ສຳນັກຂ່າວຕ່າງປະເທດ ລາຍງານໃນວັນທີ 18 ເມສານີ້ວ່າ ເກີດເຫດແຜ່ນດິນໄຫວຮຸນແຮງ ຂະໜາດ 7.8 ຣິກເຕີ ຢູ່ເຂດພື້ນທີ່ຊາຍຝັ່ງແຄມມະຫາສະໝຸດປາຊີຟິກ ທາງພາກກາງຂອງປະເທດເອກົວດໍ ປະເທດໃນແຖບທະວີບອາເມຣິກາໃຕ້ ໃນຕອນຄ່ຳຂອງວັນທີ 16 ເມສາ ຕາມເວລາໃນທ້ອງຖິ່ນ ຊຶ່ງກົງກັບຕອນເຊົ້າຂອງວັນທີ 17 ເມສາ ຕາມເວລາໃນປະເທດລາວ ສ້າງຄວາມເສຍຫາຍຕໍ່ຊີວິດ ແລະ ຊັບສິນຂອງປະຊາຊົນຢ່າງໜັກໜ່ວງ ລວມຍອດຫລ້າສຸດ ມີຜູ້ເສຍຊີວິດແລ້ວຢ່າງໜ້ອຍ 272 ຄົນ ແລະ ບາດເຈັບກວ່າ 2,527 ຄົນ.

ດ້ານທາງການເອກົວດໍ ໄດ້ລະດົມກຳລັງທະຫານກວ່າ 10,000 ຄົນ ແລະ ຕຳຫລວດອີກ 3,500 ຄົນ ເລັ່ງເຂົ້າກູ້ໄພ ຄາດອາດມີຜູ້ເສຍຊີວິດເພີ່ມສູງຂຶ້ນອີກ ໂດຍບັນດາປະເທດເພື່ອນບ້ານເຊັ່ນ ເວເນຊູເອລາ, ແມັກຊິກ ແລະ ໂກລົມບີ ໄດ້ສົ່ງຄວາມຊ່ວຍເຫລືອເບື້ອງຕົ້ນ ເຂົ້າໄປຍັງພື້ນທີ່ປະສົບໄພແລ້ວ.