ສຳນັກຂ່າວຕ່າງປະເທດ ລາຍງານໃນວັນທີ 26 ເມສາຜ່ານມານີ້ວ່າ ທ່ານ ຮຸນແຊນ ນາຍົກລັດຖະມົນຕີ ແຫ່ງ ຣາຊະອານາຈັກກຳປູເຈຍ ໄດ້ອອກມາຮຽກຮ້ອງໃຫ້ທຸກພາກສ່ວນໃນສັງຄົມ ລະດົມກຳລັງໃຫ້ການຊ່ວຍເຫລືອ ແກ້ໄຂສະພາບໄພແຫ້ງແລ້ງ ຄັ້ງຮຸນແຮງທີ່ສຸດໃນຮອບ 40 ປີ ທີ່ເຮັດໃຫ້ 2/3 ຂອງຈຳນວນແຂວງທັງໝົດ 25 ແຂວງທົ່ວປະເທດ ກຳລັງຂາດແຄນນ້ຳດື່ມ ແລະ ສິ່ງຈຳເປັນອື່ນໆ.

ທ່ານ ຮຸນແຊນ ໄດ້ກ່າວວ່າ ໄດ້ສັ່ງໃຫ້ເຈົ້າແຂວງທຸກແຂວງທີ່ປະສົບໄພແລ້ງ ໃຫ້ການຊ່ວຍເຫລືອປະຊາຊົນ ແທນການເຂົ້າຮ່ວມກອງປະຊຸມຢູ່ເມືອງຫລວງ ແລະ ໄດ້ຈັດຕັ້ງຄະນະຊີ້ນຳລະດັບຊາດຂຶ້ນ ເພື່ອເຮັດທຸກສິ່ງທີ່ສາມາດເຮັດໄດ້ ສຳລັບເຮັດໃຫ້ແນ່ໃຈວ່າ ປະຊາຊົນມີນ້ຳກິນ-ນ້ຳໃຊ້ຢ່າງພຽງພໍ, ພ້ອມທັງຮ້ອງຂໍຄວາມຊ່ວຍເຫລືອ ຈາກບັນດາຜູ້ຜະລິດນ້ຳດື່ມ ແລະ ພາກສ່ວນອື່ນໆ ໃຫ້ການບໍລິຈາກນ້ຳ ແລະ ເງິນ ສຳລັບຜູ້ທີ່ຂາດແຄນ.

ທັງນີ້ ບັນດາປະເທດຕ່າງໆ ໃນພາກພື້ນອາຊີຕາເວັນອອກສຽງໃຕ້ ກຳລັງປະສົບກັບໄພແຫ້ງແລ້ງ ຄັ້ງຮຸນແຮງທີ່ສຸດ ໃນຮອບຫລາຍສິບປີ ໂດຍນັກວິທະຍາສາດໄດ້ລະບຸວ່າ ສະຖານະການທີ່ເກີດຂຶ້ນ ແມ່ນເປັນຜົນພວງມາຈາກ ປະກົດການເອວນິໂຢ ທີ່ເຮັດໃຫ້ເກີດມີສະພາບອາກາດຮ້ອນ ແລະ ແຫ້ງແລ້ງຫລາຍກວ່າປົກກະຕິ.