ໂດຍ: ພິມພອນ
6 ເດືອນຕົ້ນພາກກາງ ສາມາດຈັດຕັ້ງປະຕິບັດໂຄງການຕາມແຜນການລົງທຶນຂອງລັດຖະບານເປັນມູນຄ່າເກືອບ 300 ຕື້ກີບ ໃນນັ້ນໄດ້ສຸມໃສ່ວຽກການພັດທະນາພື້ນຖານໂຄງລ່າງຖະໜົນຫົນທາງເປັນຫຼັກ ເພື່ອໃຫ້ເສດຖະກິດມີການເຕີບໂຕຢ່າງຕໍໍ່ເນື່ອງ.
ຕາມການເປີດເຜີຍຂອງທ່ານ ສົມດີ ດວງດີ ລັດຖະມົນຕີວ່າການກະຊວງແຜນການ ແລະ ການລົງທຶນໃຫ້ຮູ້ວ່າ: ເນື່ອງຈາກພາກກາງເປັນເຂດຈຸດສຸມທີ່ສຳຄັນມີທີ່ຕັ້ງລຽບຕາມລຳນ້ຳຂອງ, ຖືເປັນສູນກາງທາງດ້ານການເມືອງ, ເສດຖະກິດ, ວັດທະນະທຳສັງຄົມ ຊຶ່ງມີແມ່ນ້ຳໃຫຍ່ຫຼາຍສາຍໄຫຼຜ່ານທີ່ສາມາດສ້າງເງື່ອນໄຂອຳນວຍຄວາມສະດວກໃນການຜະລິດ ໂດຍສະເພາະແມ່ນການຜະລິດສະບຽງອາຫານ, ການຜະລິດເຂົ້າ ເປັນສິນຄ້າ ເພື່ອຫັນເປັນອຸດສາຫະກຳທີ່ທັນສະໄໝ ແລະ ເພີ່ມຄວາມສາມາດໃນການສົ່ງອອກສິນຄ້າ.
ນອກຈາກນັ້ນ ພາກກາງກໍຍັງ ຖືວ່າເປັນຈຸດບໍລິການຜ່ານທີ່ສຳຄັນເພາະການພັດທະນາພື້ນຖານໂຄງລ່າງໄລຍະຜ່ານມາຖືວ່າມີ ການພັດທະນາໄວເຊັ່ນ: ການກໍ່ ສ້າງຂົວຂ້າມນ້ຳຂອງ, ບັນດາ ເສັ້ນທາງ ແລະ ດ່ານສາກົນຕ່າງໆກໍໄດ້ຮັບການປັບປຸງໃຫ້ດີຂຶ້ນ, ພ້ອມດຽວກັນນັ້ນ, ການປະຕິບັດໂຄງການລົງທຶນຂອງລັດໄລຍະ 6 ເດືອນ ບັນລຸ 722 ໂຄງການ ລວມມູນຄ່າ 288,44 ຕື້ກີບ ເທົ່າກັບ 57% ຂອງແຜນການປີ, ໃນນັ້ນ ເປັນທຶນພາຍໃນ 165,31 ຕື້ກີບ ແລະ ທຶນຕ່າງປະເທດ 123,12 ຕື້ກີບ.
ໃນນີ້ ແມ່ນສຸມໃສ່ການພັດທະນາພື້ນຖານໂຄງລ່າງຖະໜົນຫົນທາງເປັນຫຼັກເປັນຕົ້ນການກໍ່ສ້າງສ້ອມແປງເສັ້ນທາງຫຼວງແຫ່ງ ຊາດເລກທີ 11 ຕອນເໜືອ ແຕ່ເກົ້າລ້ຽວຫາເມືອງສັງທອງຍາວ 82 ກິໂລແມັດ ມາຮອດປະຈຸບັນສຳເລັດແລ້ວ 68% ແລະ ນອກນັ້ນຍັງ ເລີ່ມປັບປຸງເສັ້ນທາງລຽບຕີນພູເຂົາຄວາຍ ຊຶ່ງເປັນການເຊື່ອມຕໍ່ລະຫວ່າງທາງເລກ 10 ກັບທາງເລກທີ 13 ໃຕ້ ຈາກເມືອງທຸລະຄົມແຂວງວຽງຈັນ ໄປຫາເມືອງປາກງື່ມຍາວ 50 ກິໂລແມັດ, ສ່ວນໂຄງການກໍ່ສ້າງເສັ້ນທາງດົງບັງນາສາລາກະເສດນາບົງດຽວນີ້ປະຕິບັດໄດ້ 68,78%, ເສັ້ນທາງ ແຕ່ເມືອງຈຳພອນຫາຊາຍແດນແທງທຸຍຄືບໜ້າແລ້ວ42%.
ນອກຈາກນັ້ນ ຍັງມີໂຄງການ ກໍ່ສ້າງທາງຫຼວງແຫ່ງຊາດ 1E ແຂວງບໍລິຄຳໄຊໄດ້ 44%, ໂຄງການປ້ອງກັນຕາຝັ່ງເຈື່ອນແຕ່ທ່າດ່ານປາກນ້ຳຊັນສຳເລັດແລ້ວ 50%, ສ່ວນທາງເລກ 20 ດ່ານໜອງມ້າຊາຍແດນຫວຽດນາມແຍກທາງໂຮ່ຈີມິນບ້ານກະເຕະ ໄດ້78,9%, ໂຄງການກໍ່ສ້າງທາງປູຢາງ ແຕ່ສາມແຍກທາງເລກທີ 13 ໃຕ້ບ້ານບໍ່ແໜ່ງ ເມືອງຫີນບູ ຄືບໜ້າແລ້ວ 66,8%.
ຢ່າງໃດກໍຕາມ ທ່ານ ສົມດີ ດວງດີ ຍັງໃຫ້ຮູ້ອີກວ່າ: ເພື່ອຢາກເຮັດໃຫ້ແຜນການປີບັນລຸຜົນສຳເລັດພາກສ່ວນກ່ຽວຂ້ອງຈຳຕ້ອງເອົາໃຈໃສ່ສືບຕໍ່ກໍ່ສ້າງເສັ້ນທາງທີ່ກຳລັງຈັດຕັ້ງປະຕິບັດໃຫ້ສຳເລັດຕາມແຜນການ, ສຸມໃສ່ສືບຕໍ່ສ້ອມແປງທາງປູຢາງ ແລະ ທາງ ດິນແດງທີ່ເປ່ເພເສຍຫາຍໃຫ້ສາມາດສັນຈອນໄປມາໄດ້ສະດວກ ແລະ ເອົາໃຈໃສ່ຄຸ້ມຄອງບັນດາໂຄງການລົງທຶນຂອງລັດທີ່ສະພາອະນຸມັດໃຫ້ມີປະສິດທິຜົນເປັນຕົ້ນແມ່ນບັນດາໂຄງການລົງທຶນຂອງລັດທີ່ກຳລັງຈັດຕັ້ງປະຕິບັດ ແລະ ໂຄງການທີ່ຍັງບໍ່ທັນໄດ້ຈັດຕັ້ງປະຕິບັດໃຫ້ໄດ້ລົງມືຕາມແຜນການ, ພ້ອມນັ້ນຍັງໃຫ້ເອົາໃຈໃສ່ຕິດ ຕາມ ແລະ ກວດກາບັນດາໂຄງການເພື່ອຫຼີກເວັ້ນການປະຕິບັດໂຄງການນອກແຜນອັນເປັນສາເຫດທີ່ພາໃຫ້ເກີດມີໜີ້ຄຸມເຄືອ ແລະ ສຸມໃສ່ການແກ້ໄຂບັນດາໜີ້ສິນທີ່ຍັງຄ້າງໃຫ້ໝົດໄປເທື່ອລະໜ້ອຍ.
ທີ່ມາ http://www.sedthakid.la/khao/18732.spc