ສາລະວັນ ກໍເປັນອີກແຂວງ ໜຶ່ງທີ່ແອບແຝງສິ່ງມະຫັດສະຈັນ ໄວ້ໃຫ້ຄົນຮຸ່ນໃໝ່ໄດ້ຮຽນຮູ້ ແລະສຶກສາຮອງຮອຍປະຫວັດສາດ
ແລະວັດທະນະທຳທີ່ຄົນລາວເຮົາເອງອາດເບິ່ງຂ້າມ ຫຼື ຫຼົງລືມໄປ, ດັ່ງນັ້ນຫາກທ່ານໃດລົງໃຕ້ກໍຫາໂອກາດແວ່ທ່ຽວຊົມຄວາມສວຍສົດງົດງາມທາງດ້ານທຳມະຊາດ ຂອງແຂວງສາລະວັນໄດ້.
ແຂວງສາລະວັນ ເປັນແຂວງໜຶ່ງທີ່ໄດ້ຮັບນາມມະຍົດວ່າເປັນດິນແດນອົງແກ້ວອົງກົມມະດຳ ຕັ້ງຢູ່ທາງພາກໃຕ້ຂອງ ສປປ ລາວ, ມີເມືອງສາລະວັນເປັນເທສະບານ ຫຼື ເມືອງເອກ ແລະເປັນແຂວງທີ່ມີຄວາມຫຼາກຫຼາຍທາງດ້ານວັດທະນະທຳ ແລະຮີດຄອງ ປະເພນີທີ່ໜ້າສຶກສາ ແລະຄົ້ນຫາ ຊຶ່ງມັນສະແດງອອກຜ່ານການຮ້ອງລຳທຳເພງເຊັ່ນ: ລຳສາລະວັນອັນມີຊື່ສຽງໂດ່ງດັງໄປທົ່ວປະ ເທດ, ລຳຄົງເຊໂດນ, ລຳຕາລີມອນ, ລຳກະເລີ້ຍ ແລະອື່ນໆນອກຈາກວັດທະນະທຳທີ່ຂຶ້ນຊື່ແລ້ວດິນແດນແຫ່ງນີ້ຍັງມີທຳມະຊາດເປັນຈຸດເດັ່ນມີຕົກຕາດທີ່ມີຊື່ສຽງຫຼາຍແຫ່ງສົມກັບຄຳຂວັນທີ່ວ່າ: “ໝາກພ້າວນາໄຊປິ້ງໄກ່ນາປົ່ງເຫຼົ້າຂາວ ເມືອງຄົງລຳວົງສາລະວັນ” ເມື່ອໄດ້ຟັງຄຳຂວັນດັ່ງກ່າວນີ້ແລ້ວກໍ ນຶກເຖິງຫຼາຍໆສິ່ງຫຼາຍໆຢ່າງສະເພາະແຕ່ວັດທະນະທຳ, ສາລະວັນຍັງເປັນດິນແດນທີ່ມີຮອງຮອຍແຫຼ່ງອະລິຍະທຳເຊັ່ນ: ພະອົງຕື້ແຫ່ງວັດໂອກາດທີ່ເປັນພະສັກສິດ ຄູ່ບ້ານຄູ່ເມືອງຂອງຊາວແຂວງ ສາລະວັນ, ພ້ອມນັ້ນຍັງຫໍໄຕສາລະວັນ ຊຶ່ງຖືກສັນນິຖານວ່າໄດ້ຮັບການສ້າງຂຶ້ນໃນສັດຕະວັດທີ 1718 ດ້ວຍໄມ້ເນື້ອແຂງທັງໝົດມີ ໂຄງສ້າງຮູບຊົງທີ່ສວຍງາມສົມ ສ່ວນປະດັບດ້ວຍລວດລາຍອັນວິຈິດປານິດຖືເປັນສະຖາປັດຕະຍະກຳທີ່ມີເອກະລັກໂດດເດັ່ນງາມສະ ຫງ່າທີ່ບໍ່ນ້ອຍໜ້າແຂວງອື່ນໆເລີຍ ກໍວ່າໄດ້.
ນອກຈາກວັດທະນະທຳແລ້ວ ສາລະວັນຍັງເປັນດິນແດນທີ່ອຸດົມ ສົມບູນດ້ວຍທຳມະຊາດເຮັດໃຫ້ມີ ສະຖານທີ່ທ່ອງທ່ຽວທາງດ້ານ ທຳມະຊາດຫຼາຍແຫ່ງທີ່ມີຊື່ສຽງ ໂດຍສະເພາະແມ່ນອຸທິຍານແຫ່ງ ຊາດຕາດເລາະ ຊຶ່ງເປັນບ່ອນທີ່ ມີແຜນພັດທະນາໃຫ້ກາຍເປັນສະ ຖານທີ່ທ່ອງທ່ຽວຄົບວົງຈອນທີ່ທັນສະໄໝ, ນອກນັ້ນຍັງມີນ້ຳຕົກຕາດສູງເຊເຊັດ, ອະນຸສາວະລີອົງແກ້ວສວນແຄນ, ນ້ຳຕົກຕາດເທວະດາ, ຫັດຖະກຳຕ່ຳແພບ້ານຫ້ວຍຫີນ, ຕາດແສນ, ຕາດໄມ້ເຮ້ຍ, 4 ພັນ ຂຸມບ້ານທ່າ, ນ້ຳຕົກຕາດແກ້ງກຸ ແລະສະຖານທີ່ທ່ອງທ່ຽວແຫ່ງ ອື່ນໆອີກ, ມີປ່າໄມ້ຂຽວສົດ ແລະອາກາດຮົ່ມເຢັນເໝາະສຳລັບການ ພັກຜ່ອນຢ່ອນໃຈ, ພ້ອມນີ້ຍັງມີການບໍລິການຂີ່ຊ້າງຊົມທິວທັດນຳ ອີກດ້ວຍ.
ດັ່ງນັ້ນ ຫາກວ່າທ່ານໃດມີໂອ ກາດໄດ້ໄປທ່ຽວທາງພາກໃຕ້ກໍຢ່າ ລືມແວ່ໄປສຳພັດກັບບັນຍາກາດ ທີ່ເປັນທຳມະຊາດເໝາະແກ່ການພັກຜ່ອນຢ່ອນໃຈ, ພ້ອມທັງຮຽນຮູ້ປະຫວັດສາດຂອງລາວໄປພ້ອມໆກັນ.