ເມື່ອເວົ້າເຖິງແມງໄມ້ເຂົ້າຫູແລ້ວ ຂໍບອກເລີຍວ່າຫາກຜູ້ໃດຍັງບໍ່ເຄີຍເປັນຖືວ່າໂຊກດີສຸດໆ ເພາະຄົນທີ່ຖືກແມງໄມ້ເຂົ້າຫູຈະມີອາການເຈັບຫູທໍລະມານຈົນເຖິງຂັ້ນສູງສຸດກໍ່ວ່າໄດ້.

ກ່ອນທີ່ເຮົາຈະເອົາແມງໄວ້ອອກມາຈາກຫູໄດ້ນັ້ນກ່ອນອື່ນເຮົາຕ້ອງເຮັດໃຫ້ແມງໄມ້ນັ້ນຕາຍ ຫຼື ສະລົບກ່ອນ ເພື່ອຈະເປັນການງ່າຍໃນເວລາຄືບມັນອອກຈາກຫູ ເຊິ່ງມີວິທີແກ້ໄຂເບື້ອງຕົ້ນ ເມື່ອມີແມງໄມ້ເຂົ້າຫູ ດັ່ງນີ້:

ວິທີແກ້ໄຂເບື້ອງຕົ້ນ

1. ຫງ່ຽງຫູເບື້ອງແມງໄມ້ຂຶ້ນ

2. ຈາກນັ້ນນຳສຳລີຈຸ່ມນ້ຳເຊັ່ນ: ນ້ຳມັນໝາກກອກ, ນ້ຳລ້າ, ນ້ຳຢາຢອດຫູ, ເຫຼົ້າ 90 ຈຳພວກນີ້ ແລ້ວບີບນ້ຳເຂົ້າໄປໃນຮູຫູ ແລ້ວຫງ່ຽງໃຫ້ນ້ຳໄຫຼອອກ ເຮັດຕໍ່ເນື່ອງກັນ 2 – 3 ເທື່ອ. ແມງໄມ້ບາງຊະນິດກໍ່ຈະໄຕ່ອອກມາຈາກຫູເອງ ແຕ່ຖ້າມັນບໍ່ໄຕ່ອອກມາມັນກໍ່ຈະຕາຍຄາ ຫູ

3. ໃຊ້ໂຄມໄຟຊ່ອງເບິ່ງທີ່ຮູຫູ ແລ້ວໃຊ້ແນບຄ່ອຍໆຄືບແມງໄມ້ທີ່ຕາຍອອກມາຈາກຫູ

4. ຖ້າຮູ້ສຶກວ່າຕົນເອງບໍ່ແນ່ໃຈທີ່ຈະສາມາດຄີບແມງໄມ້ອອກມາຈາກຫູເອງໄດ້ ຫຼື ຄົນໃກ້ຕົວບໍ່ແນ່ໃຈວ່າຈະເຮັດໄດ້ຄວນໄປໂຮງໝໍ ທີ່ພະແນກ ຫູ, ຕາ, ດັງ, ຄໍ ດ່ວນ ເພື່ອໃຫ້ນາຍໝໍເພິ່ນເອົາອອກໃຫ້ຈະປອດໄພກ່ວາ.