນາລັດຖະມົນຕີກະຊວງອຸດສາຫະກຳ ແລະການ ຄ້າ, ທ່ານ ແກ້ວພິລາວັນ ອາໄພລາດ ຮອງ ເຈົ້າຄອງນະຄອນຫຼວງວຽງຈັນ, ພ້ອມດ້ວຍພາກສ່ວນທີ່ກ່ຽວຂ້ອງ ແລະບັນດາຫົວໜ່ວຍທຸລະກິດເຂົ້າຮ່ວມ.
ທ່ານ ເບີລິນ ເພັດຈັນທະລາດ ຫົວໜ້າພະແນກ ອຸດສາຫະກຳ ແລະການຄ້ານະຄອນຫຼວງວຽງຈັນ, ກ່າວວ່າ: ການຈັດງານດັ່ງກ່າວກໍ່ເພື່ອຈັດຕັ້ງປະຕິບັດນະໂຍບາຍໃນການສົ່ງເສີມການຜະລິດເປັນສິນຄ້າ ແລະການໂຄສະນາສິນຄ້າໃຫ້ແກ່ບັນດາຫົວໜ່ວຍທຸລະກິດຂະໜາດນ້ອຍ ແລະກາງທົ່ວປະເທດ, ໂດຍສະເພາະພາຍໃນນະຄອນຫຼວງວຽງຈັນໃຫ້ມີຕາໜ່າງຮອງຮັບຜະລິດຕະພັນພາຍໃນ ແລະເສີມສ້າງທ່າ ແຮງໃຫ້ແກ່ສິນຄ້າໜຶ່ງເມືອງໜຶ່ງຜະລິດ ຕະພັນທີ່ໄດ້ຖືກຄັດເລືອກໃຫ້ເປັນສິນຄ້າກາໝາຍໂອດັອບຂອງນະຄອນຫຼວງວຽງຈັນກໍຄືໃນທົ່ວປະເທດໃຫ້ມີພື້ນຖານໂຄງລ່າງໃນການເປີດຕະຫຼາດຈຳໜ່າຍ ຜະລິດຕະພັນຂອງຕົ້ນເອງ ແລະກ້າວຂຶ້ນເປັນທຸລະກິດທີ່ສາມາດຈຳໜ່າຍສິນຄ້າ ທັງພາຍໃນ ແລະສົ່ງອອກຕ່າງປະເທດໃຫ້ນັບມື້ນັບຫຼາຍຂຶ້ນ, ພ້ອມດຽວກັນນັ້ນກໍ່ເພື່ອສ້າງຄວາມເຂັ້ມແຂງໃຫ້ບັນດາຫົວໜ່ວຍທຸລະກິດທີ່ເຮັດການຜະລິດເປັນ ສິນຄ້າ, ທັງເປັນການໂຄສະນາແລກປ່ຽນບົດຮຽນລະຫວ່າງຫົວໜ່ວຍທຸລະ ກິດໂອດັອບດ້ວຍກັນ, ໃນນັ້ນກໍເພື່ອເປັນການຊຸກຍູ້ໃຫ້ຫົວໜ່ວຍທຸລະກິດຄອບຄົວ ຕົວແບບໃຫ້ມີການພັດທະນາສິນຄ້າຂອງ ຕົນກາຍເປັນສິນຄ້າໜຶ່ງເມືອງໜຶ່ງຜະລິດຕະພັນ (ໂອດັອບ) ແຫ່ງຊາດໃຫ້ມີຄວາມຍືນຍົງຕະຫຼອດໄປ.
ໃນງານວາງສະແດງ ແລະຈຳໜ່າຍ ສິນຄ້າໜຶ່ງເມືອງໜຶ່ງຜະລິດຕະພັນ (ໂອດັອບ) ແລະສິນຄ້າຄອບຄົວຕົວແບບ ຄັ້ງທີ III ປະຈຳປີ 2016 ນີ້, ແມ່ນມີທຸລະກິດເຂົ້າຮ່ວມງານທັງໝົດ 123 ຫົວ ໜ່ວຍສົມທຽບໃສ່ປີ 2015 ຜ່ານມາ ຈຳນວນ 80 ຫົວໜ່ວຍເພີ່ມຂຶ້ນ 58% ຈຳນວນຫ້ອງມີ 181 ຫ້ອງ, ທຽບໃສ່ປີ ຜ່ານມາເພີ່ມຂື້ນ 16%, ໃນນັ້ນເຫັນວ່າ: ສິນຄ້າໜຶ່ງເມືອງໜຶ່ງຜະລິດຕະພັນ (ໂອ ດັອບ) ເຂົ້າຮ່ວມງານທັງໝົດຈຳນວນ 32 ຫົວໜ່ວຍ (ຈາກ 34 ຫົວໜ່ວຍທີ່ ໄດ້ຮັບກາໝາຍໂອດ໋ອບຂອງ ນວ ລວມມີ 46 ຫ້ອງ, ສ່ວນສິນຄ້າຄອບຄົວຕົວແບບຂອງ ນວ ມີຈຳນວນ 65 ຫົວໜ່ວຍ, ລວມມີ 99 ຫ້ອງ, ສົມທຽບໃສ່ປີ 2015 ເຫັນວ່າຈຳນວນຫົວໜ່ວຍທຸລະກິດທີ່ໄດ້ຮັບກາໝາຍສິນຄ້າໂອດັອບເຂົ້າຮ່ວມ ງານເພີ່ມຂຶ້ນ 40% ແລະຫົວໜ່ວຍຄອບ ຄົວຕົວແບບເພີ່ມຂຶ້ນ 12% ນອກນັ້ນຍັງມີຫົວໜ່ວທຸລະກິດ ແລະຄອບຄົວຕົວແບບຈາກຕ່າງແຂວງໃນທົ່ວປະເທດເຂົ້າ ຮ່ວມ 29 ຫົວໜ່ວຍ, ລວມມີ 36 ຫ້ອງ.
ທັງນີ້ໃນງານຄັ້ງນີ້ຍັງໄດ້ມີພິທີຈັດງານປະກວດສິນຄ້າໜຶ່ງເມືອງໜຶ່ງຜະ ລິດ ຕະພັນ (ໂອດັອບ) ທີ່ສະໝັກເຂົ້າແຂ່ງຂັນປະກວດ, ກຳນົດສະເພາະຂອງ ນວ, ລວມມີຈຳນວນ 25 ຫົວໜ່ວຍໃນຈຳ ນວນໂອດັອບທັງໝົດ 34 ຫົວໜ່ວຍລວມ ມີ 46 ຜະລິດຕະພັນທີ່ສົ່ງເຂົ້າຮ່ວມ.
ທີ່ມາ: 