ກອງທັບໄທໄດ້ປະກາດໃຊ້ກົດໄອຍະການເສິກ ໂດຍກ່າວວ່າຕົນໄດ້ດຳເນີນການດັ່ງກ່າວນີ້
“ເພື່ອຮັກສາຄວາມສະງົບແລະຄວາມເປັນລະບຽບຮຽບຮ້ອຍ” ຫລັງຈາກຫຼາຍໆເດືອນ
ທີ່ໄດ້ເກີດຄວາມຮຸນແຮງ ໃນການປະທ້ວງຕໍ່ຕ້ານລັດຖະບານ.
ໃນການປະກາດທາງໂທລະພາບໃນເຊົ້າວັນອັງຄານມື້ນີ້,ທ່ານນາຍພົນ ປຣະຍຸດ ຈັນໂອຊາ ກ່າວປ້ອງກັນ ກ່ຽວກັບການເຄື່ອນໄຫວນີ້ວ່າ ມັນຈຳເປັນເພື່ອແກ້ໄຂວິກິດການທາງການເມືອງຂອງປະເທດ.
ນາຍພົນ ປຣະຍຸດ ກ່າວວ່າ “ກອງທັບບົກນັ້ນ ໝຸ້ງຫວັງທີ່ຈະນຳພາຄວາມສະງົບ ຮຽບຮ້ອຍ ມາສູ່ບ້ານເມືອງ ອັນເປັນທີ່ຮັກຍິ່ງຂອງຄົນໄທທຸກຄົນໂດຍໄວທີ່ສຸດ ຂໍໃຫ້ທຸກພວກ ທຸກຝ່າຍນັ້ນ ຢຸດການເຄື່ອນໄຫວເພື່ອເຂົ້າສູ່ຂະບວນການໃນການແກ້ບັນຫາຂອງຊາດຢ່າງຢັ້ງຢືນ ໂດຍໄວ.
ອຳນາດຕາມຄວາມ..ໃນມາດຕາຕ່າງໆຂອງພະລາດຊະບັນຍັດ ກົດໄອຍະການເສິກ ພຸດທະສັກກະລາດ 2457 ນັ້ນ ຈະແຈ້ງໃຫ້ຊາບໂດຍທົ່ວກັນ ກະຂໍໃຫ້ປະຊາຊົນ ດຍທົ່ວໄປນັ້ນຢ່າຕື່ນຕົກໃຈ ຍັງຄົງທຳໜ້າທີ່ໄປຕາມປົກກະຕິ ທຸກປະການ.”
ນາຍພົນປຣະຍຸດ ໄດ້ພົບປະໃນວັນອັງຄານມື້ນີ້ ກັບພວກເຈົ້າໜ້າທີ່ອະວຸໂສຂອງຫຼາຍໆພະແນກການຂອງລັດຖະບານ.
ທ່ານຮຽກຮ້ອງໃຫ້ເປີດການເຈລະຈາລະຫວ່າງພັກຝ່າຍ ທີ່ເປັນປໍລະປັກ ແຕ່ກໍເວົ້າວ່າ ກົດໄອຍະການເສິກຈະມີຜົນບັງຄັບໃຊ້ຕໍ່ໄປ ຈົນກວ່າຈະມີການຟື້ນຟູກົດໝາຍແລະຄວາມ
ເປັນລະບຽບຮຽບຮ້ອຍແລ້ວ.
ກອງທັບໄທ ຊຶ່ງໄດ້ກໍ່ລັດຖະປະຫານ 11 ຄັ້ງ ໃນຮອບ 80 ປີທີ່ຜ່ານມານີ້ ໄດ້ປະຕິເສດວ່າ ຕົນບໍ່ໄດ້ເຂົ້າຍຶດເອົາອຳນາດແຕ່ຢ່າງໃດ. ມີນາຍທະຫານຊັ້ນຜູ້ໃຫຍ່ຫຼາຍໆທ່ານ ໄດ້ປະຕິເສດຢ່າງ
ແຂງຂັນວ່າ ບໍ່ໄດ້ມີການກໍ່ລັດຖະປະຫານໃດໆ.
ລັດຖະມົນຕີກະຊວງຍຸຕິທຳ ທ່ານໄຊກະເສີມ ນິຕິສິຣິ ໄດ້ບອກກັບບັນດານັກຂ່າວວ່າ ຄະນະລັດຖະບານຊົ່ວຄາວນັ້ນ ຍັງບໍລິຫານປະເທດຢູ່ ແລະຢືນຢັດວ່າການເຄື່ອນໄຫວ
ຂອງພວກທະຫານທີ່ວ່ານີ້ ແມ່ນພົວພັນກັບເລື່ອງຄວາມປອດໄພເທົ່ານັ້ນ.
ແຕ່ແນວໃດກໍ ຕາມສະມາຊິກຂອງລັດຖະບານຊົ່ວຄາວຮັກສາການ ກ່າວວ່າ ບໍ່ໄດ້ມີີການປຶກສາລ່ວງໜ້າກ່ອນການຕັດສິນໃຈ ກ່ຽວກັບການຈັດຕັ້ງປະຕິບັດກົດໄອຍະການເສິກ.
ເບິ່ງວີດີໂອ