ຫຼັງຈາກທີ່ຂ່າວກ່ອນໜ້ານີ້ມີ ຄົນທີ່ໄດ້ສຳຜັດ Huawei P9 Lite ມາແລ້ວ ແລະກ່າວບອກເລຶ່ອງສະເປັກມາແລ້ວ, ແຕ່ວ່າມື້ນີ້ເຮົາມີລາຍງານຢືນຢັນກ່ຽວກັບສະເປັກຂອງ P9 Lite ແລ້ວຜ່ານທາງ TENAA ເຊິ່ງເປັນໜ່ວຍງານຮັບຮອງມາດຕະຖານຄົມມະຄົມຂອງປະເທດຈີນແລ້ວ!!.
ໂດຍສະເປັກຂອງ P9 Lite ນັ້ນມີຄວາມຄ້າຍຄືກັບຂ່າວກ່ອນໜ້ານີ້ຄື ມາພ້ອມກັບໜ້າຈໍຂະໜາດ 5.2 ນິ້ວ, ຄວາມລະອຽດ 1920 x 1080 ພິກເຊວ (FHD). ສ່ວນໃນດ້ານຂອງຊິບປະມວນຜົນນັ້ນມີຄວາມແຮງຢູ່ທີ່ 2 GHz ເປັນຊິບແບບ Octa core (ຄາດວ່າຈະເປັນການນຳເອົາ Kirin 930 ມາປ່ຽນຊື່ໃໝ່ເປັນ Kirin 650), RAM 3 GB, ROM 16 GB ແລະແບັດເຕີຣີ 2900 mAh ເປັນແບບແກະອອກເອງບໍ່ໄດ້.
ໃນສ່ວນອື່ນໆກໍມີ ລະບົບສະແກນລາຍນິ້ວມືທີ່ຢູ່ດ້ານຫຼັງໂຕເຄື່ອງ, ໃຊ້ງານລະບົບ Android 6.0 Marshmallow ທັບດ້ວຍ EMUI 4.0. ໂຕເຄື່ອງມີສັດສ່ວນຢູ່ທີ່ 146.8 × 72.6 × 7.5 ມມ ແລະໜັກ 143 ກຣາມ (ເຊິ່ງໜັກກວ່າ P8 Lite ປະມານ 10 ກຣາມ), ມີໃຫ້ເລືອກ 3 ສີໄດ້ແກ່: ສີຂາວ, ສີດຳ ແລະສີທອງ. ໃນເລື່ອງຂອງລາຄາເຫັນເວັບນອກມີຂ່າວວ່າໂຕເຄື່ອງເປີດໃຫ້ສັ່ງຈອງໃນລາຄາ 300$, ແຕ່ສຳລັບປະເທດລາວແລ້ວແອັດມິນຄາດວ່າຈະຢູ່ໃນຊ່ວງລາຄາ 2.000.000 – 2.500.000 ກີບ ນິແຫຼະ.
ຄວາມເຫັນຜູ້ຂຽນ: Huawei P9 Lite ຖ້າທຽບຕາມສະເປັກແລ້ວ ຄວາມກຸ້ມຄ່າແມ່ນເໝາະສົມກັບຊ່ວງລາຄານີ້ເລີຍ ແຕ່ວ່າສິ່ງທີ່ສຳຄັນທີ່ສຸດກໍຄືຊິບປະມວນຜົນແລະຊິບກຣາບຟິກ ຍັງບໍ່ຮູ້ເທື່ອວ່າຈະເປັນແບບໃດ, ແຕ່ຢ່າງໃດກໍຕາມແອັດມິນຫວັງໃຫ້ຄວາມແຮງທຽບເທົ່າກັບ Snapdragon 650 ໄດ້ກໍຍັງດີ (ບໍ່ລວມເລື່ອງກຣາບຟິກ)
ທີ່ມາ:phonearena