ວັນທີ 18 ພຶດສະພາ 2016 ນີ້,ແຂວງຫົວພັນໄດ້ຈັດພິທີເປີດການກໍ່ສ້າງໂຮງຮຽນສົງຢູ່ສະຖານທີ່ວັດອົງຕື້ສີບຸນເຮືອງ ໂດຍການເຂົ້າຮ່ວມຂອງທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການເລຂາທິການສູນກາງພັກ, ຮອງປະທານປະເທດແຫ່ງສາທາລະນະລັດ ປະຊາທິປະໄຕ ປະຊາຊົນລາວ, ທ່ານ ວັນໄຊ ແພງຊຸມມາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆຫົວພັນ, ມີບັນດາທ່ານການນຳຂັ້ນແຂວງ, ເມືອງຊຳເໜືອ ພ້ອມດ້ວຍມວນຊົນ ແລະນ້ອງນັກ ຮຽນເຂົ້າຮ່ວມຢ່າງພ້ອມພຽງ.
ໂຮງຮຽນສົງຫຼັງນີ້ຈະສ້າງເປັນຕຶກ ອາຄານ 2 ຊັ້ນ, ປະກອບມີ 8 ຫ້ອງຮຽນໂດຍແມ່ນທ່ານ ພັນຄຳ ວິພາວັນ ອົງການພຸດທະສາສະໜາສຳພັນຂັ້ນສູນກາງ, ການນຳຂັ້ນແຂວງ, ການນຳເມືອງຊຳເໜືອ, ອົງການພຸດທະສາສະໜາສຳພັນແຂວງຫົວພັນ, ທ່ານ ເພັດ ພົມພິພັກ ທີ່ຕາງໜ້າຜູ້ທີ່ມີຈິດໃຈປະກອບສ່ວນດ້ານທຶນຮອນໂດຍບໍລິສັດແສງທອງກໍ່ສ້າງເປັນຜູ້ຮັບເໝົາກໍ່ສ້າງພ້ອມດ້ວຍປະຊາຊົນບັນດາເຜົ່າແຂວງຫົວພັນ ແລະຕ່າງແຂວງ, ພິເສດແມ່ນອົງການສົງເກົາຫຼີທີ່ໄດ້ພ້ອມກັນປະກອບທຶນຮອນ, ເຫື່ອແຮງຮ່ວມກັນເປັນເຈົ້າສັດທາ, ລວມມູນຄ່າການກໍ່ສ້າງທັງໝົດ 2 ຕື້ກວ່າກີບ.
ຈຸດປະສົງຂອງການກໍ່ສ້າງໂຮງຮຽນດັ່ງກ່າວກໍເພື່ອໃຫ້ລູກຫຼານຂອງຊາວແຂວງຫົວພັນຮ່ຳຮຽນຫຼັກທຳຄຳສອນຂອງພະພຸດທະເຈົ້າ ແລະການສຶກ ສາສາຍສາມັນນັບແຕ່ ມ.5 ເຖິງ ມ.7 ເພື່ອຝຶກຝົນໃຫ້ຢູ່ໃນສິນກິນໃນທຳກາຍເປັນຜູ້ສືບທອດທາງພຸດທະສາສະໜາ, ເປັນຄົນທີ່ມີຄວາມຮູ້ດ້ານການສຶກສາ ແລະ ເປັນຄົນດີຂອງຊາດໃນອະນາຄົດເພື່ອປົກປັກຮັກສາ ແລະເສີມຂະຫຍາຍວັດທະນະທຳ ແລະຮີດຄອງປະເພນີອັນດີງາມຂອງຊາດລາວເຮົາໄວ້ໃຫ້ຍືນຍົງຄຽງຄູ່ກັບຄົນລາວຕະຫຼອດໄປໃນຕອນທ້າຍການນຳຂັ້ນສູນກາງ, ຂັ້ນແຂວງ ແລະເມືອງຊຳເໜືອກໍໄດ້ພ້ອມກັນປຸກເສົາຕົ້ນເພື່ອເປັນສິຣິມຸງຄຸນໃຫ້ແກ່ການກໍ່ສ້າງໂຮງຮຽນຫຼັງນີ້ອີກດ້ວຍ.
ທີ່ມາ: