ຕະຫຼາດຫຼັກຊັບລາວ ແລະ ບໍລິສັດຫຼັກຊັບເອພີເອັມລາວ ຈຳກັດ ໄດ້ຈັດຕັ້ງການສຳມະນາພາຍໃຕ້ຫົວຂໍ້ທີ່ວ່າ:ຄວາມເຂົ້າໃຈເບື້ອງຕົ້ນກ່ຽວກັບການບັນຊີສຳລັບບໍລິສັດທີ່ຈະເຂົ້າຈົດທະບຽນໃນຕະຫຼາດຫຼັກຊັບລາວຂຶ້ນທີ່ໂຮງແຮມດາວສະຫວັນໃນວັນທີ 27-28 ເມສາ 2016 ນີ້ ໂດຍມີບັນດາຜູ້ອຳນວຍການບໍລິສັດ, ທຸລະກິດຕ່າງໆພາຍໃນແຂວງສະຫວັນນະເຂດເຂົ້າຮ່ວມ.
ທ່ານ ວັນຄຳ ວໍຣະວົງ ຜູ້ອຳນວຍການໃຫຍ່ຕະຫຼາດຫຼັກຊັບລາວກ່າວວ່າ: ພາຍຫຼັງທີ່ຕະຫຼາດຫຼັກຊັບລາວໄດ້ຮັບການສ້າງຕັ້ງຂຶ້ນ ແລະກໍ່ໄດ້ດຳເນີນການເຄື່ອນໄຫວນັບແຕ່ປີ 2011 ເປັນຕົ້ນມາສະພາບການເຄື່ອນໄຫວພາຍໃນຕະຫຼາດຫຼັກຊັບລາວເຫັນວ່າ: ມີ 5 ບໍລິສັດແລ້ວທີ່ໄດ້ເຂົ້າຈົດທະບຽນໃນຕະຫຼາດຫຼັກຊັບໃນນີ້ມີທະນາຄານການຄ້າຕ່າງປະເທດ, ບໍລິສັດຜະລິດໄຟຟ້າລາວມະຫາຊົນ, ບໍລິສັດລາວເວີນມະຫາຊົນ, ບໍລິສັດປີໂຕຣລ້ຽມເທຣດດິ້ງລາວມະຫາຊົນ ແລະ ບໍລິສັດ ສຸວັນນີ ໂຮມເຊັນເຕີມະຫາຊົນ.
ທ່ານ ສົມພົບ ສັກພັນພະນົບຜູ້ອຳນວຍການໃຫຍ່ບໍລິສັດຫຼັກຊັບເອພີເອັມລາວ ຈຳກັດກ່າວວ່າ: ສຳລັບບໍລິສັດທີ່ໄດ້ຈົດທະບຽນໃນຕະຫຼາດຫຼັກຊັບແມ່ນມີຜົນປະໂຫຍດຕໍ່ບໍລິສັດຊຶ່ງບໍລິສັດໄດ້ຮັບສິດທິພິເສດຫຼຸດອາກອນກຳໄລ 5% ຈາກອັດຕາປົກກະຕິໃນໄລຍະ 4 ປີທຳອິດຂອງການຈົດທະບຽນຈາກ 24% ມາເປັນ 19%; ໄດ້ເພີ່ມຊ່ອງທາງການລະດົມທຶນຈາກແຫຼ່ງທຶນໄລຍະຍາວທີ່ປັດສະຈາກດອກເບ້ຍເພື່ອຊ່ວຍໃນການບໍລິ ຫານເງິນຢ່າງມີປະສິດທິພາບ, ເສີມສ້າງຊື່ສຽງທີ່ດີໃຫ້ແກ່ບໍລິສັດ, ສ້າງຄວາມຈົ່ງ ຮັກພັກດີ ແລະຜົນຕອບແທນທີ່ດີໃຫ້ແກ່ບໍ ລິສັດ, ສ້າງຄວາມຮັບຜິດຊອບ ແລະ ການບໍລິຫານງານແບບມືອາຊີບ ສ່ວນຜູ້ຖືຮຸ້ນກໍໄດ້ຮັບຜົນປະໂຫຍດແມ່ນໄດ້ຮັບການ ຍົກເວັ້ນອາກອນລາຍໄດ້ສຳລັບເງິນປັນຜົນໃຫ້ແກ່ຂາຮຸ້ນ ຫຼື ຜູ້ຖືຮຸ້ນຂອງບໍລິສັດຈົດທະບຽນເພີ່ມສະພາບຄ່ອງ ແລະ ສ້າງມູນຄ່າເພີ່ມໃຫ້ແກ່ຜູ້ຖືຮຸ້ນ, ສ້າງລາຄາຕະຫຼາດຮຸ້ນ ໂດຍຜູ້ຖືຮຸ້ນສາມາດຂາຍຮຸ້ນໄດ້ງ່າຍຂຶ້ນຜ່ານຕະຫຼາດຫຼັກຊັບ,ຫຼຸດຜ່ອນພາລະຄ້ຳປະກັນຂອງຜູ້ຖືຮຸ້ນ ແລະ ສະພາບໍລິຫານຂອງບໍລິສັດ ແລະ ເພີ່ມການຄຸ້ມຄອງໃນການລົງທຶນ.
ທີ່ມາ: 