ລ້ານຊ້າງ ຢູໄນເຕັດ ຮອງແຊັມເກົ່າ ລາວພຣີເມຍລີກ 2015 ກັບມາສ້າງຄວາມຕື່ນຕາອີກຄັ້ງດ້ວຍການດຶງ ທ່ານ ລີໂອນາໂດ ວິໂຕຣິໂນ (LEONARDO VITORINO) ຄູເຝິກຊາວບຣາຊິນ ອະດີດຄູຝຶກສະໂມສອນ ບູຣີຣຳ ຢູໄນເຕັດ ແຊັມ 5 ລາຍການຈາກປະເທດໄທ ເມື່ອລະດູການຜ່ານມາ ມາຄຸມທີມແທນ ທ່ານ ເດວິດ ບູດ ອະດີດຄູຝຶກ ທີ່ຜົນງານຫຼຸດມາດຕະຖານ ຫຼັງປະກາດແຍກທາງກັນຢ່າງເປັນທາງການ ເພື່ອສືບຕໍ່ລຸຍການແຂ່ງຂັນເຕະບານ ລາວພຣີເມຍລີກ 2016.
ອີງຕາມຂໍ້ມູນຈາກເວັບໄຊ ສະໂມສອນ ລ້ານຊ້າງ ຢູໄນເຕັດ ລາຍງານເມື່ອທ້າຍອາທິດທີ່ຜ່ານມາວ່າ: ລ້ານຊ້າງ ຢູໄນເຕັດ ໄດ້ແຍກທາງກັບ ທ່ານ ເດວິດ ບູດ ຄູເຝິກຊາວອັງກິດ ເປັນທີ່ຮຽບຮ້ອຍ ຫຼັງຈາກລົງ ຄຸມທີມລົງສະໜາມໄດ້ພຽງ 6 ນັດ ແລະ ຜົນງານອອກມາກໍ່ໜ້າຜິດຫວັງໃນ 2 ນັດລ່າສຸດຈົນເປັນສາເຫດໃຫ້ຄູ່ຝຶກຊາວອັງກິດ ຕ້ອງລາອອກຈາກຕໍາແໜ່ງດັ່ງກ່າວ ແລະ ລ່າສຸດ ທ່ານ ລີໂອນາໂດ ວິໂຕຣິໂນ ຄູເຝິກຊາວບຣາຊິລ ອະດີດຄູເຝິກສະໂມສອນ ບູຣີຣຳ ຢູໄນເຕັດ ທີມຍັກໃຫຍ່ບານເຕະໃນ ໄທພຣີເມຍລີກ ເຂົ້າມາຮັບໜ້າທີ່ແທນ ເພື່ອສືບຕໍ່ລ່າແຊັມ ລາວພຣີເມຍລີກ ລະດູການ 2016 ດ້ວຍສັນຍາຈົນຈົບລະດູການນີ້.
ຮູບຈາກ Facebook: Lanexang UTD
ຂ່າວຈາກ: ຂ່າວເສດຖະກິດ-ການຄ້າ