ຂປລ. ປັດຈຸບັນ ຢູ່ແຂວງສະຫວັນນະເຂດ ກຳລັງເລັ່ງດຳເນີນ ການກໍ່ສ້າງຂົວ ຈຳນວນ 6 ແຫ່ງ ຕາມເສັ້ນທາງເລກທີ 11 ລຽບແຄມຂອງ ແຕ່ເມືອງໄກສອນ ພົມວິຫານ ຫາເມືອງ ໄຊພູທອງ ໃຫ້ສຳເລັດ ກ່ອນລະດູຝົນ. ທັງນີ້, ກໍເພື່ອເຮັດໃຫ້ ການໄປມາຫາສູ່ກັນ ລະຫວ່າງປະຊາຊົນ ແລະ ຂົນສົ່ງສິນຄ້າຕ່າງໆ ໄດ້ສະດວກສະບາຍ.
ໃນທ້າຍອາທິດຜ່ານມາ, ທ່ານ ປະສົງສິນ ຈະເລີນສຸກ ຫົວໜ້າພະແນກ ໂຍທາທິການ ແລະ ຂົນສົ່ງ ແຂວງສະຫວັນນະເຂດ ພ້ອມດ້ວຍວິຊາການ ໄດ້ລົງຕິດຕາມ ການສ້າງຂົວ 6 ແຫ່ງ ຕາມເສັ້ນທາງເລກທີ 11 ລຽບແຄມຂອງ ແຕ່ເມືອງໄກສອນ ພົມວິຫານ ຫາເມືອງ ໄຊພູທອງ ພ້ອມທັງໄດ້ເນັ້ນໜັກ ໃຫ້ຜູ້ຮັບເໝົາກໍ່ສ້າງຂົວ ແຫ່ງດັ່ງກ່າວ ຈົ່ງໄດ້ເອົາໃຈໃສ່ ສ້າງຂົວໃຫ້ສຳເລັດ ຕາມກຳນົດ ກ່ອນລະດູຝົນ ເພື່ອເຮັດໃຫ້ ການໄປມາຫາສູ່ກັນ ລະຫວ່າງປະຊາຊົນ ແລະ ຂົນສົ່ງສິນຄ້າຕ່າງໆ ໄດ້ສະດວກ.
ທ່ານ ທິບພະວອນ ສີລາຊາ ຜູ້ອຳນວຍການ ບໍລິສັດ VLP ພັດທະນາ ກໍ່ສ້າງຈຳກັດ ໃນນາມຜູ້ຮັບເໝົາກໍ່ສ້າງ ໄດ້ໃຫ້ຮູ້ວ່າ: ມາເຖິງປັດຈຸບັນ ຂົວທັງ 6 ແຫ່ງ ແມ່ນກຳລັງຂຸ້ນຂ້ຽວ ດຳເນີນການກໍ່ສ້າງເຫັນວ່າ ໜ້າວຽກປະຕິບັດ ໄດ້ແລ້ວ 80%, ກ່ອນລະດູຝົນ ທີ່ຈະມາເຖິງນີ້ ຈະກໍ່ສ້າງສຳເລັດ ຢ່າງແນ່ນອນ.
ໃນໂອກາດດຽວກັນ, ທ່ານ ປະສົງສິນ ຈະເລີນສຸກ ຍັງໄດ້ໄປເບິ່ງການກໍ່ສ້າງ ເສັ້ນທາງຍົກລະ ດັບດິນແດງ ແຕ່ບ້ານໜອງຂອນ ຫາບ້ານນາຂະຍອມ ເມືອງສອງຄອນ ທີ່ມີຄວາມຍາວ 6,5 ກິໂລ ແມັດ, ມີມູນຄ່າການກໍ່ສ້າງ ເກືອບ 5 ຕື້ກີບ ຕໍ່ກັບໜ້າວຽກດັ່ງກ່າວ ແມ່ນສາມາດປະຕິບັດ 60% ແລະ ຄາດວ່າ ໂຄງການດັ່ງກ່າວ ຈະສຳເລັດໃນປີ 2016 ນີ້.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!