ເນື່ອງ​ໃນ​ໂອ­ກາດ​ວັນ​ປູກ​ຕົ້ນ­ໄມ້ ແຫ່ງ​ຊາດ ວັນ​ທີ 1 ມິ­ຖຸ­ນາ 2016 ຈະ​ມາ​ເຖິງ​ນີ້ ແຂວງ​ບໍ​ລິ​ຄຳ​ໄຊ ກໍ​ຄື​ພະ​ແນກກະ­ສິ­ກຳ ແລະ​ປ່າ­ໄມ້​ແຂວງຈະ​ຈັດ​ກິດ​ຈະກຳ​ສ້າງ​ຂະ​ບວນ​ການ​ປູກ​ຕົ້ນ­ໄມ້​ປະ­ດັບຕົວ​ເມືອງ ແລະ​ ຟື້ນ​ຟູ​ປ່າ​ຜະ­ລິດ​ໃຫ້​ໄດ້​ຮັບຜົນ​ດີ ແລະ​ບັນ­ລຸ​ຕາມ​ຄາດ­ໝາຍ​ທີ່​ໄດ້ ວາງ​ໄວ້​ຕາມ​ແຈ້ງ​ການ​ຂອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ​ປ່າ­ໄມ້ ເລກ​ທີ 0046/ກປ ລົງ​ວັນ​ທີ 11 ພຶດ­ສະ­ພາ 2016 ກ່ຽວ​ກັບ​ການ​ສ້າງ​ຂະ​ບວນ​ການ​ປູກ​ຕົ້ນ­ໄມ້ ແລະ​ຟື້ນ​ຟູ​ປ່າ­ໄມ້ ເນື່ອງ​ໃນ​ໂອ­ກາດ​ວັນ​ປູກ​ຕົ້ນ­ໄມ້​ແຫ່ງ​ຊາດ​ປີ​ນີ້.

ອີງ​ຕາມ​ການ​ໃຫ້​ສຳ­ພາດ​ຂອງ ທ່ານ ຄຳ​ແພງ ແສງ​ມະ­ນີ​ວົງ ຮອງ​ຫົວ­ໜ້າ​ຂະ­ແໜງ​ປ່າ­ໄມ້​ພະ​ແນກ​ກະ­ສິ­ກຳ ແລະ​ປ່າ­ໄມ້​ແຂວງ​ບໍ​ລິ​ຄຳ​ໄຊ ຕໍ່​ນັກ​ຂ່າວ​ໃນ​ວັນ​ທີ 19 ພຶດ­ສະ­ພາ​ນີ້​ວ່າ: ວັນ​ປູກຕົ້ນ­ໄມ້​ແຫ່ງ​ຊາດ ວັນ​ທີ 1 ພຶດ­ສະ­ພາ 2016 ແຂວງ​ບໍ​ລິ​ຄຳ​ໄຊ ຈະ​ໄດ້​ມີ ການ​ຈັດ​ກິດ­ຈະ­ກຳ ປູກ​ຕົ້ນ­ໄມ້​ປະ­ດັບ​ຕົວ​ເມືອງ​ໃຫ້​ໄດ້ 160 ເຮັກ­ຕາ, ແລະ ປູກ​ໄມ້​ຟື້ນ​ຟູ​ປ່າ​ຜະ­ລິດ ແລະ​ປ່າ​ເຂດ​ນອກ​ໃຫ້​ໄດ້ 5.000 ເຮັກ­ຕາ ຊຶ່ງ​ມາຮອດ​ປະ­ຈຸ​ບັນ​ນີ້  ສາ­ມາດ​ເກັບ​ແກ່ນ​ກ້າ​ໄດ້​ແລ້ວ 3 ພັນ​ກິ​ໂລ ກ້າ​ເບ້ຍ​ໄມ້​ໄດ້ 9 ແສນ​ເບ້ຍ ໃນ​ນັ້ນ ການ​ຟື້ນ​ຟູ​ປ່າ​ຜະ­ລິດ​ແມ່ນ​ຈະ​ປູກ​ໄມ້​ທີ່​ຮັກ­ສາ​ຕົ້ນ​ນ້ຳ​ຢູ່ 4 ເມືອງ ຄື: ເມືອງ​ວຽງ​ທອງ, ເມືອງ​ບໍ​ລິ​ຄັນ, ເມືອງ​ປາກ​ກະ­ດິງ ແລະ​ເມືອງ​ປາກ​ຊັນ​ເປັນ­ຕົ້ນ​ເບ້ຍ​ໄມ້​ດູ, ໄມ້​ແຕ້​ຂ່າ, ໄມ້­ແຄນ​ເຮືອ ແລະ​ໄມ້​ແຕ້​ຮໍ ເປັນ­ຕົ້ນ.

ສະ­ເພາະ​ໃນ​ວັນ​ທີ 1 ມິ­ຖຸ­ນາ​ນີ້ແມ່ນ​ຈະ​ປູກ​ເບ້ຍ​ໄມ້​ປະ­ດັບ​ຕົວ​ເມືອງ​ເປັນ­ຕົ້ນ​ໄມ້​ກາ­ກະ­ເລົາ, ໄມ້​ຄູນ ແລະ​ໄມ້​ຝາງ​ແດງ ຈະ​ປູກ​ໃນ​ຂອບ​ເຂດ​ເທ­ສະບານ​ແຂວງ ແລະ​ຕາມ​ພະ­ແນກ­ການ​ຕ່າງໆ​ເພື່ອ​ເປັນ​ການ​ສ້າງ​ໃຫ້​ຕົວ​ເມືອງ​ເປັນ​ສີ­ຂຽວ​ໃນ​ປີ 2020.

ທີ່ມາ: