ສະ­ຫວັນ​ນະ​ເຂດ ປະ​ກວດ​ແນວ​ພັນ​ເຂົ້າ

0
1808

   ວັນ​ທີ 6 ເມ­ສາ 2016 ໄດ້​ມີ​ການ​ຈັດ​ງານ​ຊີມ​ເຂົ້າ​ແລະ​ປະ​ກວດ​ແນວ​ພັນ​ເຂົ້າ​ໂດຍ​ຈັດ​ຂຶ້ນ​ເປັນ​ຄັ້ງ​ທີ 2 ທີ່​ສູນ​ຄົ້ນ­ຄວ້າ​ແລະ​ຂະ­ຫຍາຍ​ແນວ​ພັນ​ພືດ​ທ່າ​ສະ­ໂນ​ແຂວງ​ສະ­ຫວັນ​ນະ​ເຂດ​ຊຶ່ງ​ເປັນ​ກຽດ​ເຂົ້າ​ຮ່ວມ​ໂດຍທ່ານ​ທັດ​ສະ­ກາ​ສະ­ພັງ​ທອງ​ຮອງ​ຫົວ­ໜ້າ​ພະ​ແນກ​ກະ­ສິ­ກຳ-ປ່າ­ໄມ້​ແຂວງ​ສະ­ຫວັນ​ນະ​ເຂດ, ທ່ານ​ດຣ. ນາງ​ພູ​ດາ​ໄລ​ລັດ​ວິ­ໄລ​ວົງ​ຫົວ­ໜ້າ​ສູນ​ຄົ້ນ­ຄວ້າ​ແລະ​ຂະ­ຫຍາຍ​ແນວ​ພັນ​ພືດ​ທ່າ​ສະ­ໂນ​ແລະ​ທ່ານ​ດຣ. ກັນ­ຍາ​ວິມ​ກີ​ຣະ​ຕິ​ກອນ​ຜູ້­ອຳ­ນວຍ­ການ​ສູນ­ພັນ​ທຸ​ວິ­ສະ­ວະ­ກຳ​ແລະ​ເຕັກ​ໂນ​ໂລ​ຊີ​ຊີ­ວະ​ພາບ​ແຫ່ງ​ປະ­ເທດ​ໄທ​ພ້ອມ​ດ້ວຍ​ຄະ­ນະ​ເຂົ້າ​ຮ່ວມ.

    ໃນ​ງານ​ຄັ້ງ​ນີ້​ຜູ້​ເຂົ້າ​ຮ່ວມ​ງານ​ໄດ້​ມີ​ການ​ຊີມ​ເຂົ້າ​ແນວ​ພັນ​ໃໝ່​ຊຶ່ງ​ລວມ​ມີ​ເຂົ້າ­ໜຽວ​ໜຶ້ງ​ສຸກ​ແລ້ວ​ແລະ​ເຂົ້າ­ຈ້າວ​ທີ່​ຫຸງ​ສຸກ​ແລ້ວໃນ​ນີ້​ລວມ​ມີ​ເຂົ້າ­ໜຽວ​ທ່າ​ດອກ​ຄຳ 1, ທ່າ​ສະ­ໂນ, ພັນ​ເຂົ້າ­ຈ້າວ​ຫອມ​ແລະ​ພັນ​ອື່ນໆ​ໂດຍ​ມີ​ຜູ້​ເຂົ້າ​ຮ່ວມ​ຊີມ​ຢ່າງ​ຫຼວງ­ຫຼາຍ​ຫຼັງ​ຈາກ​ຊີມ​ເຂົ້າ​ແລ້ວ​ທຸກ​ຄົນ​ກໍ​ໄດ້​ໃຫ້​ຄະ­ແນນ​ໃນ​ແບບ​ຟອມ​ທີ່​ຄະ­ນະ​ຜູ້​ຈັດ​ງານ​ໄດ້​ແຈກ​ຍາຍ​ໃຫ້​ເພື່ອ​ເປັນ​ການ​ເກັບ​ກຳ​ຂໍ້​ມູນ​ໃນ​ການ​ປັບ­ປຸງ​ແນວ​ພັນ​ເຂົ້າ​ໃນ​ຂັ້ນ​ຕໍ່​ໄປ​ພ້ອມ​ນັ້ນ​ໃນ​ງານ​ກໍ​ໄດ້​ມີ​ການ​ປະ​ກວດ​ແນວ​ພັນ​ເຂົ້າ​ຕ່າງໆ​ເຊັ່ນ: ພັນ​ເຂົ້າ​ທີ່​ມີ​ສະ­ມັດ­ຖະ­ພາບ​ຜົນ​ຜະ­ລິດ​ສູງ, ພັນ​ເຂົ້າ​ທີ່​ມີ​ກິ່ນ​ຫອມ, ທົນ​ນ້ຳ​ຖ້ວມ​ແລະ​ຕ້ານ­ທານ​ໂລກ​ໄໝ້​ໂດຍ​ມີ​ຄະ­ນະ​ກຳ­ມະ­ການ​ຕັດ­ສິນ​ຕາມ​ມາດ­ຖານ​ແລະ​ຄຸນ​ນະ​ພາບ​ຂອງ​ພັນ​ເຂົ້າ​ແຕ່​ລະ​ປະ­ເພດ.

ຊຶ່ງ​ການ​ຈັດ​ງານ​ຄັ້ງ​ນີ້​ແມ່ນ​ການ​ຮ່ວມ​ມື​ລະ­ຫວ່າງ​ສູນ​ຄົ້ນ­ຄວ້າ​ແລະ​ຂະ­ຫຍາຍ​ແນວ​ພັນ​ພືດ​ທ່າ​ສະ­ໂນ​ແຂວງ​ສະ­ຫວັນ​ນະ​ເຂດ​ແລະ​ສູນ­ພັນ​ທຸ​ວິ­ສະ­ວະ­ກຳ​ແລະ​ເຕັກ​ໂນ​ໂລ​ຊີ​ຊີ­ວະ​ພາບ​ແຫ່ງ​ປະ­ເທດ​ໄທ​ຮ່ວມ​ກັນ​ຈັດ​ຂຶ້ນ​ຊຶ່ງ​ງານ​ນີ້​ແມ່ນ​ເປັນ​ສ່ວນ​ໜຶ່ງ​ຂອງ​ກິດ­ຈະ­ກຳ​ຕ່າງໆ​ທີ່​ຈະ​ນຳ​ໃຊ້​ເຂົ້າ​ໃນ​ການ​ປັບ­ປຸງ​ແນວ​ພັນ​ເຂົ້າ​ແລະ​ເພື່ອ​ສ້າງ​ຄວາມ​ຍືນ​ຍົງ​ໃນ​ການ​ຜະ­ລິດ​ເຂົ້າ​ໃຫ້​ກັບ​ກຸ່ມ​ຊາວ­ນາ​ນຳ­ໄປ​ສູ່​ການ​ປູກ​ເຂົ້າ​ທີ່​ມີ​ຄຸນ​ນະ​ພາບ, ໄດ້​ຮັບ​ຜົນ​ຜະ­ລິດ​ສູງ, ມີ​ລຳ­ຕົ້ນ​ທີ່​ແຂງ­ແຮງ, ທົນ​ທານ​ກັບ​ສະ­ພາບ​ນ້ຳ​ຖ້ວມ, ຕ້ານ​ໂລກ​ໄໝ້​ແລະ​ມີ​ລົດ​ຊາດ​ທີ່​ແຊບ​ແລະ​ຫອມ​ນອກ​ນັ້ນ​ຜູ້​ເຂົ້າ​ຮ່ວມ​ຍັງ​ໄດ້​ຊີມ​ນ້ຳ​ຊາ​ທີ່​ຊົງ​ຈາກ​ຊາ​ໃບ​ເຂົ້າ​ແລະ​ຊົມ​ການ​ສາ­ທິດ​ວິ­ທີ​ເຮັດ​ຊາ​ໃບ​ເຂົ້າ​ຊຶ່ງ​ສ້າງ​ຄວາມ​ສົນ­ໃຈ​ໃຫ້​ແກ່​ຜູ້​ເຂົ້າ​ຮ່ວມ​ງານ​ເປັນ​ຢ່າງ​ດີ.

ທີ່ມາ:logo