ສຳນັກຂ່າວຕ່າງປະເທດລາຍງານຈາກນະຄອນຫຼວງໄຄໂຣ ປະເທດອີຢິບ ເມື່ອວັນທີ 21 ພຶດສະພານີ້ ວ່າ ຖະແຫຼງການຂອງກອງທັບອີຢິບແຈ້ງຄວາມຄືບໜ້າຂອງປະຕິບັດການຄົ້ນຫາ ແລະ ກູ້ຊາກເຮືອບິນ ລຸ່ນ ແອບັສ 320 ຂອງອີຢິບແອຣ ຖ້ຽວບິນ ເອັມເອສ 804 ເຊິ່ງຕົກທາງຕອນໃຕ້ຂອງທະເລເມດີເຕີເຣນຽນ ໃນທີ່ສຸດກອງທັບອີຢິບໄດ້ພົບສິ້ນສ່ວນຂອງເຮືອບິນໂດຍສານລຳນີ້ ບໍລິເວນນອກຊາຍຝັ່ງທາງຕອນເໜືອຂອງເມືອງ ອາເລັກຊານເດຣຍໄປປະມານ 290 ກິໂລແມັດ ອີກທັງພົບບ່ອນນັ່ງຜູ້ໂດຍສານ ແລະ ກະເປົາສຳພາລະ ຮວມໄປເຖິງສິ້ນສ່ວນສົບທີ່ເຊື່ອວ່າເປັນຜູ້ໂດຍສານອີກດ້ວຍ ເຊິ່ງໃນຂະນະນີ້ເຈົ້າໜ້າທີ່ຈາກນານາຊາດໄດ້ເລັ່ງກະຈາຍກຳລັງອອກຄົ້ນຫາກ່ອງບັນທຶກການບິນໃນບໍລິເວນດັ່ງກ່າວ ເພື່ອຫາສາເຫດຂອງເຮືອບິນຕົກໃນຄັ້ງນີ້.

ລາຍງນລະບຸວ່າ ເຮືອບິນລຳນີ້ໜ້າຈະປ່ຽນທິດທາງ ກ່ອນຕົກລົງສູ່ທະເລ ເພາະຈາກຂໍ້ມູນເທິງຈໍເຣດາ ສະແດງໃຫ້ເຫັນວ່າເຮືອບິນລຳດັ່ງກ່າວໄດ້ຫັກລ້ຽວກະທັນຫັນ 2 ຄັ້ງ ຄື: ລ້ຽວຊ້າຍ 90 ອົງສາ ແລະ ຫັກລ້ຽວແບບ 360 ອົງສາ ກ່ອນຈະຫຼຸດລະດັບການບິນລົງ ແລະ ຕົກລົງສູ່ທະເລ.

ປະທານາທິບໍດີ ອັບເດລ ຟັດຕາ ເອລ-ຊີຊີ ຜູ້ນຳອີຢິບ ໄດ້ອອກຖະແຫຼງການສະແດງຄວາມເສຍໃຈ ກັບຄອບຄົວຂອງຜູ້ໂດຍສານ ແລະ ລູກເຮືອ ທັງໝົດ 66 ຄົນ ໃນທ້ຽວບິນນີ້ ເຊັ່ນດຽວກັບສາຍການບິນອີຢິບແອຣ ທີ່ຂຽນຂໍ້ຄວາມສະແດງຄວາມເສຍໃຈກັບເຫດການທີ່ເກີດຂຶ້ນ ຂະນະທີ່ຊາວອີຢິບ ເຊິ່ງມີທັງຄອບຄົວ ແລະ ເພື່ອນຂອງຜູ້ເສຍຊີວິດ ມາຮວມຕົວກັນທີ່ມັດສະຢິບ ໃນນະຄອນຫຼວງໄຄໂຣ ເພື່ອສວດມົນ ແລະ ໄວ້ອາໄລ

ດ້ານລັດຖະມົນຕີກະຊວງການຕ່າງປະເທດຂອງຝຣັ່ງ ໄດ້ກ່າວວ່າ ຝຣັ່ງພ້ອມທີ່ຈະເຮັດວຽກຮ່ວມກັບອີຢິບຢ່າງເຕັມທີ່ ເພື່ອສອບສວນສາເຫດ ເນື່ອງຈາກມີປະຊາຊົນຝຣັ່ງເສຍຊີວິດຢູ່ໃນທ້ຽວບິນນີ້ເຖິງ 15 ສົບ ເຊິ່ງໃນຂະນະນີ້ຍັງບໍ່ມີການສະຫຼຸບທີ່ຊັດເຈນ ແລະ ເຖິງແມ່ນວ່າກ່ອນໜ້ານີ້ລັດຖະມົນຕີການບິນພົນລະເຮືອນຂອງອີຢິບ ຈະເປີດເຜີຍກັບສື່ຂ່າວວ່າ ມີຄວາມເປັນໄປໄດ້ສູງທີ່ອາດເກີດຈາກການກໍ່ກາຍຮ້າຍ ຫຼາຍກ່ວາປະສົບອຸບັດຕິເຫດ ຫຼື ຄວາມຜິດພາດທາງເທັກນິກ ແຕ່ກໍ່ຢັງບໍ່ມີຫຼັກຖານຢືນຢັນ ຮວມໄປເຖິງຍັງບໍ່ມີກຸ່ມກໍ່ການຮ້າຍໃດອອກມາຍອມຮັບວ່າເປັນຜູ້ຢູ່ເບື້ອງຫຼັງ ເຫດເຮືອບິນຕົກໃນຄັ້ງນີ້

ທີ່ມາ: http://www.krobkruakao.com/