ຊິ​ມບັບເວ​ເປັນ​ປະ​ເທດ​ທີ່​ມີ​ຊາວ​ຕ່າງປະ​ເທດ​ສາມາດ​ໃຊ້​ເງິນ​ສະກຸນ​ຕ່າງ​ໆ​ໄດ້​ຫຼາກ​ຫຼາຍ​ທັງ​ເງິນ​ແຣນຂອງ​ອາ​ຟຣິກາ​ໃຕ້, ​ເງິນ​ປອນ​ຂອງ​ອັງກິດ, ​ເງິນ​ໂດ​ລາ​ຂອງ​ອາ​ເມ​ລິ​ກາ, ​ເງິ​ນຣູປີ​ຂອງ​ອິນ​ເດຍ, ​ເງິນ​ເຢນຂອງ​ຍີ່ປຸ່ນ ​ແລະ ​ເງິນ​ຢວນຂອງ​ສປ ຈີນ, ​ເງິນ​ສະກຸນ​ຕ່າງໆ​ສາມາດ​ໃຊ້​ໃນ​ຊິ​ມບຳ​ເວ​ໄດ້​ກໍ່​ເພາະ​ຄວາມ​ພະຍາຍາມ​ແກ້​ໄຂ​ບັນຫາ​ອັດຕາ​ເງິນ​ເຟີ້​ທີ່​ສູງ​ຂຶ້ນ​ໃນ​ຊິ​ມບັບ​ເວ. ທັງ​ນີ້​ການ​ໃຊ້​ເງິນ​ສະກຸນ​ຫຼາກ​ຫຼາຍ​ໃນ​ຊິ​ມບັບ​ເວ​ມາ​ຕັ້ງ​ແຕ່​ປີ 2009 ຫຼັງ​ຈາກ​ຕ້ອງ​ປະ​ສົບ​ບັນຫາ​ອັດຕາ​ເງິນ​ເຟີ້​ສູງ​ເຖິງ 5.000% ​ເຮັດ​ໃຫ້​ເງິນ​ຈຳນວນ​ທໍ່​ເກົ່າ​ເກືອບ​ບໍ່​ມີຄ່າ, ຂໍ້​ມູນ​ຂອງ​ທະນາຄານ​ສຳຮອງ​ເງິນຕາ​ຊິ​ມບັບ​ເວລະ​ບຸ​ວ່າ ຫຼັງ​ຈາກ​ໃຊ້​ມາດ​ຕະການ​ເງິນ​ຫຼາຍ​ສະກຸນ​​ເຮັດ​ໃຫ້​ອັດຕາ​ເງິນ​ຝືດ​ຢູ່​ທີ່ -2,3%, ທີ່ຜ່ານ​ມາ  ຊິ​ມບັບ​ເວ​ມີ​ທະນະ​ບັດ​ມູນ​ຄ່າ​ສູງ​ເຖິງ 100.000.000.000.000​ ໂດ​ລາຊິ​ມບັບເວ​ (100 ພັນ​ຕື້​ໂດ​ລາຊິ​ມບັບເວ) ນອກຈາກ​ນີ້​ຍັງ​ມີ​ທະນະ​ບັດ​ມູນ​ຄ່າ 10 ພັນ​ຕື້​ໂດ​ລາຊິ​ມບັບ​ເວ ​ແລະ 1 ພັນ​ຕື້​ໂດ​ລາຊິ​ມບັບ​ເວ ​ໂດຍ​ທະນະບັດ​ຫຼັກ​ພັນ​ຕື້​ໂດ​ລາຊິ​ມບັບເວ​ເຫຼົ່ານີ້​ຍັງ​ສາມາດ​ນຳ​​ໄປ​ແລກ​ກັບ​ເງິນ​ໂດ​ລາ​ສະຫະລັ​ດ​ໄດ້​ເຖິງ​ທ້າຍ​ເດືອນ​ເມສາ​ທີ່​ຜ່ານ​ມາ ​ແຕ່​ມີ​ມູນ​ຄ່າ​ພຽງ 0,40 ​ໂດ​ລາ​ສະຫະລັດ​ເທົ່າ​ນັ້ນ.

ທ່ານ​ ​ແມນ ກຸດ​ຢາ ຜູ້​ວ່າການ​ທະນາຄານ​ສຳຮອງ​ເງິນຕາຊິ​ມບັບ​ເວ​ກ່າວ​ວ່າ ຈາກ​ອັດຕາ​ເງິນ​ເຟີ້​ທີ່​ສູງ​ຂຶ້ນ​ ປະ​ເທດ​ໄດ້​ຜ່ານ​ໄລຍະ​ລຳບາກ​ເພາະ​ບໍ່​ມີ​ເຄື່ອງມື​ມາ​ຕໍ່​ສູ້​ກັບ​ສະພາບ​ອັດຕາ​ເງິນ​ທີ່​ແປ​ປວນຕະຫຼອດ​ເວລາ ​ໂດຍ​ຕ້ອງ​ພິມ​ທະນະ​ບັດ​ໃໝ່ໆ​ເພີ່ມ​ຂຶ້ນ ​ແລ້ວ​ຄ່າ​ເງິນ​ກໍ່​ປ່ຽນທຸກ​ນາທີ, ຊຶ່ງຍັງ​ອີກດົນ​ທີ່​ຊິ​ມບັບ​ເວ​ຈະ​ຫັນ​ມາ​ໃຊ້​ສະກຸນ​ເງິນ​ຂອງ​ປະ​ເທດ​ຕົນ​ເອງ ຂະນະ​ນີ້​ມີ​ການ​ໃຊ້​ຫຼຽນ“ບອນ”​ຫຼາຍ ໂດຍ​ຫຼຽນ​ແຕ່​ລະ​ຫຼຽນ​ມີຄ່າ​ເທົ່າ​ກັບ 1 ​ໂດ​ລາ​ສະຫະລັດ ​ໂດຍ​ມີ​ຫຼຽນ​ບອນ​ໝູນວຽນ​ໃນ​ລະບົບ​ມູນ​ຄ່າ​ຫຼາຍ​ກວ່າ 13 ລ້ານ​ໂດລາ​ສະຫະລັດ ຊຶ່ງຊິ​ມບັບ​ເວ​ກຳລັງ​ຈະ​ພິມ​ທະນະ​ບັດ​ບອນ​ທີ່​ມີ​ມູນ​ຄ່າ​ຫຼາຍ​ກວ່າ 20 ​ໂດ​ລາ​ສະຫະລັດ​ມາ​ໃຊ້​ໃນ​ລະບົບ ຫຼັງ​ຈາກ​ປະສົບ​ກັບ​ພາວະ​ເງິນສົດ​ຂາດ​ແຄນ.