ລະດູຝົນມາພ້ອມກັບຄວາມເຢັນຊຸ່ມຊ້ຳຂອງສາຍນ້ຳ ແລະ ເປັນລະດູທີ່ເຮັດໃຫ້ຄົນເຈັບປ່ວຍໄດ້ງ່າຍ ໂດຍສະເພາະເດັກນ້ອຍ ສຳລັບຄົນທີ່ມີສຸຂະພາບບໍ່ແຂງແຮງອາດຈະເຈັບປ່ວຍໄດ້ງ່າຍ ວັນນີ້ເຮົາເລີຍມີວິທີການດູແລສຸຂະພາບໃຫ້ແຂງແຮງ ໃນຍາມລະດູຝົນມາຝາກກັນ
ອອກຈາກເຮືອນທຸກຄັ້ງຢ່າລືມຖືຄັນຫົ່ມ, ເສື້ອກັນຝົນ ໄປພ້ອມ
ກ່ອນອື່ນເຮົາຕ້ອງດູແລຕົວເອງບໍ່ໃຫ້ປຽກຝົນ ເພາະເຮົາບໍ່ຮູ້ວ່າຝົນຈະຕົກລົງມາໃນຊ່ວຍເວລາໃດ ສະນັ້ນການກຽມອຸປະກອນປະເພດຄັນຫົ່ມ, ເສື້ອກັນຝົນໄປນຳໃນລະດູຝົນມັນຈິ່ງເປັນສິ່ງສຳຄັນຫຼາຍ ຖ້າເຮົາປຽກຝົນຕະຫຼອດກໍ່ຈະເປັນໄຂ້, ເປັນໄອ, ເປັນຫວັດໄດ້ງ່າຍໆ ແລະ ທີ່ສຳຄັນເຮົາຈະບໍ່ເສຍເວລາໄປຢືນລົບຝົນຖ້າໃຫ້ຝົນເຊົາຕົກໄດ້ອີກດ່ວຍ
ດື່ມນ້ຳລ້າຫຼາຍໆ
ການດື່ມນ້ຳຈະຊ່ວຍຮັກສາພູມຄຸ້ມກັນໃນຮ່າງກາຍໃຫ້ຢູ່ໃນລະກັບທີ່ເໝາະສົມຢູ່ສະເໝີ ແລະ ເພື່ອປ້ອງກັນຮ່າງກາຍສູນເສຍນ້ຳຈາກການທີ່ເຫື່ອອອກຫຼາຍຈົນເກີນໄປ
ຫຼີກລ່ຽງການລຸຍນ້ຳຄັງ
ເມື່ອຝົນຕົກແຮງຕິດຕໍ່ກັນ ຈະເຮັດໃຫ້ເກີດມີນ້ຳຄັງ ແລະ ນ້ຳເປື້ອນຖ້າຫຼີກລ່ຽງໄດ້ທ່ານຄວນຫຼີກ ເພາະອາດເຮັດໃຫ້ຕີນຂອງທ່ານເກີດເປັນຕີນຫໍໄດ້ ແລະ ເວລາລຸຍນ້ຳເປື້ອນມາທຸກຄັ້ງທ່ານຕ້ອງລ້າງຕີນລ້າງມືໃຫ້ສະອາດ ເພາະນ້ຳເປື້ອນຈະມີເຊື້ອພະຍາດຢູ່ຫຼາຍ ເຊິ່ງມັນຈະນຳມາແກ່ ໂຣກອະຫິວາ, ໂຣກມືຕີນເປື່ອຍ, ແຜອັກເສບ ເປັນຕົ້ນ
ພະຍາຍາມເຮັດຕົວໃຫ້ແຫ້ງຢູ່ສະເໝີ
ຫາກວັນໃດທີ່ທ່ານປຽກຝົນມາ ຢ່າຟ້າວຍ່າງເຂົ້າຫ້ອງແອ ຫຼື ຍ່າງຜ່ານພັດລົມເດັດຂາດ ເພາະຈະເຮັດໃຫ້ຮ່າງກາຍປັບຕົວບໍ່ທັນ ທ່ານຄວນປ່ຽນເຄື່ອງ ແລະ ເຊັດຜົມໃຫ້ແຫ້ງກ່ອນ ຫຼື ເຮັດໃຫ້ໂຕທ່ານແຫ້ງທີ່ສຸດ ແລະ ຄວນດື່ມນ້ຳອຸ່ນໃສ່ ເພາະວິທີນີ້ຈະຊ່ວຍໃຫ້ອຸນຫະພູມໃນຮ່າງກາຍກັບມາເປັນປົກກະຕິ
ກິນອາຫານໃຫ້ສະອາດ
ນອກຈາກຈະເຮັດໃຫ້ຮ່າງກາຍສະອາດແລ້ວ ອາຫານທີ່ກິນລົງໄປຕ້ອງສະອາດອີກດ້ວຍ ເພາະລະດູຝົນຈະມີອຸນຫະພູມທີ່ເໝາະກັບການຈະເລີຍເຕີບໂຕຂອງເຊື້ອໂຣກ, ແບັກທີເຣຍ ແລະ ຈຸລິນຊີທັງຫຼາຍ ແລະ ຈະມີໂອກາດເຂົ້າມາໃນອາຫານການກິນຂອງທ່ານໄດ້ສູງ ເຊິ່ງຖ້າຫາກທ່ານກິນອາຫານທີ່ມີເຊື້ອໂຣກເຂົ້າໄປໃນຮ່າງກາຍແລ້ວ ບາງທ່ານອາດຈະເກີດອາການຖອກທ້ອງຮຸນແຮງໄດ້
ຢ່າໃຫ້ຍຸງກັດ
ເຮົາຮູ້ກັນດີຢູ່ວ່າໃນຊ່ວງລະດູຝົນຍຸງມີຫຼາຍເປັນພິເສດ ເນື່ອງຈາກສະພາບອາກາດຄວາມຊຸ່ມ ຈິ່ງອຳນວຍຄວາມສະດວກໃຫ້ແກ່ການຈະເລີນພັນຂອງຍຸງ ແລະ ຍຸງໃນລະດູຝົນຈະເປັນພາຫະນະນຳໂຣກຮ້າຍແຮງມາສູ່ຄົນໄດ້ເຊັ່ນ: ໄຂເລືອດອອກເປັນຕົ້ນ
ກິນສະໝຸນໄພເປັນປະຈຳ
ສະໝຸນໄພເຊັ່ນ: ຫົວສີໃຄ, ຂ່າ, ຂີງ, ກະທຽມ ແລະ ຂິມິ້ນ ລ້ວນມີຄຸນສົມບັດຮັກສາອຸນຫະພູມຂອງຮ່າງກາຍ ແລະ ສົ່ງເສີມລະບົບພູມຄຸຸ້ມກັນຂອງຮ່າງກາຍໄດ້ເປັນຢ່າງດີ
ຫາກໄອ ຫຼື ຈາມ ໃຫ້ໃຊ້ຜ້າອັດປາກທຸກຄັ້ງ
ເມື່ອມີອາການໄອ ຫຼື ຈາມ ໃຫ້ໃຊ້ຜ້າອັດປາກທຸກຄັ້ງເພື່ອບໍ່ໃຫ້ເຊື້ອໂຣກແຜ່ກະຈາຍໄປສູ່ຄົນອື່ນ ຫຼື ເຮັດໃຫ້ເຊື້ອໂຣກແຜ່ກະຈາຍໄປຕາມຮ່າງກາຍໄດ້
ທີ່ມາ: http://health.kapook.com