ໃນວັນທີ 23 ພຶດສະພາ 2016, ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ພົນເອກ ໂງ ຊວນ ລິກ ລັດຖະມົນຕີກະຊວງປ້ອງກັນປະເທດ ສາທາລະນະລັດ ສັງຄົມນິຍົມຫວຽດນາມ ພ້ອມດ້ວຍຄະນະ ຢູ່ທຳນຽບປະທານປະເທດ ນະຄອນຫລວງວຽງຈັນ, ໂອກາດເດີນທາງຢ້ຽມຢາມ ສປປ ລາວຢ່າງເປັນທາງການ ແລະ ເຂົ້າຮ່ວມກອງປະຊຸມປ້ອງກັນປະເທດອາຊຽນ ທີ່ ສປປ ລາວ ເປັນເຈົ້າພາບຈັດຂຶ້ນແຕ່ວັນທີ 25-26 ພຶດສະພານີ້.
ໂອກາດນີ້ ທ່ານ ປະທານປະເທດ ບຸນຍັງ ວໍລະຈິດ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ການຢ້ຽມຢາມ ແລະ ເຂົ້າຮ່ວມກອງປະຊຸມຄັ້ງສຳຄັນຂອງອາຊຽນ ຂອງທ່ານ ພົນເອກ ໂງ ຊວນ ລິກ ແລະ ຄະນະ ໃນຄັ້ງນີ້ ເຊິ່ງເປັນການປະກອບສ່ວນເຂົ້າໃນການເສີມຂະຫຍາຍ ສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ຈະເລີນງອກງາມຍິ່ງໆຂຶ້ນ. ພ້ອມທັງເຊື່ອໝັ້ນວ່າ ຂອບການຮ່ວມມືຂອງອາຊຽນ ໂດຍສະເພາະວຽກງານຄວາມໝັ້ນຄົງ ຈະໄດ້ຮັບການພັດທະນາຍົກລະດັບໃຫ້ດີຂຶ້ນເລື້ອຍໆ.
ທ່ານ ພົນເອກ ໂງ ຊວນ ລິກ ກໍໄດ້ສະແດງຄວາມຂອບໃຈ ຕໍ່ທ່ານ ປະທານປະເທດ ບຸນຍັງ ວໍລະຈິດ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ຕໍ່ການຢ້ຽມຢາມສປປ ລາວ ຂອງຄະນະຜູ້ແທນກະຊວງປ້ອງກັນປະເທດໃນຄັ້ງນີ້ດ້ວຍ
ຂ່າວຈາກ: ສຳນັກຂ່າວສານປະເທດລາວ