ສຳນັກຂ່າວຕ່າງປະເທດ ລາຍງານໃນວັນທີ 21 ເມສາຜ່ານມານີ້ວ່າ ທ່ານ ອະເລັກຊານເດີ ກຣຸດໂກ ເອກອັກຄະລັດຖະທູດຣັດເຊຍ ປະຈຳນາໂຕ້ ໄດ້ກ່າວມີຄຳເຫັນວ່າ ຣັດເຊຍຈະດຳເນີນທຸກມາດຕະການທີ່ຈຳເປັນ ເພື່ອສະກັດກັ້ນໄພຄຸກຄາມ ຈາກສະຫະລັດອາເມຣິກາ ແລະ ຊາດພັນທະມິດຂອງສະຫະລັດຯ ໃນລະຫວ່າງທີ່ທ່ານ ເຂົ້າຮ່ວມກອງປະຊຸມ ລະຫວ່າງຊາດສະມາຊິກ ອົງການສົນທິສັນຍາປ້ອງກັນແອັດແລນຕິກເໜືອ ຫລື ນາໂຕ້ ແລະ ຣັດເຊຍ ຊຶ່ງເປັນກອງປະຊຸມ ລະຫວ່າງສອງຝ່າຍຄັ້ງທຳອິດ ຕັ້ງແຕ່ຄວາມສຳພັນລະຫວ່າງຣັດເຊຍ ແລະ ນາໂຕ້ ເຂົ້າສູ່ຂັ້ນວິກິດການ ເມື່ອ 2 ປີກ່ອນໜ້ານີ້ ເນື່ອງຈາກສະພາບວິກິດການທາງການເມືອງຢູ່ອູແກຣນ ທີ່ທັງສອງຝ່າຍ ຕ່າງກໍມີບົດບາດ ແລະ ກ່າວຫາກັນວ່າເປັນຜູ້ແຊກແຊງ ເຖິງຂັ້ນກາຍເປັນສົງຄາມກາງເມືອງບານປາຍ.

ກ່ອນໜ້ານີ້ ເມື່ອວັນທີ 11 ເມສາຜ່ານມາ ກອງທັບເຮືອສະຫະລັດອາເມຣິກາ ໄດ້ສົ່ງເຮືອກຳປັ່ນສູ້ຮົບລຳໜຶ່ງ ເຂົ້າໄປແລ່ນໃກ້ກັບຖານທັບເຮືອຣັດເຊຍ ໃນທະເລບອນຕິກ ຈົນເປັນເຫດເຮັດໃຫ້ຝ່າຍຣັດເຊຍ ສົ່ງເຮືອບິນສູ້ຮົບອອກມາບິນຂັບໄລ່ ສ້າງຄວາມເຄັ່ງຕຶງໃຫ້ແກ່ຄວາມສຳພັນລະຫວ່າງສອງຝ່າຍຮອບໃໝ່.