ສຳນັກຂ່າວຕ່າງປະເທດ ລາຍງານໃນວັນທີ 12 ພຶດສະພາຜ່ານມານີ້ວ່າ ສະຫະລັດອາເມຣິກາ ແລະ ອົງການສົນທິສັນຍາ ປ້ອງກັນແອັດແລນຕິກເໜືອ ຫລື ນາໂຕ້ ໄດ້ປະກາດເລີ່ມເປີດນຳໃຊ້ ລະບົບປ້ອງກັນຂີປະນາວຸດ ມູນຄ່າ 800 ລ້ານໂດລາ ທີ່ຖານທັບອາກາດ ເດເວເຊລູ ທາງພາກໃຕ້ຂອງປະເທດຣູມານີ ໂດຍອ້າງວ່າ ເພື່ອປົກປ້ອງຕົນເອງ ແລະ ປະເທດເອີຣົບ ຈາກການຍິງຂີປະນາວຸດມາຈາກປະເທດຕ່າງໆ ໂດຍສະເພາະແມ່ນອີຣ່ານ.
ໃນຂະນະດຽວກັນ, ດ້ານເຈົ້າໜ້າທີ່ຂອງຣັດເຊຍ ໄດ້ອອກມາປະນາມການເຄື່ອນໄຫວດັ່ງກ່າວ ຂອງສະຫະລັດອາເມຣິກາ ແລະ ກຸ່ມນາໂຕ້ ໂດຍທ່ານ ດິມິທຣີ ເປສະຄອບ ໂຄສົກລັດຖະບານຣັດເຊຍ ໄດ້ອອກມາລະບຸວ່າ ຕາມຄວາມເຫັນຂອງຜູ້ຊ່ຽວຊານແລ້ວ ເຮັດໃຫ້ພວກເຮົາເຊື່ອວ່າ ການເປີດໃຊ້ງານ ລະບົບປ້ອງກັນຂີປະນາວຸດໃນຄັ້ງນີ້ ເປັນໄພຄຸກຄາມຢ່າງແທ້ຈິງ ຕໍ່ຄວາມໝັ້ນຄົງຂອງຣັດເຊຍ. ສ່ວນ ພົນເອກ ວະລາດີເມຍ ໂຄໂມເຢດອບ ປະທານກຳມາທິການປ້ອງກັນຊາດ ແຫ່ງ ສະພາດູມາ (ສະພາຜູ້ແທນປະຊາຊົນຣັດເຊຍ) ໄດ້ອອກມາລະບຸອີກວ່າ ພວກເຂົາໄດ້ຂະຫຍາຍແນວຍິງ ຊຶ່ງບໍ່ແມ່ນແຕ່ 100% ແຕ່ເປັນ 1000% ແມ່ນມີເປົ້າໝາຍທີ່ພວກເຮົາ ຊຶ່ງບໍ່ກ່ຽວກັບອີຣ່ານ ແຕ່ຫາກແມ່ນຣັດເຊຍ ແລະ ຂີດຄວາມສາມາດທາງນິວເຄລຍ ຂອງພວກເຮົາ.
ແນວໃດກໍຕາມ, ສະຫະລັດອາເມຣິກາ ຍັງຄົງເດີນໜ້າໂຄງການກໍ່ສ້າງ ລະບົບປ້ອງກັນຂີປະນາວຸດໃນທະວີບເອີຣົບ ຊຶ່ງໄດ້ມີການວາງແຜນມາແຕ່ດົນນານແລ້ວ ແລະ ເຖິງແມ່ນໄດ້ມີຫາງສຽງຄັດຄ້ານຈາກຣັດເຊຍ ມາໂດຍຕະຫລອດກໍຕາມ, ໃນວັນສຸກທີ 13 ພຶດສະພາ 2016 ນີ້ ສະຫະລັດອາເມຣິກາ ກໍຍັງຢືນຢັນ ຈະລົງມືກໍ່ສ້າງລະບົບປ້ອງກັນແບບດຽວກັນນີ້ ເປັນແຫ່ງສຸດທ້າຍ ຢູ່ດິນແດນຂອງປະເທດໂປໂລຍ ຊຶ່ງມີກຳນົດກໍ່ສ້າງສຳເລັດ ພາຍໃນທ້າຍປີ 2018.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!