ຂປລ. ແຂວງສາລະວັນ ​ໄດ້ຈັດກອງປະຊຸມ ສະຫລຸບຕີລາຄາ ​ແລະ ກວດຄືນ ການນຳໃຊ້ທຶນຊ່ວຍເຫລືອລ້າ ແລະ ທຶນກູ້ຢືມ ໃນສົກປີ 2014-2015 ຜ່ານ​ມາ ແລະ ແຜນການຈັດຕັ້ງປະຕິບັດ 6 ເດືອນຕົ້ນ ສົກປີ 2015-2016 ​ໂດຍ​ສະ​ເພາະ​ແມ່ນ ທຶນຊ່ວຍເຫລືອທາງການເພື່ອການພັດທະນາ.

ໃນ​ສົກ​ປີຜ່ານມາ, ທົ່ວ​ແຂວງ​ໄດ້​ຮັບ​ທຶນຊ່ວຍເຫລືອລ້າ ແລະ ທຶນກູ້ຢືມ ມີ​ຈຳນວນ 43 ລ້ານກວ່າ​ໂດ​ລາ​ສະຫະລັດ ຫລື ປະມານ 360 ຕື້ກ່ວາກີບ, ລວມມີ 38 ໂຄງການ, ໃນນັ້ນໂຄງການຊ່ວຍເຫລືອລ້າຈາກຕ່າງປະເທດມີ 35 ໂຄງການ, ທຶນສົມທົບ 3 ໂຄງການ ​ໂດຍ​ໄດ້​ຈັດ​ຕັ້ງ​ປະຕິບັດ ​ໃນ​ຂົງ​ເຂດ​ເສດຖະກິດ 7 ໂຄງການ, ວັດທະນະທຳ-ສັງຄົມ 22 ໂຄງການ ​ແລະ ຂົງເຂດບໍລິຫານລັດ 9 ໂຄງການ. ສຳລັບສົກປີ 2015-2016 ນີ້, ແຂວງດັ່ງກ່າວ​ ຈະ​ໄດ້ຈັດຕັ້ງປະຕິບັດ ທຶນຊ່ວຍເຫລືອທາງການເພື່ອການພັດທະນາ ຈຳນວນມີ 39 ໂຄງການ, ມີມູນຄ່າ 54 ລ້ານ​ກວ່າ​ໂດ​ລາ​ສະຫະລັດ, ໃນນັ້ນທຶນຊວ່ຍເຫລືອລ້າຈາກຕ່າງປະເທດ 33 ໂຄງການ, ທຶນກູ້ຢືມ ຈາກຕ່າງປະເທດ 1 ໂຄງການ ​ແລະ ທຶນສົມທົບ 6 ໂຄງການ.

ກອງປະຊຸມດັ່ງກ່າວ​ ຈັດ​ຂຶ້ນວັນທີ 20 ພຶດສະພາ 2016 ພາຍໃຕ້ການເປັນປະທານຂອງ ທ່ານ ວິຊຽນ ນະວິກຸນ ຮອງເຈົ້າແຂວງ, ຜູ້ຊີ້ນຳວຽກງານຂົງເຂດເສດຖະກິດຂັ້ນແຂວງ, ມີວິຊາການຈາກກົມແຜນການ ການຮ່ວມມືສາກົນ, ກະຊວງແຜນການ-ການລົງທຶນ ​ແລະ ພາກສ່ວນ​ກ່ຽວຂ້ອງເຂົ້າຮ່ວມ.