1.ເປັນຫຍັງໄມ້ຈິ່ງແພງຂຶ້ນນັບມື້?
2.ເປັນຫຍັງຜູ້ພັດທະນາຈຳນວນໜຶ່ງຈິ່ງເລັ່ງສຳປະທານດິນບ່ອນປ່າດົງດິບ?
3.ເປັນຫຍັງນັກລົງທຶນບາງລາຍຈິ່ງເວົ້າແຕ່ການປູກຕົ້ນໄມ້ອຸດສາຫະກຳແບບໄຮ້ຈຸດໝາຍ ແລະ ໄຮ້ຜົນຕອບແທນ?
3 ຄຳຖາມຍອດໂດ່ງດັງ ແລະ ຮ້ອນໆຈາກໃນຊອງຈົດໝາຍຂອງປະຊາຊົນມີຄຳຕອບດັ່ງນີ້:

1.ຖ້າເບິ່ງຢ້ອນກັບຄືນປີ 2008 ປະເທດຈີນເປັນເຈົ້າພາບງານກິລາໂອລິມປິກ ເວລານັ້ນໄມ້ເນື້ອແຂງໂດຍສະເພາະໄມ້ດູ່ລາຍມີລາຄາໃນທ້ອງຕະຫລາດປະມານ 3.000-7.000 ໂດລາສະຫະລັດຕໍ່ແມັດກ້ອນເພື່ອນຳໄປປັບປຸງ ແລະ ປົວແປງພະລາດສະວັງເກົ່າແກ່ຕ້ອນຮັບໂອລິມປິກ

-ປະເດັນທີ 2 ປະເທດຈີນ, ເອີຣົບ ແລະ ອາເມລິກາພວມນິຍົມເຄື່ອງອຸປະກອນເຟີນີເຈີ ແລະ ຕົບແຕ່ງພາຍໃນເຮືອນ, ສຳນັກງານ ແລະ ອື່ນໆໂດຍໄມ້ເນື້ອແຂງເຊັ່ນໄມ້ດູ່ລາຍ, ໄມ້ດູ່ ແລະ ອື່ນໆ ບາງປະເທດກໍຖືວ່າການມີເຄື່ອງປະດັບເອ້ຢ້ອງພາຍໃນເຮືອນດ້ວຍໄມ້ດູ່ລາຍຈະເປັນໂຊກລາບ ແລະ ມີອຳນາດ
-ປະເດັນທີ 3: ຄວາມຕອ້ງການທີ່ສູງໃນທ້ອງຕະຫລາດ ແລະ ໄມ້ບົກແຫ້ງລົງນັບມື້ເຮັດໃຫ້ມີບາງກຸ່ມນັກລົງທຶນ ແລະ ຄົນຕ່າງປະເທດຫລັ່ງໄຫລເຂົ້າມາລາວດ້ວຍຫລາຍຮູບຫລາຍແບບເພື່ອຊອກສະແຫວງຫາໄມ້ສົ່ງອອກແບບຜິດກົດໝາຍ ແລະ ສວຍໂອກາດຊ່ອງວ່າງກົດໝາຍ
-ປະເດັນທີ 4: ການເຂົ້າມາຂອງນັກລົງທຶນມີລັກສະນະແບບໃຊ້ວິທີຫລາຍຢ່າງເປັນຕົ້ນ: ເຂົ້າມາໃນເບື້ອງຕົ້ນມາຄ້າມາຂາຍ ແລະ ເຮັດທຸລະກິດນ້ອຍໆເພື່ອມາສັງເກດການ ຫລື ຊອກຫາຊ່ອງທາງ ຫລັງຈາກນັ້ນຕີໂຕສະໜິດສະໜົມກັບເຈົ້າໜ້າທີ່ບາງລາຍ ແລະ ປະຊາຊົນຈຳນວນໜຶ່ງເພື່ອຮ່ວມທຸລະກິດກັນແບບ 70% ແລະ 30% ແຕ່ຕ້ອງອາໄສຄົນພາຍໃນເປັນຜູ້ເບີກທາງໃຫ້ໃນການສົ່ງອອກໄປປະເທດທີ 2 ເພື່ອປັບແຕ່ງ ແລະ ເຮັດເຟີນີເຈີສົ່ງອອກຂາຍຕ່າງປະເທດ ແລະ ປະເທດທີ 3 ຈາກຂໍ້ມູນເບື້ອງຕົ້ນທີ່ມີການລາຍງານຜ່ານອິນເຕີເນັດ ແລະ ແຫລ່ງມູນຕ່າງໆພົບວ່າມີບາງປະເທດນຳເອົາໄມ້ຈາກລາວໄປຂາຍໃຫ້ຕ່າງປະເທດມູນຄ່າປະມານ 9 ຕື້ໂດລາຕໍ່ປີ ແຕ່ຜູ້ຊື້ບໍ່ໄດ້ຮັບຮູ້ວ່າແຫລ່ງທີ່ມາວັດຖຸດິບແມ່ນມາຈາກໃສ່ກັນແທ້
-ປະເດັນທີ 5: ການເຂົ້າມາຂອງບາງກຸ່ມນັກລົງທຶນມີລັກສະນະດັ່ງນີ້: ມັກອ້າງວ່າຈະປູກໄມ້ອຸດສາຫະກຳ ແລະ ຂໍສຳປະທານເນື້ອທີ່ດິນກວ້າງໃຫຍ່ໄພສານໂດຍມີຊັບພະຍາກອນບໍ່ແຮ່ ແລະ ປ່າໄມ້ເປັນໂຕເດີນເກມ ຫລື ເອີ້ນວ່າຖານສ້າງລາຍໄດ້ໃຫຍ່ທີ່ສຸດ ຖ້າໃຫ້ເບິ່ງລົງໄປເລີກໆຄ້າຍກັບວ່າເຂົາເຈົ້າເຮັດແທ້ທຳຈິງ ແລະ ມີບາງແອບແຝງທີ່ບໍ່ສາມາດຮູ້ທັນຍົກຕົວໂຄງການປູກຕົ້ນຢາງພາລາກໍແມ່ນຮູບການໜຶ່ງ, ໂຄງການປູກໄມ້ເກດສະໜາກໍຮູ້ການໜຶ່ງ ແຕ່ສຸດທ້າຍຫລົ້ມສະຫລາຍ ຫລື ກາຍເປັນໂຄງການຂີ້ຕົວເພາະປະຊາຊົນສ່ວນໃຫຍ່ໄດ້ທຳລາຍເນື້ອທີ່ການຜະລິດ ແລະ ປ່າໄມ້ຈຳນວນໜຶ່ງໝົດແລ້ວເພື່ອມາປູກຕົ້ນໄມ້ດັ່ງກ່າວ ຕໍ່ມາເມື່ອຕົ້ນຢາງພາລາໃຫຍ່ພົບວ່ານ້ຳຢາງພາລາຫລຸດລົງຈາກ 17.000 ກີບຕໍ່ກິໂລມາເປັນ 3.000 ກີບຕໍ່ກິໂລ ປັດຈຸບັນປະຊາຊົນເບື່ອໜ່າຍແຮງ ແລະ ພາກັນຕົ້ນຢາງພາລາຖິ້ມເກືອບໝົດ

ວິທີຊອກທາງອອກເພື່ອຢຸດບັນຫາດັ່ງກ່າວ: ຂໍໃຫ້ປະຕິບັດຕາມຄຳສັງຂອງທ່ານນາຍົກລັດຖະມົນຕີສະບັບເລກທີ 15/ນຍລົງວັນທີ 13 ພຶດສະພາ 2016ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້,ເຄື່ອນຍ້າຍໄມ້ ແລະ ທຸລະກິດໄມ້ ເຊິ່ງລາຍລະອຽດໄດ້ນຳສະເໜີແລ້ວ
-ຕ້ອງສ້າງຕັ້ງໂຮງງານເອງ ແລະ ຜະລິດເອງເພື່ອສົ່ງອອກເອົາເງິນຕາຕ່າງປະເທດເຂົ້າມາພັດທະນາປະເທດຊາດໃຫ້ຈະເລີນຮຸ່ງເຮືອງໂດຍມີການແບ່ງສັນປັນສ່ວນໃຫ້ແທດເໝາະວ່າອັນໃດຄວນສະຫງວນໄວ້ ແລະ ອັນໃດຄວນສົ່ງອອກ ລວມທັງປູກທົດແທນ
-ພະນັກງານກ່ຽວຂ້ອງ ແລະ ປະຊາຊົນຕ້ອງຫລຸດຜ່ອນຄວາມຍາກລົງແລ້ວເບິ່ງໄປຂ້າງໜ້າເພື່ອຜົນປະໂຫຍດສ່ວນລວມໃຫ້ຫລາຍຂຶ້ນ ເປັນເຈົ້າການຕິດຕາມກວດກາ ແລະ ສ່ອງສອດເປັນຫູເປັນຕາ
-ຖ້າລະບຽບ ແລະ ກົດໝາຍລະບຸໄວ້ໃຫ້ປະຕິບັດແນວໃດກໍຕ້ອງເຮັດຕາມນັ້ນຢ່າງເດັດຂາດ ບໍ່ມີການປ່ຽນແປງ

ຂ່າວຈາກ: ສຳນັກຂ່າວສານປະເທດລາວ