ຟິລິບປິນ-ມາເລ-ອິນໂດ ຮ່ວມມືກັນຕ້ານກອງກຳລັງອາບູໄຊຢາຟ

0
538

ເອເອຟພີລາຍງານເມື່ອວັນທີ 5 ພຶດສະພານີ້ວ່າ ລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະຜູ້ບັນຊາການກອງທັບອິນໂດເນເຊຍ, ມາເລເຊຍ ແລະ ຟິລິບປິນ ບັນລຸຂໍ້ຕົກລົງເພີ່ມມາດຕະການຄວາມປອດໄພໃນນ່ານນໍ້າທະເລຊູລູ ແລະ ເຊເລບີສ ຊຶ່ງເປັນເສັ້ນທາງຫຼັກໃນການສັນຈອນທາງນໍ້າລະຫວ່າງ 3 ປະເທດ ຫຼັງກຸ່ມອາບູໄຊຢາຟ ກຸ່ມຕິດອາວຸດມຸດສະລິມຫົວຮຸນແຮງທາງຕອນໃຕ້ຂອງຟິລິບປິນ ເຜີຍແຜ່ຄລິບວິດີໂອຂົ່ມຂູ່ຂ້າຕົວປະກັນຊາວການາດາ ແລະ ນອກແວ ອີກ 2 ຄົນທີ່ຍັງລອດຊີວິດ ຫຼັງຫາກໍ່ຂ້າຕັດຫົວທ້າວ ຈອນ ຣິດສເດລ ຊາຍຊາວການາດາ ເພາະຄົບກຳນົດຈ່າຍຄ່າໄຖ່ເມື່ອ 25 ເມສາ.

ນາງ ເຮດໂນ ມາຊູດີ ລັດຖະມົນຕີກະຊວງການຕ່າງປະເທດອິນໂດເນເຊຍ ລະບຸວ່າທາງການທັງ 3 ປະເທດຈະຮ່ວມກັນປະສານງານຈັດເວນຍາມເຮືອລາດຕະເວນໃນທະເລຊູລູ ແລະ ທະເລເຊເລບີສ ຊຶ່ງເປັນນ່ານນໍ້າສຳຄັນ ມີປະຊາຊົນສັນຈອນຫຼາຍກວ່າ 18 ລ້ານຄົນຕໍ່ປີ ແລະ ຍັງເປັນຊ່ອງທາງຂົນສົ່ງສິນຄ້າຫຼາຍກວ່າ 44 ລ້ານໂຕນໃນແຕ່ລະປີ ຢ່າງໃດກໍຕາມ ໄພຄຸກຄາມຈາການລັກພາຕົວຂອງກຸ່ມອາບູໄຊຢາຟ ສົ່ງຜົນກະທົບຮ້າຍແຮງຕໍ່ການໃຊ້ຊີວິດຂອງປະຊາຊົນ ລວມເຖິງເສດຖະກິດ ແລະ ການທ່ອງທ່ຽວຂອງພື້ນທີ່ໃນຊ່ວງຫຼາຍປີທີ່ຜ່ານມາ.