ສຳນັກຂ່າວຕ່າງປະເທດລາຍງານຈາກກຸງໂຊ ປະເທດເກົາຫຼີໃຕ້ເມື່ອວັນທີ 7 ເມສາ ວ່າບໍລິສັດຊຳຊຸງ ອິເລັກໂທຣນິກ ຜູ້ຜະລິດສະມາດໂຟນລາຍໃຫຍ່ຂອງໂລກຈາກເກົາຫຼີໃຕ້ ອອກຖະແຫຼງການເມື່ອວັນພະຫັດ ຄາດການຜົນກຳໄລຈາກການດຳເນີນສະເພາະທຸລະກິດສະມາດໂຟນໃນຊ່ວງໄຕມາດທຳອິດຂອງປີນີ້ ຫຼືລະຫວ່າງເດືອນມັງກອນ-ມີນາ ຢູ່ທີ່ປະມານ 6.6 ລ້ານລ້ານວອນ ເພີ້ມຂື້ນ 10% ຫຼືປະມານ 5,000 ລ້ານວອນເມື່ອທຽບກັບຊ່ວງເວລາດຽວກັນຂອງປີກາຍ
ທັງນີ້ຊຳຊຸງເຊື່ອວ່າຄາດການທີ່ອອກມາ ຈະສາມາດເອີ້ນຄືນຄວາມເຊື່ອໝັ້ນຈາກນັກລົງທຶນໄດ້ອີກຄັ້ງ ຮ່ວມດ້ວຍສະຖິຕິຍອດຈຳໜ່າຍສະມາດໂຟນລຸ່ນລ່າສຸດຄື Samsung Galaxy S7 ແລະ S7 edge ທີ່ລວມກັນເກີນ 10 ລ້ານໜ່ວຍທົ່ວໂລກ ນັບຕັ້ງແຕ່ວາງຈຳໜ່າຍຢ່າງເປັນທາງການ ເມື່ອວັນທີ 11 ມີນາທີ່ຜ່ານມາ ເຮັດໃຫ້ມີແນວໂນ້ມສູງວ່າ ກາແລັກຊີ s7 ຈະເປັນສະມາດໂຟນໃຊ້ລະບົບປະຕິບັດການແອນດຣອຍ ທີ່ມີຍອດຈຳໜ່າຍສູງສຸດໃນປີນີ້ອີກດ້ວຍ
ຢ່າງໃດກໍ່ຕາມ ລາຍງານຜົນປະກອບການປະຈຳໄຕມາດທຳອິດສະບັບເຕັມຈະໄດ້ຮັບການເຜີຍແຜ່ອອກສູ່ສາທາລະນະ ໃນຊ່ວງທ້າຍເດືອນເມສານີ້ ເຊິ່ງຫາກເປັນໄປຕາມລາຍງານຄາດການຈະຖືເປັນການເລີ້ມຕົ້ນທີ່ດີສຳລັບການດຳເນີນງານດ້ານທຸລະກິດສະມາດໂຟນຂອງຊຳຊຸງໃນປີນີ້ ຫຼັງຜົນກຳໄລໃນໄຕມາດສຸດທ້າຍຂອງປີ 2015 ຫຼຸດລົງມາເຖິງ 40%
ຂ່າວຈາກ: ABC Laos news ສຳນັກຂ່າວເອບີຊີລາວ