ການເປີດກວ້າງການຂົນສົ່ງທາງອາກາດຈະເປັນທັງໂອກາດ ແລະ ສິ່ງທ້າທາຍ ເພາະຈະມີສາຍການບິນຈາກບັນດາປະເທດຕ່າງໆເຂົ້າມາ ພາໃຫ້ມີພການແຂ່ງຂັນດ້ານລາຄາ, ການຍາດແຍ່ງລູກຄ້າ ເຊິ່ງສິ່ງສຳຄັນ ພວກເຮົາຕ້ອງເລັ່ງປັບປຸງດ້ານການບໍລິຫານຈັດການ, ປັບປຸງດ້ານມາດຕະຖານດ້ານການບໍລິການ, ບຸກຄະລາກອນ, ມາດຕະຖານຄວາມປອດໄພ ເພື່ອສ້າງຂີດຄວາມສາມາດໃນການແຂ່ງຂັນກັບສາກົນ. ເມື່ອເປັນແນວນັ້ນລັດວິສາຫະກິດການບິນລາວ ທີ່ເປັນສາຍການບິນແຫ່ງຊາດຈະຕ້ອງໄດ້ປັບປຸງຕົວເອງໃຫ້ຫຼາຍຂຶ້ນ ບໍ່ວ່າຈະເປັນເລື່ອງການບໍລິການໃຫ້ໄດ້ດີກວ່າເກົ່າ, ການແຂ່ງຂັນດ້ານລາຄາ ເພາະວ່າຈະມີສາຍການບິນທີ່ມີຕົ້ນທຶນຕ່ຳບິນເຂົ້າມາຫຼາຍ ເຊິ່ງອາດສົ່ງຜົນກະທົບໃສ່ສາຍການບິນພວກເຮົາ ເນື່ອງຈາກວ່າສາຍການບິນພວກເຮົາເປັນສາຍການບິນທີ່ບໍລິການຄົບວົງຈອນ ( Full Service ). ດ້ານໜຶ່ງຂອງລັດວິສາຫະກິດການບິນລາວໄດ້ຢຶດເອົາບັນຫາຄວາມປອດໄພເປັນບັນຫາທີ່ສຳຄັນເພື່ອສ້າງຄວາມເຊື່ອໝັ້ນ ແລະ ຮັບປະກັນຄວາມປອດໄພໃຫ້ແກ່ຜູ້ໃຊ້ບໍລິການ. ດັ່ງນັ້ນ, ໃນວັນທີ 4 ກຸມພາ 2016 ລັດວິສາຫະກິດການບິນລາວ ກໍ່ໄດ້ຮັບໃບຢັ້ງຢືນດ້ານຄຸນນະພາບການບິນ ຫຼື ເອີ້ນວ່າ IATA OPERATIONAL SAFETY AUDIT ( IOSA ) ເຊິ່ງຈະເປັນການສ້າງໂອກາດເຮັດໃຫ້ເຮົາສາມາດໄປຮ່ວມມືກັບສາຍການບິນຕ່າງໆໃນທົ່ວໂລກໄດ້.
ແຫລ່ງຂ່າວຈາກ: ເສດຖະກິດ-ການຄ້າ