ຊາວກະສິກອນໃນທົ່ວແຂວງຄຳມ່ວນພວມຂຸ້ນຂ້ຽວເກັບກ່ຽວເຂົ້ານາແຊງ ສົກປີ 2013-2014 ໃນເນື້ອທີ່ 8.950 ເຮັກຕາ ປະຈຸບັນເກັບກ່ຽວໄດ້ແລ້ວ 6,1 ເຮັກຕາ ເທົ່າກັບ 67% ຂອງເນື້ອທີ່ແຜນການ.
ທ່ານ ເພັດສະໄໝ ພະບໍລິບູນ ຫົວໜ້າຂະແໜງປູກຝັງ ພະແນກກະສິກຳ ແລະ ປ່າໄມ້ປະຈຳແຂວງຄຳມ່ວນ ລາຍງານຕໍ່ນັກຂ່າວທ້ອງຖິ່ນໃນວັນທີ 21 ພຶດສະພາ 2014 ໃຫ້ຮູ້ວ່າ: ຊາວກະສິກອນໃນທົ່ວແຂວງຄຳມ່ວນໄດ້ເລີ້ມລົງມືເກັບກ່ຽວເຂົ້ານາແຊງໃນວັນທີ 5 ພຶດສະພາ 2014 ໃນເນື້ອທີ່ປັກດຳຕົວຈິງ 8.950 ເຮັກຕາ. ມາຮອດປະຈຸບັນເກັບກ່ຽວໄດ້ແລ້ວ 6 ພັນກວ່າເຮັກຕາ ເທົ່າກັບ 67% ຂອງເນື້ອທີ່ປັກດຳຕົວຈິງ, ສະເລ່ຍສະມັດຕະພາບ 5,5 ໂຕນຕໍ່ເຮັກຕາ ສຳລັບເມືອງທີ່ເກັບກ່ຽວສຳເລັດ 100% ມີເມືອງທ່າແຂກ, ຍົມມະລາດ ແລະ ຄູນຄຳ ສ່ວນເມືອງທີ່ຍັງເຫຼືອແມ່ນຄາດວ່າຈະໃຫ້ສຳເລັດໃນຕົ້ນເດືອນມິຖຸນານີ້. ສຳລັບການຜະລິດເຂົ້ານາປີ 2014 ຕາມແຜນການຄາດຄະເນເນື້ອທີ່ເຂົ້ານາປີທົ່ວແຂວງໃຫ້ໄດ້ 66.320 ເຮັກຕາ, ຄາດຄະເນສະມັດຕະພາບ 3,92 ໂຕນຕໍ່ເຮັກຕາ ແລະ ຜົນຜະລິດ 259.990 ໂຕນ ປະຈຸບັນທາງຂະແໜງການທີ່ກ່ຽວຂ້ອງໄດ້ຈັດສົ່ງພະນັກງານລົງຊຸກຍູ້ ໃຫ້ປະຊາຊົນເອົາໃຈໃສ່ໃນການກະກຽມແນວພັນເຂົ້າ, ໃສ່ຝຸ່ນຊີວະພາບ ລວມໄປເຖິງເຕັກນິກໃໝ່ໆເຂົ້າໃນການປັກດຳ ແລະ ການບົວລະບັດຮັກສາ. ເນື້ອທີ່ປູກພືດສຳຮອງໃນລະດູຝົນ 3.600 ເຮັກຕາ, ຜົນຜະລິດ 12,598 ໂຕນ. ປະຈຸບັນປະຕິບັດໄດ້ 256 ເຮັກຕາ ເທົ່າກັບ 7%.
ທີ່ມາ http://www.khammouanenews.com/khao/nalak/2630