ໃນຕອນເຊົ້າຂອງວັນທີ 19 ເມສາຜ່ານມານີ້, ຜູ້ແທນສະມາຊິກສະພາແຫ່ງຊາດ(ສສຊ) ຊຸດທີ VIII ນຳໂດຍທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດຊຸດທີ VII ໄດ້ໄປວາງພວງມາລາຢູ່ອານຸສາວະລີນັກຮົບນິລະນາມ (ດາວແດງ) ແລະ ວາງກະຕ່າດອກໄມ້ຢູ່ອານຸສອນສະຖານປະທານໄກສອນ ພົມວິຫານ ຢູ່ນະຄອນຫລວງວຽງຈັນ ເພື່ອສະແດງເຖິງຄວາມເຄົາລົບຮັກ ແລະ ກະຕັນຍູຮູ້ບຸນຄຸນເຖິງຄຸນງາມຄວາມດີ ແລະ ນ້ຳໃຈຕໍ່ສູ້ຢ່າງພິລະອາດຫານຂອງບັນພະບູລຸດ ກໍຄືນັກຮົບປະຕິວັດທີ່ເສຍສະຫລະຊີວິດເລືອດເນື້ອເພື່ອປະເທດຊາດ ແລະປະຊາຊົນຢ່າງອົງອາດກ້າຫານ ພາຍໃຕ້ການຊີ້ນຳ-ນຳພາຂອງພັກ ປະຊາຊົນປະຕິວັດລາວ ຈົນໄດ້ຮັບໄຊຊະນະ ແລະປະກາດເອກກະລາດສະຖາປານາເປັນສາທາລະນະລັດ
ປະຊາທິປະໄຕ ປະຊາຊົນ ໃນວັນທີ 2 ທັນວາ 1975 ຊຶ່ງຜົນງານ ແລະ ຄຸນງາມຄວາມດີອັນໃຫຍ່ຫລວງດັ່ງກ່າວ ໄດ້ຖືກຈາລຶກໄວ້ໃນຈິດໃຈຂອງປວງຊົນລາວທັງຊາດຕະຫລອດໄປ.
ການວາງພວງມາລາ ແລະ ກະຕ່າດອກໄມ້ຂອງຄະນະຜູ້ແທນ ສສຊ ຄັ້ງນີ້ ແມ່ນໃນໂອກາດກອງປະຊຸມຄັ້ງປະຖົມມະລຶກຂອງສະພາແຫ່ງຊາດຊຸດທີ VIII ທີ່ຈະໄຂຂຶ້ນແຕ່ວັນທີ 20-23 ເມສານີ້, ທີ່ຫໍສະພາແຫ່ງຊາດນະຄອນຫລວງວຽງຈັນ ກອງປະຊຸມຄັ້ງສຳຄັນນີ້ ຈະໄດ້ພິຈາລະນາ ແລະ ຮັບ ຮອງໂຄງປະກອບການຈັດຕັ້ງ ແລະບຸກຄະລາກອນຂອງສະພາແຫ່ງຊາດ, ເລືອກຕັ້ງປະທານປະເທດ, ຮອງປະທານປະເທດ, ນາຍົກລັດຖະມົນຕີ, ຮອງນາຍົກລັດຖະມົນຕີ, ໂຄງປະກອບການຈັດຕັ້ງລັດຖະ ບານຊຸດໃໝ່, ເລືອກຕັ້ງຫົວໜ້າອົງການໄອຍະການປະຊາຊົນສູງສຸດ, ປະທານສານປະຊາຊົນສູງສຸດ ແລະ ບັນຫາສຳຄັນຂອງຊາດອື່ນໆ.
ຂ່າວຈາກ: ລາວພັດທະນາ