ອຸບັດຕິເຫດໄລຍະເທສະການບຸນປີໃໝ່ລາວ 2016 ທີ່ ແຂວງສະຫວັນນະເຂດ ມີຄົນເສຍຊີວິດ 3 ຄົນ
ຈາກການເກັບກຳສະຖິຕິອຸບັດຕິເຫດຕາມທ້ອງຖະໜົນໄລຍະ 7 ວັນອັນຕະລາຍເລີ່ມແຕ່ວັນທີ 11 ເຖິງ 17 ເມສາ ປີ 2016 ໃນການຫລິ້ນບຸນປີໃໝ່ຂອງປະຊາຊົນຊາວພຸດພາຍໃນແຂວງ ສະຫວັນນະເຂດ ເຫັນວ່າສະຖິຕິອຸບັດຕິເຫດເກີດຂຶ້ນມີທັງໝົດ 39 ລາຍ, ໃນຈຳນວນນີ້ມີຜູ້ເສຍຊີວິດ 3 ຄົນ, ຍິງ 1 ຄົນ.
ຈາກການລາຍງານຂອງທ່ານ ພັນຕີ ນີວັນ ຈູມມະນີວົງ ຮອງຫົວໜ້າພະແນກຕຳຫລວດຈະລາຈອນແຂວງ ສະຫວັນນະເຂດ ເມື່ອວັນທີ 19 ເມສາ ນີ້ນັກຂ່າວພວກເຮົາວ່າ: ສຳລັບປີ 2016 ນີ້ພາກສ່ວນທີ່່ກ່ຽວຂ້ອງໄດ້ມີການວາງແຜນ ແລະ ເຮັດວຽກຢ່າງໜັກໂດຍການລົງໂຄສະນາກົດລະບຽບຈະລາຈອນ, ຍົກໃຫ້ເຫັນຜົນຮ້າຍ ແລະ ຜົນເສຍຫາຍຂອງການເກີດອຸບັດຕິເຫດ ແລະ ອື່ນໆ ຕາມສະຖານທີ່ໆມີຄົນຈຳນວນຫລາຍເປັນຕົ້ນ: ສະຖາບັນການສຶກສາ ແລະ ໂຮງຈັກໂຮງງານ; ແຕ່ງໜ່ວຍໂຄສະນາກໍຄືນຳໃຊ້ລົດຕິດເຄື່ອງກະຈາຍສຽງໂຄສະນາຕາມຖະໜົນບ່ອນທີ່ເຫັນວ່າມີ ການສັນຈອນແອອັດ ແລະ ສັບສົນ, ແຕ່ງກຳລັງສະເພາະລົງປະຈຳແຕ່ລະຈຸດເປັນຕົ້ນ: ບັນດາແຍກຕ່າງໆທີ່ເຫັນວ່າເປັນຈຸດສ່ຽງການເກີດອຸປະຕິເຫດ ແລະ ບັນດາປ້ອມທີ່ມີການວາງໄວ້ແຕ່ລະຈຸດ, ມີການແຈກແຜ່ນພັບເຊິ່ງມີເນື້ອໃນກຽວກັບການຂັບຂີ່ທີ່ບໍລະເມີດກົດຈໍລະຈອນ ແລະ ອື່ນໆ. ໄລຍະຫຼິ້ນບຸນແມ່ນຕັ້ງສາຍກວດຕາມເສັ້ນທາງສຳຄັນກໍຄື: ທາງເລກ 9 ແລະເລກທີ 13 ຫາກພົບເຫັນລົດຄັນໃດນຳເອົາຖັງທີ່ບັນຈຸນ້ຳຂຶ້ນລົດ (ນ້ຳສີ ຫລືນ້ຳອື່ນໆບັນຈຸໃສ່ຖົງຢາງ) ແມ່ນຈະໄດ້ຖອກຖີ້ມ ຈາກນັ້ນກໍ່ໄດ້ມີການກັກໂຕໄວ້ ແລະ ຕັກຕືນ ເພື່ອບໍ່ໃຫ້ກະທຳຈົນເປັນເຫດເຮັດໃຫ້ມີຄົນໄດ້ຮັບບາດເຈັບ ຫລືເສຍຊີວິດ. ດ່ັງນັ້ນສາມາດສະຫຼຸບໄດ້ວ່າ: ອຸປະຕິເຫດເກີດຂຶ້ນທັງໝົດ 39 ລາຍ, ມີພາຫະນະເປ່ເພທັງໝົດ 69 ຄັນ, ເປ່ເພສົມຄວນ 28 ຄັນ, ໃຊ້ການບໍ່ໄດ້ 1 ຄັນ, ມີຄົນໄດ້ຮັບບາດເຈັບທັງໝົດ 77 ຄົນ, ຍິງ 18 ຄົນ, ບາດເຈັບເລັກໜ້ອຍ 33 ຄົນ, ຍິງ 6 ຄົນ, ບາດເຈັບສົມຄວນ 33 ຄົນ, ຍິງ 6 ຄົນ, ບາດເຈັບສາຫັດ 11 ຄົນ, ຍິງ 5 ຄົນ ໃນຈຳນວນນີ້ເສຍຊີວິດ 3 ຄົນ, ຍິງ 1 ຄົນ.
ຂ່າວແຈ້ງຕື່ມວ່າ: ສາເຫດສ່ວນໃຫຍ່ແມ່ນມາຈາກການດື່ມສິ່ງມືນເມົາແລ້ວຂັບຂີ່ລົດ ໃນຈຳນວນນີ້ມີ 14 ລາຍ, ແລ່ນລົດດ້ວຍຄວາມໄວເກີນກຳນົດມີ 5 ລາຍ, ຂັບຂີ່ລົດບໍ່ປ່ອຍສິດມີ 4 ລາຍ ແລະ ແຊງບໍ່ຮັບປະກັນ 1 ລາຍ. ເມືອງທີ່ເກີດອຸປະຕິເຫດສ່ວນໃຫຍ່ແມ່ນ: ເມືອງໄກສອນພົມວິຫານ 11 ລາຍ, ອຸທຸມພອນ 4 ລາຍ, ພະລານໄຊ 4 ລາຍ, ອາດສະພັງທອງ 5 ລາຍ, ສອງຄອນ 4 ລາຍ, ຈຳພອນ 4 ລາຍ, ເຊໂປນ 2 ລາຍ, ເມືອງໄຊບູລີ, ອາດສະພອນ, ວິລະບູລີ, ຊົນນະບູລີ ແລະ ນອງ ເມືອງລະ 1 ລາຍ.
ຂ່າວ-ພາບ: ພຸດທະສິນ
ຂ່າວຈາກ: ສະຫວັນພັດທະນາ ຂ່າວ / Savanhphuttana News