ຕາມ​ຂ່າວ​ຕ່າງປະ​ເທດ​ລາຍ​ງານ​ວ່າ ​ໄມ​ໂຄ​ຊອບ ອອກ​ຖະ​ແຫຼ​ງການ​ໃນ​ທ້າຍ​ອາທິດ​ທີ່​ຜ່ານ​ມາ​ ​ເລື່ອງ​ການ​ປັບ​ໂຄງ​ສ້າງ​ເສດຖະກິດ, ​ການ​ຜະລິດ​ອຸປະກອນ​ສະມາດ​ໂຟນ ສົ່ງ​ຜົນ​ໃຫ້​ຕ້ອງ​ມີການ​ປັບ​ຫຼຸດ​ພະນັກງານ​ລົງ 1.850 ຄົນ ​ແບ່ງ​ເປັນ​ພະນັກງານ​ໃນ​ແຟງ​ລັງ 1.350 ຄົນ ​ແລະ ອີກ 500 ຄົນ​ທົ່ວ​ໂລກ, ການ​ຕັດສິນ​ໃຈ​ດັ່ງກ່າວ​ໝາຍ​ຄວາມ​ວ່າ ​ໄມ​ໂຄ​ຊອບ​ຈະ​ບໍ່​ມີ​ການ​ອອກ​ແບບ​ຫຼື​ຜະລິດ​ສະມາດ​ໂຟນອີກ​ຕໍ່​ໄປ ​ແຕ່​ຍັງ​ຈະ​ພັດທະນາ​ໃນ​ສ່ວນ​ຂອງ​ຊອບ​ແວ ຖື​ເປັນ​ການ​ປິດ​ກິດຈະການ​ໂນ​ເກ​ຍ​ໃນ​ການ​ຄວບ​ຄຸມ​ຂອງ​ໄມ​ໂຄ​ຊອບ ​ໂດຍ​ໂນ​ເກ​ຍຊຶ່ງ​ເປັນ​ຜູ້​ຜະລິດ​ໂທລະສັບ​ມື​ຖື​ແຖວ​ໜ້າ​ຂອງ​ໂລກ​ໃນ​ໄລຍະ​ປີ 1998 -2011 ຂາຍ​ຕໍ່​ກິດຈະການ​ໃຫ້​ໄມ​ໂຄ​ຊອບ​ໃນ​ປີ 2014 ດ້ວຍ​ລາຄາ 7,2 ຕື້​ໂດ​ລາ​ສະຫະລັດ.

ຄ່າ​ໃຊ້​ຈ່າຍ​ໃນ​ສ່ວນ​ຂອງ​ການ​ປັບ​ໂຄງ​ສ້າງ​ຄັ້ງ​ນີ້​ຄາດ​ວ່າ ຢູ່​ທີ່​ປະມານ 950 ລ້ານ​ໂດ​ລາ ​ໂຄສົກ​ຂອງ​ໄມ​ໂຄ​ຊອບ​ມອາ​ເມ​ລິ​ກາ​ກ່າວ​ວ່າ ບໍລິສັດ​ຈະ​ເດີນ​ໜ້າ​ພັດທະນາ​ອຸປະກອນ​ໃໝ່ໆ ​ແລະ ລະບົບ​ປະຕິບັດ​ການ​ວີນ​ໂດ 10 ສຳລັບ​ອຸປະກອນ​ໜ້າ​ຈໍ​ທີ່​ນ້ອຍ ​ໂດຍ​ສະ​ເພາະ​ສະມາດ​ໂຟນ​ໃນ​ຕະກຸນ​ລູ​ເມຍ​ຂອງ​ໄມ​ໂຄ​ຊອບ ​ແລະ ອຸປະກອນ​ອື່ນໆ​ຂອງ​ເອ​ເຊີ, ອັລຄາ​ເທ​ລ, ​ເອຊພີ, ຕຣິນີຕີ ​ແລະ ​ໄວ​ໂອ ​ແຕ່​ຢ່າງ​ໃດ​ກໍ​ຕາມ ບໍ່​ມີ​ການ​ໃຫ້​ຄວາມ​ເຫັນ​ກ່ຽວ​ກັບ​ເລື່ອງ​ແຜນ​ທຸລະ​ກິດ​ໃນ​ອະ​ນະ​ຄົດ.