ປະຈຸບັນ ບັນຫາສິນຄ້າຜິດກົດໝາຍເຊັ່ນ: ສິນຄ້າໝົດອາຍຸ, ສິນຄ້າລອກຮຽນແບບ ແລະ ອື່ນໆແມ່ນມີໃຫ້ເຫັນຢ່າງຕໍ່ເນື່ອງ, ຫຼ້າສຸດ ແຂວງຄຳມ່ວນ ແລະ ຫຼວງນໍ້າທາ ກໍໄດ້ມີການຈັດພິທີທຳລາຍ ລວມມູນຄ່າທັງໝົດເກືອບ 20 ລ້ານກີບ.
ວັນທີ 6 ພຶດສະພາ 2016 ນີ້ພະ ແນກວິທະຍາສາດ ແລະ ເຕັກໂນໂລຊີ ແຂວງຄຳມ່ວນ ຮ່ວມກັບພະແນກອຸດສາຫະກຳ ແລະ ການຄ້າແຂວງ, ພະແນກສາທາລະນະສຸກແຂວງ, ຕຳຫຼວດເສດຖະກິດ, ພາສີເຂດ 3 ຕະຫຼອດຮອດພາກສ່ວນກ່ຽວຂ້ອງໄດ້ຈັດພິທີທຳລາຍສິນຄ້າລອກຮຽນແບບ ແລະ ສິນຄ້າໝົດອາຍຸທີ່ພະແນກວິທະຍາສາດ ແລະເຕັກໂນໂລຊີແຂວງ ໂດຍມີທ່ານ ນາງ ແຕງອ່ອນ ລິນສົມພູ ຮອງຫົວໜ້າພະແນກດັ່ງກ່າວ, ມີບັນດາພະນັກງານ-ວິຊາການຈາກພະແນກການກ່ຽວຂ້ອງເຂົ້າຮ່ວມ.
ໂອກາດນີ້ ທ່ານ ແສງຄຳ ພິມມະ ສອນ ຫົວໜ້າຂະແໜງຊັບສິນທາງປັນຍາ ມາດຕະຖານ ແລະວັດແທກກໍໄດ້ລາຍງານການເຄື່ອນໄຫວວຽກງານຊັບສິນທາງ ປັນຍາໃນໄລຍະສົກປີ 2014–2015 ໂດຍທ່ານກ່າວວ່າ: ໃນໄລຍະ 1 ປີຜ່ານມາພະແນກວິທະຍາສາດ ແລະເຕັກໂນ ໂລຊີ ແຂວງຄຳມ່ວນເວົ້າລວມ, ເວົ້າສະ ເພາະກໍຄືຂະແໜງຊັບສິນທາງປັນຍາ ມາດຕະຖານ ແລະວັດແທກໄດ້ເອົາໃຈໃສ່ຈັດຕັ້ງປະຕິບັດຕາມພາລະບົດບາດ, ສິດ ແລະໜ້າທີ່ຂອງຕົນຢ່າງຕັ້ງໜ້າດ້ວຍຫຼາຍຮູບຫຼາຍແບບ, ມີການປະສານສົມ ທົບກັບຂະແໜງການ, ອົງການຈັດຕັ້ງ ທີ່ກ່ຽວຂ້ອງເຮັດໃຫ້ສາມາດເຄື່ອນໄຫວ ກວດພົບ ແລະ ຢຶດສິນຄ້າລອກຮຽນແບບ (ສິນຄ້າປອມແປງ) ປະເພດແປ້ງນົວ ກາຈອງ (ຣາຊາ ຊູລົດ ) ໄດ້ 739 ຖົງ ລວມມູນຄ່າ 7 ແສນກວ່າກີບ ແລະຢຶດສິນຄ້າໝົດອາຍຸການບໍລິໂພກປະເພດ ເຂົ້າໜົມ, ນໍ້າຫວານ, ນົມສຳເລັດຮູບ, ເຄື່ອງປຸງອາຫານ ແລະອື່ນໆລວມທັງໝົດ 21 ລາຍການ ລວມມູນຄ່າ 7,4 ລ້ານກວ່າກີບ ລວມສິນຄ້າທີ່ຢຶດມາໄດ້ທັງໝົດ 8,1 ລ້ານກວ່າກີບ.
ສ່ວນເມືອງສິງ ແຂວງຫຼວງນໍ້າທາ ກໍໄດ້ຈັດພິທີທຳລາຍເຄື່ອງບໍລີໂພກທີ່ໝົດອາຍຸ ແລະ ເສື່ອມຄຸນນະພາບເຊັ່ນກັນ ໂດຍພິທີທຳລາຍສິນຄ້າດັ່ງກ່າວໄດ້ມີຂຶ້ນໃນຕອນເຊົ້າວັນທີ 5 ພຶດສະພາ 2016 ທີ່ເດີ່ນກິລາເມືອງ ເຂົ້າຮ່ວມຂອງທ່ານ ດຣ. ຄຳຈັນ ຂະຕິຍະວົງ ຫົວໜ້າຫ້ອງການສາທາລະນະສຸກເມືອງສິງ, ມີກຳມະການພັກເມືອງຫົວໜ້າຫ້ອງການ-ຮອງຫົວໜ້າຫ້ອງການ, ພະນັກງານວິຊາການ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ດຣ. ນາງ ວິນາກອນ ແສນ ໂກແມນ ຫົວໜ້າໜ່ວຍງານອາຫານ ແລະ ຢາຫ້ອງການສາທາລະນະສຸກເມືອງສິງ ກ່າວວ່າ: ສິນຄ້າທີ່ນຳມາທຳລາຍຄັ້ງນີ້ ແມ່ນຈາກການເຄື່ອນໄຫວລົງກວດກາ ການຄ້າຂາຍເຄື່ອງບໍລິໂພກທີ່ໝົດອາຍຸ ເຊື່ອມຄຸນະພາບຂອງຄະນະກຳມະການອາຫານ ແລະຢາເມືອງສິງ ໃນຈຳນວນ 2 ຄັ້ງຄືຄັ້ງວັນທີ 17 ພະຈິກ 2015 ແລະວັນທີ 22-25 ມີນາ 2016 ຕາມ ທ້ອງຕະຫຼາດ, ຮ້ານຂາຍເຄື່ອງພາຍໃນ ເມືອງສິງ ໄດ້ພົບເຄື່ອງທີ່ໝົດອາຍຸ, ເຊື່ອມຄຸນນະພາບຈຳນວນ 33 ຮ້ານ 46 ລາຍການມີປະເພດນົມ, ເຄື່ອງດື່ມຊາ, ກະເຟ, ເຂົ້າໜົມ, ອາຫານສຳເລັດຮູບ, ເຄື່ອງປຸງ ແລະຢາ ລວມມູນຄ່າທັງໝົດ 10,6 ລ້ານກວ່າກີບ.
ໂອກາດດຽວກັນນີ້ ທ່ານ ດຣ. ຄຳຈັນ ຂະຕິຍະວົງ ກຳມະການພັກເມືອງ ຫົວໜ້າຫ້ອງການສາທາລະນະສຸກ ເມືອງກໍໄດ້ຊີ້ແຈ້ງເຖິງຜົນຂອງເຄື່ອງບໍລິໂພກທີ່ໝົດອາຍຸຫາກນຳມາກິນດື່ມແມ່ນມີຜົນ ຮ້າຍຕໍ່ສຸຂະພາບພ້ອມທັງຮຽກຮ້ອງໃຫ້ພໍ່ຄ້າຊາວຂາຍຜູ້ທີ່ຄ້າຂາຍຈົ່ງເອົາໃຈໃສ່ໃນການນຳສີນຄ້າມາຂາຍໃຫ້ເອົາເຄື່ອງທີ່ມີຄຸນນະພາບໄດ້ມາດຕະຖານມາວາງຂາຍໃຫ້ພໍ່ແມ່ປະຊາຊົນຜູ້ບໍລິໂພກ ເພື່ອເປັນການຮັກສາສຸຂະພາບຂອງຜູ້ບໍລິໂພກໃຫ້ແຂງແຮງ.
ທີ່ມາ: 