ພະຍາດໄຂ້ຍຸງ ໄດ້ເລີ່ມລະບາດຢູ່ແຂວງຈໍາປາສັກ ໂດຍມີຜູ້ຕິດເຊື້ອຢູ່ທົ່ວແຂວງສະເຫຼ່ຍ 10 ກໍລະນີຕໍ່ວັນ ແລະ ໄດ້ມີຜູ້ຕິດເຊື້ອຫຼາຍກວ່າ 200 ກໍລະນີຢູ່ເມືອງສຸຂຸມາ ປັດຈຸບັນຍອດຜູ້ເສຍຊີວິດຍ້ອນພະຍາດໄຂ້ຍຸງລາຍໃນທົ່ວແຂວງເຖິງ 5 ລາຍ ຂະນະທີ່ທາງສາທາລະນະສຸກແຂວງກໍໄດ້ຕິດຕາມ ແລະ ເຝົ້າລະວັງຢ່າງຈິງຈັງ ພ້ອມທັງປຸກລະດົມໃຫ້ພໍ່ແມ່ປະຊາຊົນຊ່ອຍທໍາລາຍແຫຼ່ງເພາະພັນຂອງຍຸງລາຍໄປພ້ອມກັນຢູ່ໃນທົ່ວແຂວງຈໍາປາສັກ ຈິ່ງຈະສາມາດຕ້ານການແຜ່ລະບາດຂອງພະຍາດດັ່ງກ່າວໄດ້ໃນເວລາສັ້ນໆ.
ທ່ານ ດຣ. ສົມກຽດ ວໍລະລາດ ຫົວໜ້າພະແນກສາທະລະນະສຸກແຂວງຈໍາປາສັກ ແຈ້ງຕໍ່ຜູ້ສື່ຂ່າວທ້ອງຖິ່ນໃນວັນທີ 24 ພຶດສະພາ 2016 ວ່າ ການແຜ່ລະບາດຂອງພະຍາດດັ່ງກ່າວແມ່ນໄດ້ເລີ່ມເກີດຂຶ້ນແຕ່ຕົ້ນເດືອນກຸມພາ 2016 ເຊິ່ງໃນໄລຍະຜ່ານມາ ເມືອງສຸຂຸມາ ກໍໄດ້ມີການແຈ້ງໃຫ້ຮູ້ເຖິງຈໍານວນຜູ້ຕິດເຊື້ອໄຂຍຸງແຕ່ຍັງບໍ່ຫຼາຍ ແລະ ນັບແຕ່ຕົ້ນເດືອນເມສາ 2016 ຈໍານວນຜູ້ຕິດເຊື້ອໄດ້ເພີ່ມຂຶ້ນເປັນຈໍານວນຫຼາຍ ປັດຈຸບັນໃນທົ່ວແຂວງມີຜູ້ຕິດເຊື້ອແລ້ວ 286 ກໍລະນີ ໃນນັ້ນ ເມືອງສຸຂຸມາມີ 230 ກວ່າກໍລະນີ ແລະ ມີຜູ້ເສຍຊີວິດຢູ່ເມືອງດັ່ງກ່າວ 3 ກໍລະນີ ເມືອງໂຂງ ແລະ ເມືອງໂພນທອງ ເສຍຊີວິດເມືອງລະ 1 ກໍລະນີ ຮວມມີຜູ້ເສຍຊີວິດຈາກພະຍາດໄຂ້ຍຸງຢູ່ແຂວງຈໍາປາສັກແລ້ວ 5 ຄົນ ແລະ ປັດຈຸບັນການແຜ່ລະບາດຂອງພະຍາດດັ່ງກ່າວແມ່ນຍັງສືບຕໍ່ຢ່າງຮຸນແຮງ ໂດຍອີງຕາມການລາຍງານຂອງຂະແໜງການທີ່ກ່ຽວຂ້ອງໄດ້ແຈ້ງຈໍານວນຜູ້ຕິດເຊື້ອປະມານ 5-10 ຄົນຕໍ່ວັນ.
ເຖິງຢ່າງໃດກໍຕາມ ຕໍ່ກັບບັນຫາດັ່ງກ່າວ ອໍານາດການປົກຄອງແຂວງຈໍາປາສັກ ກໍຄືພະແນກສາທາລະນະສຸກແຂວງ ແມ່ນໄດ້ຈັດກອງປະຊຸມຫຼາຍຄັ້ງເພື່ອຈັດຕັ້ງຄະນະຄວບຄຸມຕ້ານ ຄະນະຕິດຕາມຂັ້ນແຂວງ ເມືອງ ແລະ ຂັ້ນບ້ານ ເພື່ອເຝົ້າລະວັງຢ່າງໃກ້ຊິດ ແລະ ເອົາໃຈໃສ່ຈັດຕັ້ງປະຕິບັດວຽກງານຕ້ານ ແລະ ຄວບຄຸມພະຍາດໄຂ້ຍຸງລາຍຢ່າງຈິງຈັງຕະຫຼອດມາ ເປັນຕົ້ນລົງເຜີຍແຜ່ໂຄສະນາເຖິງຜົນຮ້າຍ ລົງນໍາພາປະຊາຊົນທໍາລາຍແຫຼ່ງເພາະພັນຂອງຍຸງລາຍ ທີ່ສໍາຄັນແມ່ນໄດ້ຕອບສະໜອງນັກຊ່ຽວຊານ ດ້ານການປີ່ນປົວພະຍາດດັ່ງກ່າວຈາກສູນກາງມາປະຈໍາຢູ່ໂຮງໝໍແຂວງ ແລະ ໂຮງໝໍເມືອງ ໂດຍສະເພາະແມ່ນເມືອງສຸຂຸມາ ເຊິ່ງເປັນເມືອງທີ່ເກີດການລະບາດຢ່າງແຮງຂອງພະຍາດດັ່ງກ່າວ.
ຫົວໜ້າພະແນກສາທາລະນະສຸກແຂວງຈໍາປາສັກ ຍັງໄດ້ຮຽກຮ້ອງໃຫ້ພໍ່ແມ່ປະຊາຊົນທົ່ວແຂວງຈົ່ງພ້ອມກັນເອົາໃຈໃສ່ທໍາລາຍແຫຼ່ງເພາະພັນຂອງຍຸງລາຍ ໂດຍໃຫ້ເຮັດເປັນຂະບວນການຢ່າງຕັ້ງໜ້າ ແລະ ເປັນປະຈໍາ ເພື່ອທໍາລາຍແຫຼ່ງເພາະພັນຂອງຍຸງລາຍທີ່ເປັນພາຫະນໍາເຊື້ອພະຍາດມາສູ່ຄົນເຮົາ ດັ່ງນັ້ນ ຖ້າຫາກເຮັດພຽງແຕ່ເມືອງໃດເມືອງນຶ່ງ ກໍບໍ່ສາມາດຍຸດຕິການແຜ່ລະບາດຂອງພະຍາດດັ່ງກ່າວໃນເວລາສັ້ນໄດ້.
ຂ່າວ/ພາບ: ໂພທິຣາຊ
ທີ່ມາ: http://www.vtetoday.la/