ຊີເອັນເອັນ ມັນນີລາຍງານວ່າ ນັບຕັ້ງແຕ່ຕົ້ນປີ 2016 ລາຄາເງິນເພີ່ມສູງຂຶ້ນ 22% ເຮັດໃຫ້ເງິນກາຍເປັນຊັບສິນທີ່ໜ້າລົງທຶນໃນປີນີ້ ສ່ວນລາຄາຄຳເພີ່ມຂຶ້ນ 18% ນັບຕັ້ງແຕ່ຕົ້ນປີທີ່ຜ່ານມາ.
ໃນວັນອັງຄານ (19 ເມສາ) ທີ່ຜ່ານມາ ລາຄາເງິນເພີ່ມຂຶ້ນ 4,5% ຖືວ່າສູງທີ່ສຸດໃນຮອບ 11 ເດືອນທີ່ຜ່ານມາ ລາຄາເງິນຜັນປ່ຽນຕາມລາຄາຄຳ ແຕ່ຜູ້ຊ່ຽວຊານລະບຸວ່າ ໃນຫຼາຍອາດທິດທີ່ຜ່ານມາມີການຊື້ຂາຍເງິນຢ່າງຈິງຈັງ ຊຶ່ງນັກລົງທຶນຈັບຕາເບິ່ງຄວາມແຕກຕ່າງຂອງລາຄາເງິນ ແລະ ຄຳຢ່າງໃກ້ຊິດ ແລະ ເມື່ອລາຄາເງິນສູງຂຶ້ນໃນອາທິດທີ່ຜ່ານມາກໍ່ຊ່ວຍຫຼຸດຊ່ອງວ່າງຂອງລາຄາເງິນ ແລະ ຄຳລົງໄປ ແຕ່ລາຄາສິນຊັບທັງສອງຢ່າງກໍ່ຍັງຫ່າງກັນຫຼາຍຢູ່ ໂດຍລາຄາເງິນໃນປະຈຸບັນຢູ່ທີ່ 17 ໂດລາຕໍ່ອອນ ສ່ວນລາຄາຄຳຢູ່ທີ່ 1.254 ໂດລາຕໍ່ອອນ, ທັງນີ້ເຊື່ອວ່າ ປັດໃຈທີ່ເຮັດໃຫ້ລາຄາເງິນໃນສປ ຈີນສູງຂຶ້ນ ເກີດຈາກເສດຖະກິດຈີນເລີ່ມຄົງທີ່ ຈຶ່ງເປັນຜົນໃຫ້ມີຄວາມຕ້ອງການເງິນຫຼາຍຂຶ້ນອີກເທື່ອໜຶ່ງ.
ທ່ານ ຟິລິບ ດີລ ປະທານ U.S. Money Reserve ກ່າວວ່າ ເງິນແຕກຕ່າງຈາກຄຳຫຼາຍ ເພາະມີຄວາມຕ້ອງການຈາກຂະແໜ່ງອຸດສາຫະກຳເຂົ້າມາກ່ຽວຂ້ອງ ນອກຈາກນີ້ຄວາມຕ້ອງການຂອງເງິນຍັງມີສ່ວນໜຶ່ງມາຈາກຂະແໜງອຸດສາຫະກຳ ຈິວເວລຣີ ແລະ ສ່ວນໜຶ່ງມາຈາກນັກລົງທຶນທີ່ເພິ່ງພາຊັບສິນເປັນເງິນ ແລະ ຄຳ ໃນກໍລະນີທີ່ເສດຖະກິດອ່ອນແອ. ຢ່າງໃດກໍຕາມ ມີຂໍ້ສັງເກດການຈາກຜູ້ຊ່ຽວຊານວ່າ ມີຄວາມຕ້ອງການເງິນຫຼຽນສູງຂຶ້ນ ແຕ່ກໍ່ຍັງບໍ່ແມ່ນນັກລົງທຶນທຸກຄົນທີ່ຄິດວ່າ ເງິນເປັນຊັບສິນທີ່ຄວນລົງທຶນໃນປະຈຸບັນນີ້.