ວັນທີ 26 ເມສາ ນີ້ແຂວງສາລະວັນຈັດກອງປະຊຸມການກະກຽມຄວາມພ້ອມເພື່ອລະດົມທຶນຜ່ານຕະຫຼາດ ແລະ ການຈົດທະບຽນໃນຕະຫຼາດຫຼັກຊັບຂຶ້ນທີ່ຫ້ອງປະຊຸມພັດຕະຄານສິນສະໃໝ່ ໂດຍໃຫ້ກຽດເປັນປະທານຂອງ ທ່ານ ພູທົງ ຄຳມະນີວົງ ຮອງເຈົ້າແຂວງໆສາລະວັນ, ໃຫ້ກຽດເຂົ້າຮ່ວມໂດຍມີຜູ້ຕາງໜ້າຈາກພະແນກການຕ່າງໆອ້ອມຂ້າງແຂວງ ແລະບັນດາທ່ານຜູ້ປະກອບການດ້ານທຸລະກິດເຂົ້າຮ່ວມ.
ທ່ານ ວັນຄຳ ວໍຣະວົງ ຜູ້ອຳນວຍການໃຫ່ຍຕະຫຼາດຫຼັກຊັບລາວ ໄດ້ກ່າວເຖິງຈຸດປະສົງຂອງການຈັດສຳມະນາຄັ້ງນີ້ ເພື່ອເປັນການເຜີຍແຜ່ຄວາມຮູ້ກ່ຽວກັບຕະຫຼາດທຶນ ຊຶ່ງເປັນເປົ້າໝາຍຫຼັກຂອງໜ່ວຍງານສົ່ງເສີມຄວາມຮູ້, ແລະ ການສຳມະນາ ຄັ້ງນີ້ກໍມີຄວາມໝາຍຄວາມສຳຄັນຫຼາຍຕໍ່ບັນດານັກລົງທຶນ ແລະນັກທຸລະກິດ ເພື່ອໃຫ້ຮູ້ເຖິງວິທີການກະກຽມຄວາມພ້ອມກ່ອນການນຳເອົາບໍລິສັດຂອງຕົນເຂົ້າຈົດທະບຽນໃນຕະຫຼາດຫຼັກຊັບ, ພ້ອມທັງເປັນການຫຼີກລ່ຽງຄວາມສ່ຽງຕ່າງໆທີ່ອາດຈະເກີດຂຶ້ນ.
ຕະຫຼາດຫຼັກຊັບລາວຮັບການສ້າງຕັ້ງຂຶ້ນປີ 2010 ໂດຍທະນາຄານແຫ່ງ ສປປ ລາວ ຖືຮຸ້ນ 51% ແລະ ຕະຫຼາດຫຼັກຊັບເກົາຫຼີຖືຮຸ້ນ 49% ແລະໄດ້ເລີ່ມທຳການຊື້-ຂາຍຮຸ້ນຄັ້ງທຳອິດໃນວັນທີ 11 ເດືອນມັງກອນ ປີ 2011 ປະຈຸບັນມີບໍລິສັດຮ່ວມຈົດທະບຽບ ທັງໝົດ 5 ບໍລິສັດດ້ວຍມູນຄ່າຕະຫຼາດຫຼັກຊັບຫຼາຍກວ່າ 12,000 ຕື້ກີບ, ທຽບ ໃສ່ GDP ແມ່ນເທົ່າກັບ 13%.
ທີ່ມາ: