ກົມແຜນການ ກະຊວງກະສິກຳ ແລະ ປ່າໄມ້ໃຫ້ຮູ້ວ່າ: ການຜະລິດເປັນສິນຄ້າ ຂອງຂະແໜງກະສິກຳໃນປັດຈຸບັນ ມີທ່າຂະຫຍາຍຕົວກ້ວາງຂວາງຂຶ້ນເລື່ອຍໆ, ອັນພົ້ນເດັ່ນແມ່ນການປູກກາເຟ, ສາລີແຂງທີ່ເພີ່ມຂຶ້ນໃນແຕ່ລະປີ, ຮອງລົງມາແມ່ນການປູກຢາງພາລາ, ມັນຕົ້ນ, ອ້ອຍ, ໝາກເດື່ອຍ, ກ້ວຍ, ໜາກຫຸ່ງ ແລະ ພືດຕະກຸນຖົ່ວຕ່າງໆ, ໂດຍສະເພາະຢູຸ່ບັນດາແຂວງພາກເໜືອ ແມ່ນເປັນຂະບວນການດີ ແລະ ສາມາດສົ່ງອອກໄປ ສປ ຈີນ ໄດ້ເປັນຈຳນວນຫຼາຍ, ສຳລັບການລ້ຽງສັດເປັນສິນຄ້າ ກໍມີປັດໄຈໃໝ່ຫຼາຍຂຶ້ນ, ດ້ວຍການນຳໃຊ້ແນວພັນປັບປຸງ ແລະ ກ້າວໄປສູ່ການລ້ຽງແບບອຸດສາຫະກຳ (ແບບເປັນຟາມ) ຕາມຕົວເລກສະຖິຕິປີ 2015 ທົ່ວປະເທດມີຟາມລ້ຽງງົວ ທັງໝົດ 195 ຟາມ, ມີງົວປະ ມານ 28 ພັນໂຕ, ຟາມລ້ຽງໝູມີ 775 ຟາມ, ມີໝູປະມານ 291 ພັນໂຕ ແລະ ສັງເກດເຫັນວ່າ ຟາມລ້ຽງໝູແມ່ນມີທ່າຂະຫຍາຍຕົວດີ, ໂດຍສະເພາະແມ່ນຢູ່ນະຄອນຫຼວງວຽງຈັນ, ແຂວງວຽງຈັນ ແລະ ຄຳມ່ວນ, ສຳລັບຟາມລ້ຽງສັດປີກມີ 405 ຟາມ, ມີສັດປີກປະມານ 2 ລ້ານກວ່າໂຕ, ໃນນັ້ນຟາມໄກ່ພັນໄຂ່ ມີຫຼາຍກວ່າ 150 ຟາມ, ສາມາຜະລິດໄຂ່ສະໜອງໃຫ້ສັງຄົນໄດ້ 1 ລ້ານໜ່ວຍ/ມື້, ນອກຈາກນັ້ນຍັງມີຟາມໄກ່ຊີ້ນ, ເປັດໄຂ່, ນົກກະທາ ແລະ ສັດອື່ນໆ ກໍເຫັນວ່າມີທ່າຂະຫຍາຍຕົວດີພໍສົມຄວນ, ສ່ວນການລ້ຽງປາກະຊັງ ມີປະມານ 5,600 ກວ່າກະຊັງ, ສາມາດສະໜອງປາໄດ້ 28 ພັນໂຕນ/ ປີ ຫຼື ປະມານ 76 ໂຕນ/ມື້, ສ່ວນການສົ່ງອອກສັດໃຫຍ່ ໄປປະເທດໃກ້ຄຽງ ກໍເຫັນວ່າປະຕິບັດໄດ້ຕາມຄາດໝາຍ.
ກົມດັ່ງກ່າວໃຫ້ຮູ້ອີກວ່າ: ອັນພົ້ນເດັ່ນຂອງຂະບວນການຜະລິດເປັນສິນຄ້າ ຂອງຂະແໜງກະສິກຳປີຜ່ານມາ ແມ່ນການລ້ຽງງົວທອມ ຊຶ່ງກຳລັງໄດ້ຮັບຄວາມນິຍົມຢ່າງກ້ວາງຂວາງ, ໂດຍສະເພາະແມ່ນຢູ່ແຂວງຊຽງຂວາງ, ສະຫວັນນະເຂດ ແລະ ແຂວງວຽງຈັນ, ສັງລວມແລ້ວເຫັນວ່າໃນປີຜ່ານມາ ສາມາດຮັກສາເກນການຂະຫຍາຍຕົວໄດ້ ຕາມຄາດໝາຍແຜນການວາງໄວ້ຄື: ການຜະລິດຊີ້ນ-ປາຂະຫຍາຍຕົວຢູ່ໃນລະດັບ 5-6%/ປີ, ຊຶ່ງເຫັນໄດ້ຈາກການຜະລິດໝູ, ປາກະຊັງແມ່ນເພີ່ມຂຶ້ນຢ່າງຈະແຈ້ງ ແລະ ຄາດວ່າການຜະລິດເປັນສິນຄ້າ ຍັງຈະສືບຕໍ່ຂະຫຍາຍຕົວຢ່າງຕໍ່ເນື່ອງ, ເນື່ອງຈາກສະພາບຄວາມຕ້ອງການຂອງຜູ້ບໍລິໂພກນັບມື້ເພີ່ມຂຶ້ນ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!