ຜົນການສຶກສາຂອງສະມາຄົມອາຊີ ແລະ ກຸ່ມທີ່ປຶກສາໂຮເຊັນລະບຸວ່າ ປີທີ່ຜ່ານມາຊາວຈີນເປັນຊາວຕ່າງປະເທດທີ່ຊື້ເຮືອນໃນສະຫະລັດລາຍໃຫຍ່ທີ່ສຸດ ໂດຍໄດ້ເງິນທຶນຈຳນວນຫຼາຍຊື້ອະສັງຫາລິມະຊັບໃນສະຫະລັດເປັນສິນຊັບປອດໄພນອກປະເທດ.
ຜົນການສຶກສາພົບວ່າ ຊ່ວງ 5 ປີທີ່ຜ່ານມາ ຊາວຈີນລົງທຶນຊື້ອະສັງຫາລິມະຊັບທັງທີ່ພັກອາໄສ ແລະ ດ້ານການຄ້າໃນສະຫະລັດລວມກວ່າ 110.000 ລ້ານໂດລາສະຫະລັດ ແລ້ວ ຊ່ວຍໃຫ້ຕະຫຼາດອະສັງຫາລິມະຊັບຂອງສະຫະລັດຟື້ນຕົວຈາກພາວະຕົກຕໍ່າທີ່ເລີ່ມຕັ້ງແຕ່ປີ 2006 ແລະ ທະລຸລົງເມື່ອເກີດວິກິດການເງິນໂລກໃນອີກ 2 ປີຖັດມາ ເຖິງວ່າທາງການຈີນຄວບຄຸມກະແສເງິນສົດໄຫຼອອກນອກປະເທດ ແຕ່ຄາດວ່າໄລຍະເຄິ່ງຫຼັງຂອງທົດສະວັດນີ້ຍອດເງິນລົງທຶນດັ່ງກ່າວຈະເພີ່ມຂຶ້ນສອງເທົ່າເປັນ 218.000 ລ້ານໂດລາສະຫະລັດ ການລົງທຶນຂອງຊາວຈີນມີປະລິມານສູງ ແລະ ກວມລວມອະສັງຫາລິມະຊັບທຸກປະເພດ.
ຜົນການສຶກສາລະບຸວ່າ ຊາວຈີນທຸ່ມຊື້ອະສັງຫາລິມະຊັບໃນສະຫະລັດຫຼາຍທີ່ສຸດໃນປີທີ່ຜ່ານມາ ແລະ ໂຄ່ນລົ້ມຊາວການາດາເຈົ້າຂອງຕຳແໜ່ງຊາວຕ່າງປະເທດທີ່ຊື້ເຮືອນໃນສະຫະລັດຫຼາຍທີ່ສຸດມາໂດຍຕະຫຼອດ ບໍລິເວນທີ່ຊາວຈີນຊື້ຫຼາຍທີ່ສຸດເປັນບ່ອນທີ່ມີລາຄາແພງທີ່ສຸດມີ ນິວຢອກ, ລອສແອນເຈລິສ, ຊານຟຣານຊິສໂກ ແລະ ຊີແອດເທິລ ນອກຈາກນີ້ ຍັງຊື້ໃນແຖວເມືອງຊິຄາໂກ ເມືອງໄມແອມີ ແລະ ລາສເວີກັສນຳ ເຮັດໃຫ້ເຮືອນທີ່ຊາວຈີນຊື້ມີລາຄາສະເລ່ຍແພງກວ່າຊາວຕ່າງປະເທດທັງໝົດທີ່ 832.000 ໂດລາສະຫະລັດ ຕໍ່ 499.600 ໂດລາສະຫະລັດ ຜູ້ຊື້ຊາວຈີນສ່ວນໃຫຍ່ເປັນບຸກຄົນ ບໍ່ແມ່ນບໍລິສັດ ສາເຫດທີ່ຕັດສິນໃຈຊື້ມີຫຼາກຫຼາຍ ມີທັງຊື້ເປັນແບບຫຼັງທີ 2 ຊື້ເພື່ອໃຫ້ໄດ້ຍ້າຍມາຢູ່ໃນສະຫະລັດດ້ວຍວິຊານັກລົງທຶນປະເພດ EB-5 ຊື້ເພື່ອລົງທຶນໄວ້ປ່ອຍເຊົ່າ ຫຼື ຂາຍຕໍ່ ສ່ວນປີທີ່ຜ່ານມາປັດໄຈຫຼັກມາຈາກຄວາມກັງວົນເລື່ອງຄ່າເງິນຢວນອ່ອນຄ່າຕໍ່ເນື່ອງ ຈິ່ງຕ້ອງການປ່ຽນໄປເປັນສິນຊັບສະກຸນເງິນໂດລາສະຫະລັດ.