ເຈົ້າໜ້າທີ່ຕຳຫຼວດໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງຄຳເກີດ ແຂວງບໍລິຄຳໄຊ ໄດ້ຮັບ ແຫຼ່ງຂ່າວຈາກພົນລະເມືອງດີວ່າ: ຈະມີການຊື້-ຂາຍຢາເສບຕິດຢູ່ພາຍໃນເທສະບານເມືອງ ໃນເມື່ອໄດ້ຮັບແຫຼ່ງຂ່າວແນວນັ້ນທາງເຈົ້າໜ້າທີ່ຈິ່ງຈັດກຳລັງລົງຕິດຕາມກຸ່ມເປົ້າໝາຍເຫັນວ່າມີຄວາມຈິງ.
ມາຮອດຕອນບ່າຍຂອງວັນທີ 22 ເດືອນເມສາ 2016 ເຈົ້າໜ້າທີ່ຕຳຫຼວດໄດ້ນຳກຳລັງສະກັດຈັບກຸ່ມເປົ້າໝາຍທີ່ ກຳລັງມີການຊື້-ຂາຍຢາບ້າຕາມເສັ້ນທາງຢູ່ໃນເທສະບານເມືອງຄຳເກີດຊຶ່ງໄດ້ເຂົ້າກວດລົດໂຕໂຍຕ້າ ວີໂກ້ໝາຍ ເລກທະບຽນ ກຄ ກຳແພງນະຄອນ 7696 ສີປອນເງິນກວດພົບຢາບ້າຈຳນວນ 9 ຖົງ ແລະກັກຕົວຜູ້ຖືກຫາໄດ້ 3 ຄົນຄື: 1. ທ້າວ ອວນ ອາຍຸ 52 ປີ, 2.ນາງ ແອ ອາຍຸ 42 ປີ, 3. ທ້າວ ຈອນນີ ອາຍຸ 19 ປີ ທັງສາມເປັນພໍ່, ແມ່, ລູກກັນປະຈຸບັນຢູ່ບ້ານນາໄຮ ເມືອງຄຳເກີດ ແຂວງບໍລິຄຳໄຊ.
ຜ່ານການສືບສວນ-ສອບສວນຂອງ ເຈົ້າໜ້າທີ່ ນາງ ແອ ໃຫ້ການຮັບສາລະພາບວ່າ: ຕົນໄດ້ມີການເຄື່ອນໄຫວຊື້-ຂາຍຢາເສບຕິດປະເພດຢາບ້າມາແຕ່ປີ 2013 ຢາບ້າທີ່ໄດ້ມາແຕ່ລະຄັ້ງແມ່ນຊື້ນຳຄົນບ້ານໃກ້ຄຽງ ແລ້ວມາຈຳໜ່າຍໃຫ້ສາຂາພາຍໃນເມືອງຕົກມາຮອດວັນ ທີ 22 ເດືອນເມສາ 2016 ນີ້ ເວລາ 9 ໂມງເຊົ້າ ທ້າວອວນຜູ້ເປັນຜົວ ແລະທ້າວ ຈອນນີ ຜູ້ເປັນລູກໄດ້ພ້ອມກັນອອກຈາກ ບ້ານ ນາໄຮ ເມືອງຄຳເກີດ ຊຶ່ງເປັນບ້ານ ຂອງຕົນເພື່ອໄປຊື້-ຂາຍຢາບ້າຫຼັງຈາກ ນັ້ນທ້າວອວນ ຜູ້ເປັນຜົວໄດ້ໂທລະສັບສັ່ງຊື້ຢາບ້ານຳຄົນທີ່ບໍ່ຮູ້ຊື່ຢູ່ບ້ານໃກ້ຄຽງຈຳນວນ 01 ມັດພໍຮອດເວລາ 13 ໂມງຂອງວັນດຽວກັນພວກຕົນກໍໄດ້ໄປຮັບເອົາຢາບ້າຢູ່ເຮືອນທີ່ທ້າວ ອວນ ຜູ້ເປັນຜົວໄດ້ໂທລະສັບສັ່ງຊື້ຢາບ້າ ແລ້ວເຈົ້າຂອງເຮືອນກໍໄດ້ເອົາຢາບ້າໃຫ້ຈຳນວນ 9 ຖົງ ລວມມີຈຳນວນ 1.795 ເມັດ ຊື້ໃນລາຄາເປັນເງີນ 8 ລ້ານກີບຫຼັງຈາກທີ່ໄດ້ຮັບຢາບ້າແລ້ວພວກຕົນກໍໄດ້ນຳຢາບ້າໄປສົ່ງໃຫ້ສາຂາຢູ່ໃນເທສະບານເມືອງ ດ້ວຍໃຊ້ຮູບການນັດສົ່ງກັນຢູ່ແຄມທາງໃນເວລາທີ່ຈະມີການຊື້-ຂາຍຢາບ້າຢູ່ນັ້ນ ເຈົ້າໜ້າທີ່ຕຳຫຼວດກໍ່ໄດ້ສະແດງ ຕົວເຂົ້າກວດຄົ້ນ ແລະໄດ້ກັກຕົວພວກຕົນພ້ອມກັບຢາບ້າຈຳນວນ 9 ຖົງມາດຳເນີນຄະດີຕາມລະບຽບກົດໝາຍ. ສ່ວນ ທ້າວ ຈອນນີ ຜູ້ເປັນລູກໄດ້ໃຫ້ການຮັບສາລະພາບວ່າ: ຜ່ານມາຜູ້ກ່ຽວແມ່ນບໍ່ເຄີຍພົວພັນກັບຢາເສບຕິດເພາະຕົນເອງບໍ່ໄດ້ຢູ່ບ້ານແຕ່ຄັ້ງນີ້ຕົນມາຢາມບ້ານພໍ່ແມ່ໄດ້ຊວນໄປນຳ ແລະຕົນເອງກໍ່ບໍ່ຮູ້ວ່າພໍ່ກັບແມ່ຈະໄປໃສ ແຕ່ໃນເວລານັ່ງລົດໄປນັ້ນໄດ້ຍີນພໍ່ກັບແມ່ໂທລະສັບພົວພັນເອົາຢາບ້ານຳໝູ່ແຕ່ບໍ່ຮູ້ວ່າຢູ່ບ້ານໃດ ແລະຊື່ຫຍັງພໍອອກຈາກບ້ານໄປໄດ້ໄລຍະໜຶ່ງພໍ່ກັບແມ່ກໍໄດ້ຂັບລົດໄປບ້ານ ທີ່ໂທລະສັບສັ່ງຊື້ຢາບ້າ ແລ້ວທັງສອງກໍ່ໄດ້ລົງໄປເອົາຢາບ້າຂຶ້ນລົດແລ້ວມຸ່ງໜ້າ ເຂົ້າຫຼັກຊາວ ເພື່ອໄປຍັງຈຸດນັດພົບເພື່ອສົ່ງຢາບ້າພໍໄປຮອດຈຸດນັດສົ່ງເວລາປະມານ 14 ໂມງ ຂອງວັນດຽວກັນກໍ່ຖືກເຈົ້າໜ້າທີ່ຕຳຫຼວດກັກຕົວໄປ ປກສ ເມືອງຄຳເກີດ ເພື່ອທຳການສືບສວນ-ສອບສວນ.
ໂດຍຂະນະນີ້ທາງເຈົ້າໜ້າທີ່ໜ່ວຍງານສະກັດກັ້ນ ແລະຕ້ານຢາເສບຕິດ ປກສ ເມືອງຄຳເກີດ ໄດ້ສືບຕໍ່ທຳການ ສືບສວນ-ສອບສວນ ເພື່ອຂະຫຍາຍຜົນຫາຜູ້ເຂົ້າຮ່ວມຂະບວນການມາດຳເນີນຄະດີຕາມລະບຽບກົດໝາຍ.
ທີ່ມາ: