ສຳນັກຂ່າວຕ່າງປະເທດ ລາຍງານໃນວັນທີ 9 ພຶດສະພາຜ່ານມານີ້ວ່າ ຣັດເຊຍໄດ້ຈັດພິທີສວນສະໜາມ ສະເຫລີມສະຫລອງຄົບຮອບ 71 ປີ ວັນໄຊຊະນະເໜືອຟາຊິດເຢຍລະມັນ (9 ພຶດສະພາ 1945 – 9 ພຶດສະພາ 2016) ໃນສະໄໝສົງຄາມໂລກຄັ້ງທີສອງ ທີ່ສະໜາມແດງ ນະຄອນຫລວງມົດສະກູ ຢ່າງຍິ່ງໃຫຍ່ອະລັງການ ພາຍໃຕ້ການເຂົ້າຮ່ວມເປັນກຽດໃນພິທີຂອງ ທ່ານ ວະລາດີເມຍ ປູຕິນ ປະທານາທິບໍດີຣັດເຊຍ, ບັນດານັກຮົບເກົ່າ ກອງທັບແດງໂຊວຽດ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.
ການສະເຫລີມສະຫລອງດັ່ງກ່າວນີ້ ໄດ້ກາຍເປັນວັນສຳຄັນຂອງຊາດ ເພື່ອລະນຶກເຖິງເຫດການ ທີ່ກອງທັບແດງຂອງ ອະດີດສະຫະພາບໂຊວຽດ ໄດ້ບຸກໂຈມຕີຂັບໄລ່ກອງທັບຟາດຊິດເຢຍລະມັນ ທີ່ທຳການຮຸກຮານ ຈົນໄດ້ຮັບໄຊຊະນະຢ່າງສົມບູນ ດັບສູນລະບອບຟາດຊິດເຢຍລະມັນຢ່າງສິ້ນເຊີງ ໃນສະໄໝສົງຄາມໂລກຄັ້ງທີສອງ.
ສຳລັບການຈັດພິທີສວນສະໜາມໃນປີນີ້ ໄດ້ມີທະຫານເຂົ້າຮ່ວມປະມານ 13,000 ຄົນ, ລົດຫຸ້ມເກາະອີກ 135 ຄັນ, ເຮືອບິນສູ້ຮົບ, ເຮືອບິນຖິ້ມລະເບີດ ແລະ ເຮຄິຄັອບເຕີ້ອີກ ລວມ 71 ລຳ ຕະຫລອດຮອດ ມີການນຳເອົາຂີປະນາວຸດຕິດຫົວຮົບນິວເຄລຍ ໄລຍະໄກ ‘RS-24 Yars’ ອອກມາສະແດງແສນຍານຸພາບ ຂອງກອງທັບຣັດເຊຍ ພາຍໃນພິທີອີກດ້ວຍ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!