ທ່ານ ດີມີຕຣີ ເມດເວເດັບ ນາຍົກລັດຖະມົນຕີແຫ່ງສະ ຫະພັນຣັດເຊຍ ໄດ້ສົ່ງສານຊົມເຊີຍເຖິງທ່ານ ທອງລຸນ ສີສຸລິດ ນາຍົກລັດຖະມົນຕີ ຊຶ່ງມີເນື້ອໃນດັ່ງນີ້:

ຕາງໜ້າລັດຖະບານແຫ່ງ ສະຫະພັນ ຣັດເຊຍ ແລະ ໃນ ນາມສ່ວນຕົວ ຂ້າພະເຈົ້າ ຂໍສະແດງຄວາມຊົມເຊີຍຢ່າງຈິງໃຈ ມາຍັງທ່ານ ທີ່ໄດ້ຮັບແຕ່ງຕັ້ງໃຫ້ດຳລົງຕຳແໜ່ງເປັນນາຍົກລັດ ຖະມົນຕີແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.

ຣັດເຊຍ ແລະ ລາວ ມີສາຍພົວພັນມິດຕະພາບອັນເປັນມູນເຊື້ອມາແຕ່ຍາວນານ, ການພົວພັນຮ່ວມມືຊຶ່ງກັນ ແລະ ກັນດ້ານເສດຖະກິດ, ການຄ້າ, ພະລັງງານ, ວິທະຍາສາດ – ເຕັກນິກ, ວັດທະນະທຳ ແລະ ມະນຸດສະທຳ ໄດ້ຮັບການຂະຫຍາຍຕົວເປັນກ້າວໆພ້ອມທັງບັນດາໂຄງການຮ່ວມກັນໄດ້ຮັບການຈັດຕັ້ງ ປະຕິບັດດ້ວຍ ຜົນ ສຳເລັດດີ.
ຂ້າພະເຈົ້າ ກຽມພ້ອມຢ່າງຕັ້ງໜ້າ ທີ່ຈະເຮັດວຽກກັບທ່ານ ເພື່ອສືບຕໍ່ຊຸກຍູ້ການຮ່ວມມືຮອບດ້ານ ລະຫວ່າງຣັດເຊຍ ແລະ ລາວ.

ຂ້າພະເຈົ້າ ຂໍອວຍພອນມາຍັງ ທ່ານນາຍົກລັດຖະມົນຕີຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສຳເລັດໃນໜ້າທີ່ຮັບຜິດຊອບຂອງທ່ານທຸກປະການ.