ມື້ວານຕອນແລງ (20 ພຶດສະພາ 2016) ດຣ ເພັດ ພົມພິທັກ ລັດຖະມົນຕີ ຫົວໜ້າຫ້ອງວ່າການສຳນັກງານນາຍົກ ໄດ້ອອກແຈ້ງການດ່ວນທີ່ສຸດ ເຖິງບັນດາເຈົ້າແຂວງພາກເໜືອແລະພາກກາງ ຈຳນວນ 11 ແຂວງ ແຕ່ຜົ້ງສາລີ ລົງໄປເຖິງ ແຂວງຄຳມ່ວນ ເລື່ອງໃຫ້ມີສະຕິຮັບມືກັບພາຍຸ ໄຊໂຄນ ໂຣອານຸ ທີ່ຈະພັດຜ່ານປະເທດລາວໃນລະຫວ່າງວັນທີ 21-24 ພຶດສະພານີ້.
ໂດຍເນື້ອໃນລະບຸວ່າ: ຫ້ອງວ່າການສຳນັກງານນາຍົກລັດຖະມົນຕີ ຂໍຖືເປັນກຽດແຈ້ງມາທ່ານຊາບວ່າ ປັດຈຸບັນພາຍຸໄຊໂຄຣນ ໂຣອານຸ ເຊິ່ງມີຈຸດສູນກາງຢູ່ອ່າວເບັງການ ແລະກຳລັງເຄື່ອນທີ່ໄປທາງທິດຕາເວັນອອກສ່ຽງເໜືອ ດ້ວຍຄວາມໄວ 14 ກິໂລແມັດ ລຽບແຄມຝັ່ງຕາເວັນອອກຂອງປະເທດອິນເດຍ, ພາຍຸຫົວນີ້ຈະເຄື່ອນຂຶ້ນຝັ່ງບັງກະລາເທດແລະມຽນມາໃນຄືນວັນທີ 21 ພຶດສະພາ 2016. ຕະຫຼອດໄລຍະການເຄື່ອນທີ່ຂອງພາຍຸດັ່ງກ່າວ ຈະເຮັດໃຫ້ກະແສລົມມໍລະສູມຕາເວັນຕົກສ່ຽງໃຕ້ພັດປົກຄຸມ ສປປ ລາວ ດ້ວຍກຳລັງແຮງ ເຊິ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫຼື້ອມ ແລະລົມພັດແຮງ ຢູ່ບັນດາແຂວງພາກເໜືອຫາພາກກາງ ໃນວັນທີ 21-24 ພຶດສະພາ 2016.
ດັ່ງນັ້ນ, ຈຶ່ງແຈ້ງການເຕືອນມາຍັງພໍ່ແມ່ນປະຊາຊົນ ແລະອຳນາດການປົກຄອງທ້ອງຖິ່ນ ແຂວງຜົ້ງສາລີ, ອຸດົມໄຊ, ບໍ່ແກ້ວ, ຫຼວງນ້ຳທາ, ຫຼວງພະບາງ, ໄຊຍະບູລີ, ວຽງຈັນ, ໄຊສົມບູນ, ນະຄອນຫຼວງວຽງຈັນ, ບໍລິຄຳໄຊ ແລະຄຳມ່ວນ ຈົ່ງໄດ້ມີສະຕິຮັບມືຕໍ່ສະພາບ ຝົນຕົກ, ຟ້າຮ້ອງ, ຟ້າຜ່າ, ລົມແຮງ, ດິນເຈື່ອນ, ນ້ຳປ່າໄຫຼຊຸ, ຕົ້ນໄມ້ຫັກ ແລະບ້ານເຮືອນເປ່ເພ.
