ເພື່ອເປັນການປະກອບສ່ວນເຂົ້າໃນການຈັດ ງານລາງວັນທຸລະກິດອາຊຽນດີເດັ່ນຂອງ ສປປ.ລາວ ເຊິ່ງຈະຈັດຂຶ້ນໃນວັນທີ 19 ກໍລະກົດ 2016 ທີ່ນະຄອນຫຼວງວຽງຈັນ ໂດຍຈະມີການປະກາດຜົນຜູ້ຊະນະເລີດທຸລະກິດດີເດັ່ນໃນຫຼາຍຂະແໜງການ ເຊັ່ນ ລາງວັນທຸລະກິດດີເດັ່ນ 40 ປີ ລາງວັນທຸລະກິດຂະໜາດນ້ອຍ-ຂະໜາດກາງດີເດັ່ນ ລາງວັນທຸລະກິດບູລິມະສິດດີເດັ່ນຂອງ ສປປ.ລາວ ລາງວັນທຸລະກິດໜຸ່ມປະຈໍາປີ ລາງວັນທຸລະກິດຍິງດີເດັ່ນປະຈໍາປີ ແລະ ລາງວັນອື່ນໆຫຼາກຫຼາຍລາງວັນ.

ໃນຕອນເຊົ້າວັນທີ 19 ພຶດສະພາ 2016 ທີ່ສະພາການຄ້າ ແລະ ອຸດສາຫະກໍາແຫ່ງຊາດລາວ ໄດ້ມີພິທີມອບ-ຮັບທຶນສະໜັບສະໜູນຈາກຫຼາຍພາກສ່ວນຫົວໜ່ວຍທຸລະກິດເຊັ່ນ ກຸ່ມບໍລິສັດຄໍາໄພຊະນະກໍ່ສ້າງ ມອບເງິນຈໍານວນ 80 ລ້ານກີບ ເຊິ່ງມອບໂດຍທ່ານ ຄໍາໄພ ສົມຊະນະ ປະທານກຸ່ມບໍລິສັດຄໍາໄພຊະນະກໍ່ສ້າງ ກຸ່ມບໍລິສັດຄູນໄຊພັດທະນາ ມອບເງິນຈໍານວນ 40.500.000 ກີບ ມອບໂດຍທ່ານ ເຄນຄໍາ ສີລາຊາ ປະທານກຸ່ມບໍລິສັດຄູນໄຊພັດທະນາ ກຸ່ມບໍລິສັດລາວເວີນກຣຸບມະຫາຊົນ ມອບເງິນຈໍານວນ 40.500.000 ກີບ ມອບໂດຍທ່ານ ວິສັນ ນະລົງສັກ ຜູ້ອໍານວຍການບໍລິສັດລາວເວີນມະຫາຊົນ ກຸ່ມບໍລິສັດດີເອັມ (DM) ກໍ່ສ້າງ ແລະ ການຄ້າ ມອບເງິນຈໍານວນ 24.300.000 ກີບ ຕາງໜ້າມອບໂດຍທ່ານນາງ ດວງມາລາ ມາດມະນີສອນ ກຸ່ມບໍລິສັດທີເຄກຣຸບ (TK) ມອບເງິນຈໍານວນ 12.215.000 ກີບ ຕາງໜ້າມອບໂດຍທ່ານ ລິນທອງ ເດືອນມະນີ ຜູ້ຈັດການທົ່ວໄປບໍລິສັດທີເຄກຣຸບ ແລະ ທະນາຄານເອສທີແບັງກຣຸບ ມອບເງິນຈໍານວນ 12.215.000 ກີບ .

ຂ່າວ/ພາບ: ເທບພະວົງ